مه‌زهه‌ر محه‌مه‌د ساڵح، راوێژكاری دارایی عه‌لی زه‌یدی، سه‌رۆك وه‌زیرانی عێراق، ئه‌مڕۆ هه‌ینی، له لێدوانێكدا بۆ میدیای ره‌سمی عێراق، وتی “عێراق بەهۆی پاشەکشەی هەناردەی نەوتەوە، ڕوبەڕوی بۆشاییه‌كی دارایی دەبێتەوە کە مانگانە بە نزیکەی 9.5 ملیار دۆلار دەخەمڵێندرێت.”
ئاماژەی بەوەش کرد کە “وەزارەتی دارایی خه‌ریكی ئاماده‌كردنی پلانێکی فریاگوزاریی سێلایه‌نه‌یه کە قەرزی ناوخۆیی و دەرەکی لەخۆدەگرێت، له‌گه‌ڵ ڕێوشوێنەکان بۆ زیادکردنی داهاتە ناونەوتییەکان لە ڕێگەی باج و گومرگ و چاکسازییە داراییەکانەوە.”
به‌قسه‌ی مه‌زهه‌ر محه‌مه‌د ساڵح، “قەرزی ناوخۆیی چارەسەرێکی خێرا نیشان دەدات بۆ دابینکردنی موچە و پابەندییەكانی به‌كاربردن، بەڵام ڕەنگە ببێتە هۆی ڕاکێشانی نەختینە لە بانکەکان و بەرزبوونەوەی تێچوی پاره‌داركردنی ناوخۆیی و لاوازکردنی دابینکردنی دارایی بۆ کەرتی تایبەت.”
وتیشی”لە کاتێکدا قەرزی دەرەکی، پاره‌ی نه‌ختینه بە دۆلار دابین دەکات و تا ڕادەیەک سەقامگیریی نەختینەیی دەپارێزێت، بەڵام ئه‌مه‌ش گرێدراوه به چه‌ند مه‌رجێكی چاكسازی و زیادبونی بارگرانییەکانی خزمەتگوزاریی قەرزەکەوە.”
ئەوەشی خسته‌ڕو “زیادکردنی داهاتە نانەوتییەکان ستراتیژیترین بژاردەیە لەسەر ماوه‌ی مامناوەند و درێژخایەن، ئەویش لە ڕێگەی کۆنترۆڵکردنی دەروازە سنورییەکان و گومرگەکان، بەدیجیتاڵکردنی سیستمی باج، کەمکردنەوەی ئابوریی ناڕەسمی و باشترکردنی کۆکردنەوەی داهاتەکان بەبێ زیانگەیاندن بە چالاکییه ئابورییه‌كان.”
