هاووڵاتییەک لە گوندێکى سنوورى ئیدارەى سەربەخۆى سۆران هەردوو ژنەکەى بە چەک دەکوژێت و دواتر دەستگیر دەکرێت.
بەیانى ئەمڕۆ (29/تەمموز/2023) پیاوێک لە ئیدارەى سەربەخۆى سۆران، دوو ژنى خۆى بە بەرچاوى منداڵەکانییەوە کوشت و ڕاستەوخۆ دواى ڕووداوەکەش تۆمەتبارەکە لەلایەن پۆلیسەوە دەستگیر کراوە.
هێزە ئەمنییەکانى سنوورى سۆران سەرقاڵى لێکۆڵینەوەن و تاوەکو ئێستا هیچ ڕاگەیێندراوێکیان لە بارەى هۆکارى ڕووداوەکە بە دروستى بڵاونەکردۆتەوە.
تاوانبار خاوەنى حەوت منداڵە و لە کاتى کوشتنى ژنەکانی، بەشێک لە منداڵەکانى بە ئاگابوونەوە و لەبەرچاوى منداڵەکانى تاوانەکەى ئەنجامداوە.
بەپێى ئەو زانیارییانەى ماڵپەڕى رووداو بڵاویکردۆتەوە، تاوانبارەکە پێشتر کێشەى لەگەڵ ژنەکانى هەبووە و بەردەوام ئەشکەنجەی داون، چەندین جاریش هەوڵی داوە بیانسووتێنێت.
هاوکات وتەبێژی پۆلیسی سۆران رایگەیاند، تائێستا هیچ کەس سکاڵای لەسەر بکوژەکە تۆمار نەکردووە، دواتریش لە کۆنگرەیەکى ڕۆژنامەوانیدا وردەکاریى ڕووداوکە دەخەینەڕوو.
