سه‌ره‌تا وتار ڕیفراندۆم مافەکێ خودایی و دەنگێ خەلکێ (کوردستانێ)یە
شڤان توڤی
بیست و پێنجێ ئیلۆنا ٢٠١٧ ئێک ژ وان وێستگەهانە کو پشتی بورینا نەهـ سالان، هێشتا وەکو گەشترین و ببهاترین پشک د بیردانکا سیاسی و نیشتمانی یا خەلکێ کوردستانێ دا دچرسکیت؛ ئەو ڕۆژا ملیۆنان وەلاتی ب دلەکی سوتیڤە قەستا سندوقێن دەنگدانێ کرین و ئیرادەیا خو ژبو پاشەڕۆژەکا ئازاد نیشان دای.
ئازادی، مافەکێ سروشتییە کو خودێ پەروەردگار و مەزن ب یەکسانی دایە هەمی گەل و نەتەوەیێن سەر ئەردی.
ئەڤە مافەکێ سنوردار نینە کو دەستەڵاتدارەک ل گۆرەی حەزا خو ب دەتە نەتەوەیەکێ و ل نەتەوەکێ دی قەدەغە بکەت، بەلکو مافەکێ ئیلاهی و شەرعییە کو د ناڤا مروڤاتییێ دا ڕەهـ و ڕیشال بەردانە. شەریعەتێ ئیسلامێ یێ پیرۆز ژی هاتییە بو پاراستنا ماف و کەرامەتا مرۆڤی، چەسپاندنا دادپەروەریێ و ڕزگارکرنا گەلان ژ ستەم و چەوساندنێ؛ لەوما بەرگریکرن ل ئازادیێ، پاراستنا ئاخ و نیشتمانی و گەهشتن ب مافێ دیارکرنا چارەنڤیسی، بەری کو ئەرکەکێ نیشتمانی بیت، بەرپرسیارییەکا ئاینی و شەرعییە. ژ ڤێ چەندێ، خودایێ مەزن د قورئانا پیرۆز دا کەرەم کرییە: ﴿يَا أَيُّهَا النَّاسُ إِنَّا خَلَقْنَاكُم مِّن ذَكَرٍ وَأُنثَىٰ وَجَعَلْنَاكُمْ شُعُوبًا وَقَبَائِلَ لِتَعَارَفُوا﴾ [الحجرات: ١٣]
ئەڤ فەرمانا پیرۆز دیار دکەت کو تەڤڕەنگییا گەل و نەتەوەیان یاسایەکا خوداییە د گەردونی دا، و ل گۆرەی ڤی چەندێ، خەلکێ کوردستانێ وەکی هەر نەتەوەیەکێ دی یێ جیهانێ، خودانێ تەمامییا مافێن شەرعی، یاسایی و نێڤدەولەتییە بو هندێ چارەنڤیسێ خو دیار بکەت و سەربەخۆبونا خو ڕابگەهینیت.
ڕیفراندۆما ٢٥ێ ئیلۆنا ٢٠١٧ گوپیتکا قوربانیدان و تێکۆشانا دەهان ساڵین نەتەوەیەکێ بو کو ڕویبڕی تاوانێن وەکی ئەنفال، کیمیاباران، ڤەگوهاستن و ژناڤبرنێ ببویە. د وێ ڕۆژێ دا ب ڕێژەیا ٩٢.٧٣٪، خەلکێ کوردستانێ ب هەمی نەتەوە و ئاین و ئاینزایانڤە ب “بەلێ” بەرسڤا پرسیارا سەربەخۆبونێ دا. ئەڤ ڕێژەیا مەزن نیشانا کویراتییا وی هەستێ نیشتمانی بو کو د دلێ ئێک ب ئێکێن خەلک کوردستانێ دا هەبوو.
ئەڤ پرسا دیرۆکی، ب ڕابەرایەتی و ئیرادەیا پولایی یا سەرۆک مەسعود بارزانی برێڤەچو؛ کەسایەتییەک کو د دژوارترین دەمدا سەرکردایەتییا ڤێ بڕیارا نەتەوەیی کر و ڕوژدی ل مافێ ڕەوایێ خەلکێ خو کر د ناڤخوە و دەرڤە دا. سەرباری وێ چەندێ کو ڕیفراندۆم د وێ ڕۆژێ دا نەبوە ئەگەرێ ڕاگەهاندنا دەمودەست یا دەولەتێ ژ بەر هەڤسەنگییا ئالۆزا هێزێ و گەمارۆیێن هەرێمی و نێڤدەولەتی، لێ سەرکەفتانا ڕیفراندمومێ بەلگەنامەیەکا یاسایی و سیاسییە کو هەرگیز ب سەرڤە ناچیت و هێزا مانێ و شەرعییەتا هەمیشەیی یا خو هەیە.
ئەڤرۆ د نەهەمین سالڤەگەڕا وێ ڕۆژا مەزن و دیروکیدا دا، وانەیا سەرەکی بو مە ئەوە کو پاشەڕۆژا کوردستانێ ب ئێکڕێزی، پێکڤەژیان، حیکمەت، دانوستاندن و پاراستنا قەوارەیێ هەرێما کوردستانێ دهێتە مسۆگەرکرن.
٢٥ێ ئیلۆنێ دێمینیت وەکو دەنگ و چرایەکێ گەش و بەلگەنامەیەکا زیندی یا ئیرادەیا خەلکێ کوردستانێ د بیردانکا نەتەوەیی دا کو تەسلیمی زۆلمێ نەبویە و هەردەم پێنگاڤان بەرەڤ پاشەڕۆژەکا ئارام، سەربلند و پرشنگدار دێ هاڤێژیت.
