خه‌بات: مسلم دۆلەمەری:- عیماد ئالیخان ئاکنجیێ پارێزگەها دهۆکێ، دەرچوویێ پەیمانگەها هونەرێن جوان بەشێ شێوەکاری/ نیگار هەروەسا دەرچوویێ زانکۆیا دهۆکێیە لە کولیژا پەروەردا بنیات بەشێ دەروونناسی, دڤێ دیدرێدا بۆمە بەحسێ ئەزموونا چەند ساڵیا هونەرێ خۆیێ شێوەکاری کر.
دەمێ ئەزێ زارۆک من حەز ژ کارێ وێنەکێشانێ دکر و دیوارێن ژۆرێن مالێ هەموو ب وێنەکێشانێ رەنگاورەنگ کربوون و هوسا من دەست ب وێنەکێشانێ کر و دگەل من دا مەزن بوو تاکو من پەیمانگە ب دووماهی ئینای، لێ ل بیرا من نینە کا ئێکەم کەڤال من دروستکری ل سەر چ بوو و ب چ کەرەستە من دروست کربوو، لێ بێگۆمان ئێکەم کەڤال ئەز زارۆک بووم و ل وی دەمی دبیت ل سەر وێنێن کەساتیێن کارتوونی بن. لێ نوکە کارێن من یێن هونەری یێن کو ئەز دروست دکەم د هەمەجۆرن، و ب کەرەستێن جودا جودا کار دکەم، بۆ نموونە رەنگێن زەیتی، رەنگێن پاستین و ئاڤێ و … هتد. و پتر د فلکلۆری و کولتووری نە گرێدای ژیان و ژیارا کوردان ڤە.
سەبارەت ب وان کەڤالێن کو دروست دکەت کا پتر ل سەر چنەگۆت: ب هەمی شێوان کار دکەم لێ پتر د راستی نە بۆ نموونە سروشتی، کولتووری و ژیانا کوردان ڤە، هەروەسا وێنێن کو قوتابی مفای ژێ ببینن من ل سەر دیوارێن هندەک قوتابخانان وێنەکرینە. بۆ نموونە زانست، ئینگلیزی و رێنمایی و … هتد. ل سەر ڕەنگ ڤەدانا سروشتێ کوردستانێ داناڤا کەڤالێت خۆدادبێژیت: بەلێ سروشتی کوردستانێ تێکەلی کەڤالێن خوە دکەم، ژ بەرکو سروشتێ مە ب خوە هونەرە کەڤالە، میوزیکە و … هتد، هەروەسا ئازار، خۆشی و نەخۆشیێن گەلێ خوە تێدا دیار دکەم ل دووڤ پێدڤی. ل بارێ هندێ کاهەمی کەسەک دێشێت ببیتە نیگارکێش و هونەرمەند گۆت: نەخێر هەموو کەس نەشێن ببنە نیگارکێش، ژ بەرکو یا ئاسان نینە، هونەرێ شێوەکاری حەزە ئارەزوویە و ئیلهامە، ئەگەر ئەڤە ل دەڤ مرۆڤی نەبن گەلەکا ب زەحمەتە ببیتە نیگارکێش. ل بارا وێ پەیام و ناما میللەتێ خۆ کو هونەرمەندێن نیگارکێش هەریەک ب شێوازەکێ جیا دشێن بگەهیننە جڤاکێ یان جیهانێ دبێژیت: هونەر نامەیەکە هونەرمەند دگەهینتە جڤاکی یان جیهانێ ب گشتیی، ب رێکا کەڤال، ستران و شانۆ و … هتد.
هەر هونەرمەندەکێ شێوەکار شێوازێ خوە یێ تایبەت هەیە، دەمێ کو کەڤالەکێ دکێشیت نامەکا هەی بەلکی نەشێت ب گۆتن یان نڤیسین بگەهینیت، لێ ب رێکا کەڤالی دێ گەهینیت، هەروەسا خەم و خەیال، خۆشی و نەخۆشیێن خۆ یێن تاکە کەسی یان کومەلایەتی تێدا دیار دکەت. هەموو کەڤالێن من تشتەکێ ڤەشارتی ژ کەساتی، ژیان و هێز و لاوازیا من تێدانە لێ د ڤەشارتی نە و دبیت هندەک شێوەکار هەست پێ بکەن و ببینن. لێ دەمێ ئەز وی تشتێ خوە یێ ڤەشارتی د کەڤالی دا بکار دئینم دەروونێ من ئارام دبیت، لەوا وێنەکێشان ژی دبیتە رێکە چارەسەریەکا دەروونی بۆ هونەرمەندێ شێوەکار و بینەری ژی. ل دوماهیکێدا بەحسێ هونەرێ خۆیێ داهاتی کرو گۆت: من دڤێت دناڤ هونەرێ شێوەکاری پتر گرنگیێ بدەمە لایەنێ دەروونی و تێکەلی کەڤالی بکەم ژبەرکو دەروونناسی ژی هونەرە، و هونەرێ کلاسیک و مودرێن تێکەلی هەڤ بکەم، خەم و ژیان، خۆشی و نەخۆشی، هێز و لاوازی و … هتد یێن خۆ و یێن خەلکی یێن تاکەکەسی و گشتی دارێژمە سەر کەڤالی و دخوازم پتر پشتەڤانی ل هونەرێ شێوەکاری ب گشتیی بهێتە کرن.
