خه‌بات: د.كەیفی ئەحمەد – كۆیە –
لە هۆڵی سەنتەری چالاكی گەنجانی كۆیە، گرووپی شانۆی سەنتەری چالاكی گەنجانی كۆیە، سەربە منداڵپارێزی كوردستان، مۆنۆدرامای ئازارەكانی ئەودیو پەنجەرەیەكی نمایش كرد، دەقەكە لە نووسینی شوان كەریم،بوو، كە دەقێكی جوان و خاوەن پەیام و ئاماژە و واقیعی بوو، ئەو جۆرە دەقانە خوێندنەوە و كاری هەمەلایەن و لێكدانەوەی زۆر هەڵدەگرن، كە لە كات و شوێن و سەردەمی جودا جودا دەتوانرێت بە چەندین شێوازی و ئاراستەی جیاواز كاری دەرهێنان و بە هونەری كردنی بۆ بكرێت.
هەروەها لە دەرهێنانی شیاو شۆڕش، نواندنی محەمەد كەمال، دیكۆر رێبین محەمەد دەنگ و رووناكی ئەحمەد ئازا، بەڕیوەبەری شانۆ مەبەست عوبێد ، بەڕێوەبەری هونەریی هەرژین كاوانیبوو. مایەی دڵخۆشییە، كە كۆمەڵە گەنجێكی خوێن گەرم بە عیشق و گەرموگوڕییەوە هاتوونەتە نێو دونیای هونەری شانۆ و دەیانەوێت لە میانەی ئەو هونەرەوە پەیام و تواناكانی خۆیان بۆ خەڵكی ئاراستە بكەن و خۆیان بسەلمێنن، دیارە بەڕێوەبەری سەنتەریشكاك ئەمیر بابان هەر ئاماژەی بۆ ئەوە كرد كە هەموو مەبەست و هەوڵێكی ئەوان رەخساندنی بوار و كەشێكی لەبارە بۆ گەنجانی شارەكە، بۆ ئەوەی بتوانن وزە و توانا و داهێنانەكانی خۆیان پیشانی خەڵكی بدەن. نمایشی كاری شانۆیی بریتییە لە بەهونەری كردنی دەقێكی ئەدەبی بەهۆی جەستە و دیالۆگ و ئاماژە و خولقاندنی كەشێكی داهێنەرانەی پڕ لە چێژ و جوانی لە میانەی تەكنیكەكانی شانۆدا، دیارە زۆر ئاساییە كە دەقێكی شانۆیی كە نووسەرێك دەینووسێت، بۆ چەندین جار و لە چەندین شوێن و لەلایەن چەندین دەرهێنەری جودا جودا بە روئیا و خوێندنەوە و تێگەیشتن و لێكدانەوەی خۆیان بەگونجاندنی لەگەڵ سەردەم و ژینگە و شوێندا، بە تەوزیفكردن و خستنەسەری ئەو تێگەیشتنە تایبەتەی خۆی نمایشی بكات، بەجۆرێك نمایشەكەی لە نمایشی پێشوو نەچێت، لەگەڵ لانەدان لە هێڵ و تەوەر و بیری بنەرەتی دەقەكە، نەك دەرهێنەرێك بێت، نمایشە تۆماركراوەكەی دەرهێنەرانی پێشوو ببینێت و دەقاو دەق دووبارەی بكاتەوە، هەر لە نواندن و دیكۆر و كەشی شانۆیی و رووناكی و ئێكسسوار و…تاد.
ئێ باشە خۆ هەموومان دەتوانین بچین ئەو تۆمارە پەیدا بكەین و كارەكە ببینین، ئەوەی من لەو نمایشەدا بینیم بەو شێوەیە بوو، كە پێشتر ئەو دەقە نمایشكراوی و تۆمار كراوە و لە یوتوب بڵاوكراوەتەوە، ئەو گروپەش، كارەكەیان دەقاودەق بەبێ هیچ خستنەسەر و داهێنانێك دووبارەیان كردەوە، بەڵام بە ئاستێكی زۆر نزمتر و خرابتر كە لە ئاستی دەقەكەشی هێنابووە خوارەوەو پەیامی نووسەریشی كوشتبوو، بەهۆی خراپی ئاستی نواندن و رەگەز و تەكنیكەكانی دیكەی شانۆیی…بۆیە من نامەوێت لەوە زیاتر قسەی لەسەر بكەم، چونكە مایەی قسەی زیاتر نییە، بەڵام ئەوە دەڵێم كە خۆزگە لە بری مۆنۆدراما كارێكی شانۆییان نمایش بكردایە، چونكە مۆنۆدراما كارێكی یەكجار سەختە چ لەرووی دەرهێنان چ لەڕووی نواندن، ئەوان كە لە سەرەتای رێگادان ، دەرەقەتی ئەو كارە سەختە نایەن، بۆ ئەوەی سەرەتا هەنگاویان بنابایە و هەنگاو بە هەنگاو بەسەر پلیكانەكەدا سەر بكەوتنایە، نەك لە پلیكانەی یەكەم باز بۆ دەیەم بدەن، من ئەوە ناشارمەوە كە توانا و هێز و داهێنان لەو كۆمەڵە گەنجە بەدی دەكەم، بەڵام نابێت پەلە بكەن و دەبێت وردە وردە هەنگاو بنێن، تا هەنگاوی یەكەم نەچسپێت و لێی دڵنیا نەبن با هەنگاوی دووەم نەنێن. خۆشیان بەدوور بگرن لە لاساییكردنەوەی دەقاودەقی، با سوود لە خەڵكی پێش خۆیان وەربگرن، بەڵام باخۆیان بن و دووركەونەوە لە لاسایی كوێرانە و كتومت، چونكە ئەوە خزمەت بە داهاتوویان ناكات، هیوادارم بەردەوام بن و لە كارەكانی داهاتوویان بیر لەو شتانە بكەنەوە و كاری جوانتر نمایش بكەن، با كارەكان لە سادەوە بۆ قورس و ئاڵۆز ریزبكەن بۆ پێشەوە، نەك لە ناوەڕاستەوە دەستپێبكەن. ماندوو نەبن و چاوەڕێی كاری جوانترتانم لە داهاتوودا.
