خه‌بات: سەلاح جەمیل سندی – زاخۆ:-
هونەرمەندێ جوانەمەرگ ئەردەوان زاخۆیی ناڤێ وی یێ تەمام ئەردەوان عەلی محەمەد ە ل رێكەفتی 1/7/1957ێ ل تاخێ جۆهییان ل باژێرێ زاخۆ هاتییە سەر دونیایێ و تاكو قۆناغا سەرەتاییێ خواندییە. ئەردەوان هەر ژ زارۆكینیا خۆ پتر ئەڤیندارێ هونەر و ستران گۆتنێ بوویە و زۆر حەز ژ خواندنێ نەكریە، هەر وەكو دایكا وی دبێژیت: ب هیچ ڕەنگەكێ من ل زارۆكینیێ ل ئەردەوانی نەدایە، بەلێ پتر شەڕێ من دگەل ئەردەوانی هەر دەم لسەر خواندن و قوتابخانا وی بوویە. ڤی هونەرمەندی ئێكەم كاسێتا خۆ ل رێكەفتی 23/2/ 1978ێ بەلاڤ كریە و گەلەك كاسێتێن دیژی بەلاڤكرینە و ل شوباتا سالا 1979ێ ژیانا هەڤژینیێ پێكئینایە و كچ و كوڕەك بناڤێ هۆزان و كۆڤان هەنە.ئەردەوانی هۆزانێن چەندین هۆزانڤانێن مەزن وەرگرتینە ژبۆ سازكرنا سروود و سترانێن خۆ ژوان ژی: خالص خەلیل، حكمەت مەلا یاسین، عەبدولعەزیز سلێمان، عەبدولعزیز خەیات، جەگەرخوین، كەمال رەمەزان ئاكرەیی، یوسف رەمەزان، عیسا بەنستانی، عەبدولرەحمان حاجی، بەدرخان سندی، سەبری بوتانی،…هتد.
دیسان ژی چەندین سروود و ستران ب دوو قۆلی دگەل هونەرمەند ئەیاز زاخۆیی گۆتینە. ئەردەوان ل سالا 1981 ێ دچیتە دناڤ رێزێن پێشمەرگەیێ كوردستانێ دا و دناڤ شۆڕەشێ دا تیپا شۆڕەش دگەل چەندین هەڤال و هونەرمەندێن دیتر دادمەزرینت. ئەردەوان پتر ب هونەرمەندەكێ سیاسی و شۆڕەشگێری دئێتە نیاسین و ئەو ژی ب ئەگەرا گۆتنا دەهان سروود و سترانان لسەر نیشتمان و كوردستان و بارزانی و پێشمەرگەی كو هندەك ژوان سروود و سترانان وەك كوردستان بارێ گران، باركەن ل وارێ مە هەڕن، كوردستانێ دەلالێ، كوردم كوردستان، دایكا كوردستان، بریندارم ژبەر تە وەلات، پێشمەرگە مە، دایێ ئەڤرۆ پێشمەرگەمە، بابۆ ـ بارزانیێ نەمر مە نەهێلە بێ خودان، دادێ ئەزێ بجەنگم، شۆڕەشڤانین رابووین، كوردم دخوینم، شورەش، ئەز بەرنادم خاكێ منە، و گەلەك سترانێن دی كو زۆر جاران لسەر ڤان سروود و سترانان دهاتە گرتن و روویهەڤی دائێرا ئەمنێ و توشی ئازار و ئەشكەنجێ دبوو، ژبەركو ئەڤان سروود و سترانان دەنگ و كارێگەرییەكا زۆر مەزن دناڤ جەماوەرێ كوردستانێ دا لسەر دەمێ شۆڕەشا گولانا پێشكەفتنخواز هەبوو بۆ سەر هەستا نەتەوایەتی و نیشتمانی ژبەركو ئەڤان سروودا و سترانان گەلەك گەنج و خورتێن كورد هانددا كو بچنە دناڤ شۆڕەشێ و ببنە پێشمەرگە و هندەكان ژوان ژی ب ئێكجاری بریارددان خەبات و خزمەتا گەل و پێشمەرگەیێ خۆ بكەن و هەروەسان ژی دەهان گەنج و لاوێن كورد ژی ب ئەگەرا گوهدانا ڤان سروود و سترانێن نیشتمانی دهاتنە گرتن و ئازاردان و سێدارەدان و شەهید كرن.هەر وەكو عەبدولعەزیز سلێمان كو ئێك ژوان هونەرمەندانە كو زۆر ل ئەردەوانی نێزیك بوو و هۆزان و ئاوازێن چەندین سترانان بوو وی داناینە دبێژیت: ئەردەوان كورد پەروەر بوو، پێشمەرگە بوو، ب بێ ترس سروود و ستران دگۆتن، دەما كو دچوو سەر دەپێ شانۆیێ هندەك ژ كوردێن خۆفرۆش و بەعسی دگۆتنێ: نەكو ناڤێ كوردستانێ ب ئێنی! بەلێ ئەوی گۆهێ خۆ نە ددا وان و ئێكسەر ناڤێ كوردستانێ و بارزانی و پێشمەرگەی دئینا، زۆر جاران ژی لسەر دەپێ شانۆیێ دئیناتنە خارێ و دبرنە بۆ دائیرا ئەمنێ و ئازار ددان، حزبا بەعس زۆر حساب بۆ ئەڤی هونەرمەندێ مەزن و دیار دكر و زۆر جاران ژی ژێ دترسان و د ئاهەنگ و هەلكەفتاندا چاڤدێری و دیڤچوونەكا توند لێ دهاتە كرن كا دێ چ جۆرە سروود و سترانان بێژیت؟.
هەروەسان ژی هونەرمەندێ موزیكژەن سەباح زاخۆیی ژی كو ئێك ژ هەڤالێن هەری نێزیكی ڤی هونەرمەندنێ مەزن بوو دبێژیت: ئەز گەلەك جاران دناڤ هۆلا ئاهەنگێ دا ژ ترسان دلەرزیم و من دگۆت نەكو بەعسی مە بگرن ژبەركو ئەوان گەلەك دیڤچوون و چاڤدێرییا هونەرمەند ئەردەوان زاخۆیی و سترانێن وی دكرن و گەلەك جاران ئەم ب زۆری و كوتەكی ژ دەستێن بەعسیان رزگار دبوون، و جارەكێ ئەز كەفتمە ددەستێ واندا جەماوەرێ ئەردەوانی ب كوتەكی ئەز ژ دەستێ وان بەعسیێن دڕندە رزگار كرم ئەردەوان هونەرمەندەكێ هەمیشە خودان هەلویست و ئازا و چاڤ نەترس بوو، لەورا رژێما بەعس بەردەوام دیڤچوون و چاڤدێریەكا توند و هویر ل وی دكر، ئەو بوو ل شەڤە زڤستانەكا باژێرێ بەغدا كو دكرە 26/1/1986ێ، بەشداری دیادا دامەزراندنا ئێزگێ كوردی ل بەغدا دبیت و چەندین سترانێن سیاسی و شۆرەشگێری دبێژیت و بێ كو هیچ هزرەكێ بۆ بەعسیان بكەت بەلێ پشتی ژ ئاهەنگێ ب دوماهیك دئێتن و دچیتە هۆتێلا ئەغادیر و لوێرێ ب مخابنیڤە ژئالیێ كاربەدەستێن ئەمنا بەعسی ڤە دئێتە گرتن و بنچاڤكرن و هەتا نۆكە ژی بێ سەروشوێن و هندایە.
