خه‌بات: سەرهەنگ نەجمەدین:-
لەگەڕی سێزدەی خولی نایابی كوردستان چەندین یاری گرینگ بەرێوەچوو،لەگرینگترین یاریشدا هەردوو دێربی دهۆك و هەولێر لەیاریگای نێودەوڵەتی دهۆك بەرێوەچوو، یارییەكە لەكەش وهەوایەكی ساردا ئەنجام درا، بەهۆی زۆر باران بارین هەموو یاریگاكە پڕ ئاوبوو، یاریزانەكان بەشێویەكی باش نەیاندەتوانی كۆنترۆلی تۆپ بكەن لەنێو یاریگا، بەڵام یارییەكە بەرێوەچوو، یارییەكەبەیەكسانبوونی هەردوولا بەدوو گۆڵ كۆتایی هات و هەردوو تیپ خاڵێكی یارییەكەی بەركەوت.
لەگێمی یەكەمی یارییەكە هەردوولا بەشێوەیەكی مامناوەندی دەركەوتن بەتایبەتی كەش وهەوا زۆر ساردو باراناوی بوو،یاریزانان بەئاسانی نەیاندەتوانی تۆپ بۆ یەكتر بەئاسانی ئاراستە بكەن، بەڵام زۆری نەبرد و هەر لەخولەكی 13دا بارزان شێرزاد لەلێدانێكی راستەوخۆدا توانی گۆڵی یەكەم بۆ هەولێر تۆمار بكات و هەولێری بەگۆڵێك پێشخست، دوای ئەم گۆڵە یاریزانی هەولێر پاڵەپەستۆیەكی تەوایان كردبووە سەر گۆڵی خاوەن یاریگا تا گۆڵی دووەمیش تۆمار بكەن، ئەوەبوو لەخولەكی 37دا یاریزان دانا عوسمان توانی گۆڵی دووەم و متمانە بۆ هەولێر تۆمار بكات و تیپی بەرانبەری بەیەكجاری بێدەنگ كرد،بەڵام لەگێمی دووەم یارییەكە پێچەوانەوە بوو، هەردوو یاریزانی یانەی دهۆك سیامەند عەگیل وخالید موشیر توانیان گۆڵی یەكەم ودووەم لەهەولێر تۆمار بكەن،ئەگەرچی گۆڵی خالید موشیر لەكاتی زیادكراودا تۆمار كرا، بەمشێوەیە یارییەكە بەیەكسانبوونی هەردوولا بەدوو گۆڵ كۆتایی هات و هەریەكەو خاڵێكی یارییەكەیان بەركەوت.
لەیاری دووەمیشدا لەیاریگای برایەتی ، هەردوو یانەی برایەتی و پێشمەرگەی هەولێر ڕووبەرووی یەكتربووەنەوە، یارییەكە بەیەكسانبوونی هەردوولا بەبێ گۆڵ كۆتایی هات و هەردوویانە بەخاڵێكی یارییەكە رازی بوون، بەم ئەنجامە برایەتی كۆی خاڵەكانی بوو بە16 خاڵ لەپلەی هەشتەمدا دەبیندرێت ، لەبەرانبەردا یانەی پێشمەرگەی هەولێر بەم ئەنجامە كۆی خاڵەكانی بوو بە19 خاڵ بەجیاوازی گۆڵ لەگەڵ نەورۆز لەپلەی سێیەمی رێزبەندی خولەكەدا جێگیربووە،هەروەها لەیاری سێیەمدا لەیاریگای پێشمەرگەی سلێمانی ، هەندرێن بووە میوانی یانەی پێشمەرگەی سلێمانی، یارییەكە لەبەرژەوەندی تیپی میوان بەئەنجامی 3-0گۆڵ كۆتایی هات ، یانەی هەندرێن بەم یارییە سێیەم سەركەوتنی لەخولەكە لەسەردەستی پێشمەرگەی سلێمانی دەستەبەركرد، بەم بردنەوەیە هەندرێن كۆی خاڵەكانی بوو بە15 خاڵ و لەپلەی نۆیەمدایە، لەبەرانبەردا پێشمەرگەی سلێمانی بەكۆكردنەوەی 7 خاڵ لەدواهەمین رێزبەندی خولەكەدا دەبیندرێت.
ئەنجامی یارییەكانی دیكە بەمشێوەیە بوو:
زێرەڤانی 2* سۆران 0
شێروانە 0* زاخۆ 0
