حەیدەر عومەر
ریفراندۆم یادێکی مەزن و رۆژێکی پیرۆزە لەناو مێژووی کوردا، بۆیە پێویستە ئەم یادە پشگوێ نەخرێ و هەموودەم بەرز و بەنرخ رابگیرێ، پێنج ساڵ لەمەوبەر گەلی کوردستان بێ هیچ ترس و سڵەمینەوەیەک بەرەو سندوقەکانی دەنگدان بەڕێکەوتن و توانیان رۆژێکی زۆر مێژوویی تۆماربکەن.

لەرۆژی ٢٣مانگدا، دوو رۆژ پێش ئەنجامدانی ڕێفڕاندۆم، لە یاریگای هەولێر سەرۆک بارزانی بە چەند وتەیەکی یەکجار بەنرخ هەموومانی بە گیانی شۆڕشگێری و كوردایەتییەوە ورەبەرز کردەوە، کە فەرمووی: ( چیتر بڕیاری ئەنجامدانی ڕیفراندۆم لەدەستەڵاتی مندا نەماوە و کەوتۆتە دەستەڵاتی ئێوەوە). ئەوە لەکاتێکدا بوو، کە لە هەموو لایەکەوە پاڵەپەستۆی خرابووە سەر کە پاشگەزبێتەوە، بەڵام بارزانی وەک لە وتەیەکی تردا فەرمووی: ئامادە نیم خۆم شەرمەزاری گەلەکەم بکەم.

ئەنجامدانی ڕیفراندۆم لەگەڵ ئەوەی بوو بەهەواڵێکی جیهانی لە هەموو راگەیاندنەکانی دنیادا باسکرا و دەنگی دایەوە، هاوکات گیانێکی شۆڕشگێڕی نوێی کوردایەتی کرد بەبەرگی گەل و نیشتیماندا. سەرەڕای دەستی ڕەشی خیانەتکاری لەپشتەوە كە دوژمنی پەلکێشکردو چەندین رۆڵەی ئەم گەلەی کردە قوربانی و لەهەمان کات چەند ناوچەیەکی گرنگی کوردستانیان داگیرکردەوە، بەڵام لەئاکام دوژمنان لووتیان شکاو ڕیفراندۆم بووە راستی و واقیع و بەڵگەیەکی مێژوویی کە هەتا کورد مابێ وەک دیکۆمێنتێکی زێرین بەدەستییەوە دەبێ. ئەمەش تاکە ستراتیژییەتی ئەنجامدانی ڕیفراندۆم بوو کە میللەت بڕیاری خۆی بدات، نەک بۆ بەیانی و دەستەبەرکردنی دەستکەوت و ئامانجێکی ڕاستەوخۆی هەنووکەیی، بەڵکو بۆ هەتا هەتایە دەمێنێتەوە وهەر رۆژێکێش دەرفەت زیاتر هەبوو و دوژمنە جۆراوجۆرەکانی دەرەوە و ناوەوە بە گورزی میللەت توڕهەڵدارن ، ئەوکات بەم بەڵگەنامە یاسایی یە کورد دەتوانێت دەوڵەتی سەربەخۆ دروست بکات و ئەو وشە ئەڵماسییەی بارزانی لەناو دڵی هەموو کوردێکی بەشەرەفدا بمێنێ .((من خۆم شەرمەزاری میللەتی خۆم ناکەم)) سەرۆک مەسعود بارزانی بە دروستکردن و بڕیاردانی ڕیفراندۆم توانی پرسی سەربەخۆی گەلی کورد لە قۆناغی خەونی شاعیرانە و ترس و لەرزو ژێرزار و شەرمەوە بگوازێتەوە بۆ ورە و غیرەت و مەردایەتی و ئیرادە بەرزیی.

بارزانی توانی دنیایەکی نوێ و رۆژێکی نوێ و هیوایەکی نوێتر لەجاران بهێنێتە ناو واقیعی کوردستان و بزووتنەوی رزگاریخوازی کوردستان، هەر بۆیە پرسی ڕیفراندۆم چی پێش روودانی چی دوای روودانی و بۆ ئێستا و بۆ داهاتووش هەموو تاکێکی کوردی خستە بەردەم لێپرسینەوە و هەڵبژاردنێکی حەتمی، بەوەی بەرەی گەل و مێژوو یان بەرەی دژە گەل و خیانەت. واتە رێگەی سێیەم نییە، یان کوردێک و هاونێشتمانییەکی هەست بەلێپرسراوێتی و رەوشت بەرزی یان کوردێکی دۆراو و خۆفرۆش و راکردوو لە بەرپرسیارێتی. کە ئەو هەڵبژاردنە نەک هیچ پەیوەندی بە حیزبایەتییەوە نییە، بەڵکو پەیوەندی بەسیاسەتیشەوە نییە، واتە کاتێک تۆ بڕیاردەری؛ تەنیا وەک هاووڵاتیەک بۆ رۆژێکی خۆشتر و ژیانێکی باشتر بۆ خۆت و نەوەکانت و هاووڵاتیان وڵاتەکەت هەڵبژاردن دەکەی، نەک بۆ حیزب و ئینتیمای سیاسی و چوونە ناو بەرە و گروپ و دەستەی جودا جوداوە. سەربەخۆبوون مانای ئایدۆلژیای جودا و پەیرەو ستراتیژیەتی جوداوە نییە، ئەوەی لەگەڵیەتی پلەی هاونیشتمانییەکی باش وەردەگرێ، ئەوەشی لەگەڵی نەبوو یان لەگەڵی نییە پلەی هاونیشتیمانی بەکرێگیراو وەردەگرێ. چونکە ڕیفراندۆم میژووی هەموو خەباتی رزگاریخوازی کوردە بە هەموو قوربانییەکانییەوە، هاواری ئەنفال و کیماباران و راگواستن و هەموو زۆردارییەکانە لە هەر چوار پارچەی کوردستان.

ئەگەر تۆ دژی ریفراندۆم بی دژی هەموو ئەو مێژووەشی، بۆیەش مێژوو رەحم بەکەس ناکات، دژە ڕیفراندۆمەکان و ئەوانەی وڵاتیان تەسلیم بە داگیرکەران کرد ناویان بەشەرمەزاری نووسراوەتەوە لە مێژوودا، هەمێشە دەبنە عیبرەت و پەندی زەمانە بۆ نەوەکانی داهاتوو. سەرۆک مەسعود بارزانی و ئەوانەی پاڵپشتی بوون هەمیشە وەک قارەمانی مێژووی کورد تەماشا دەکرێن و بۆ سەدان ساڵی تر نەوەکانی داهاتوو شانازیان پێوەدەکەن و هەرگیز ڕێبازەکانیان بزرناکەن.