خه‌بات: رەمزی میرەكانی -
ئەستێرەی ئینگلیزی واین رۆنی، هێرشبەری یانەی دی سی یونایتدی ئەمریكی دانی بەوەنا، سەری لە ئاستی یاریزانانی خولی ئەمریكا سوڕماوە، ئەوكاتەی پەیوەندی بە ریزەكانی یانە تازەكەی كردووە. ئەمەو رۆنی توانی پێشەوایەتی دی سی یونایتد بكات، بگاتە پاڵاوتنەكانی كۆتایی، كە پێش ئەوەی بچێتە ئەمریكا كێشەی هەبوو. رۆنی یاریزانی پێشووی مانچستەر یونایتد و ئێڤرتۆن، لە میانی لێدوانی بۆ ئێزگەی بی بی سی بەرتیانی وتی:”پێش ئەوە بێمە ئێرە، دەمزانی خولی ئەمریكا پشت بە هێزی جەستەیی دەبەستێت”. وتیشی:” وابزانم توانای تیپەكان لە خولی ئەمریكا و توانای تاكەكەسی یاریزانەكان، زۆر لەوە بەرزترە، كە پێش ئەوەی بیبینم پێشبینیم دەكرد”. هەروەها وتی:”هەفتەكانی داهاتوو ورووژان و ركابەرییەكی گەورەتر بەخۆوەی دەبینێت، كاتێك یارییەكانی پاڵاوتنی كۆتایی دەستپێدەكات”. ئەوەشی وت:”من لێرە چێژ وەردەگرم، وابزانم تیپەكەمان بە شێوەیەكی باش یاری دەكات، ئاستێكی باشیش پێشكەش دەكات، بۆیە هیواخوازین لەسەر ئەمە بەردەوام بێت”. رونی وتیشی:”بە پێچەوانەی بۆچوونی هەندێ كەس، شتەكە زۆر جیاوازە، نەوەكو هاوشێوەی گومانی هەندێ كەس، گوایە من بۆ پشوودان دەچمە ئەمریكا”. لە كۆتاییدا وتی:”فشار لە هەموو یارییەكدا هەیە، منیش چێژ لەو فشارانە وەردەگرم، دەمەوێ یارمەتی تیپەكەم بدەم پاڵاوتنەكان ببڕێت، هیوا خوازین لە هەفتەكانی داهاتوودا، سەركەوتنی زیاتر بەدەست بێنین”.
