خه‌بات: راگەیاندنی وەزارەتی شارەوانی و گەشتوگوزار:-
كاتێك دەگەیتە بەردەم بەڕێوەبەرایەتیی وەرشەی ناوەندی هەولێر، تابلۆیەكی بچووك سەرنجت رادەكێشێت، بەڵام كە تابلۆكە بە ئاڕاستەی ناوەوەی بەڕێوەبەرایەتییەكە جێدەهێڵیت و پێدەنێیتە ژوور و هۆڵە گەورەكان، ئیدی چاوت بە دونیایەكی جیاوازتر دەكەوێت! لە هەموو لایەكەوە دەنگی ئامێر و چەكووشەكان دەبیستیت و جوڵەی كارمەندەكان دەبینیت. چەندان هۆڵی گەورە و هەزاران ئامێری شكاو و ماتۆڕی لەكاركەوتوو و غەتاس و غەنزیرە و مۆلیدەی كارەبایی و قوفڵی ئاو و شەفت و پەمپ و سەدان جۆری دیكەش لە كەلوپەلی قورس و بچووك پێناسەی شوێنەكەت بۆ دەكەن، دەكرێ ناوی بنێین شوێنی بووژانەوەی دڵی ئامێرەكان!
لەوێ چی دەگوزەرێت
بەڕێوەبەرایەتیی وەرشەی ناوەندی هەولێر سەر بە بەڕێوەبەرایەتیی گشتیی ئاو و ئاوەڕۆی وەزارەتی شارەوانی و گەشتوگوزاری حكوومەتی هەرێمی كوردستانە، ئەگەرچی شوێنی بەڕێوەبەرایەتییەكە لە هەولێری پایتەختی هەرێمی كوردستانە، بەڵام راستەوخۆ كۆنتاكتی لەگەڵ سەرجەم شار و شارۆچكە و دەڤەرەكانی هەرێمی كوردستاندا هەیە، ئەو دەزگا گرنگە بەوەی خزمەتی فەرمانگەكان دەكات، بە بووژانەوەی دڵی ئامێر و ماتۆڕە كارەباییەكانی بیری ئیرتیوازی و چاككردنەوەی پەمپ و شەفت و قوفڵی گەورەی ئاو و مۆلیدە و غەتاس و بووش و چەگ وەلف و دەیان جۆری دیكەی ئامێرەكان كە راستەوخۆ پەیوەندییان بە پێشكەشكردنی خزمەتگوزارییەكانی وەزارەتی شارەوانی و گەشتوگوزارەوە هەیە بۆ هاووڵاتییان، هەر كە سەردانی ئەو شوێنە دەكەیت، ئەوكات باشتر دەزانی لەوێ چی دەگوزەرێت.
بەیانییەكی زوو بێ ئاگاداركردنەوەی پێشوەختەی كارمەندانی وەرشەكە، تیمێكی بەڕێوەبەرایەتیی راگەیاندنی وەزارەتی شارەوانی لەسەر فەرمانی ساسان عەونی وەزیری شارەوانی و گەشتوگوزار خۆیان دەكەن بە بەڕێوەبەرایەتییەكە و بۆ یەكەمجار چاوی میدیا دەكەوێتە سەر شوێنی بووژانەوەی دڵی ئامێرەكان، كارمەندان و بەڕێوەبەری وەرشەكە دڵخۆشبوون بەوەی ئیدی ئەوان چاوی میدیاكانیان كەوتە سەر، لەناو دەنگی ئامێر و چەكووش و تۆڕنە و جۆرەكانی دیكەی ئامێرەكان، بیرۆكەی ئەو راپۆرتە مەیدانییە دروست بوو، كە دەكرێت چاوی زیاتری بكەوێتە سەر.
وەرشەكە چەندین بەشی هەیە
وەرشەكە لە ساڵی 2004 لەلایەن كۆمپانیایەك بەشێوەی گرێبەست لەگەڵ حكوومەتی هەرێمی كوردستان دامەزراوە، جگە لە بەشەكانی كارگێڕی و ژمێریاری، ئای تی، كۆگا و هونەری، هاوكات بەشەكانی لەف، چاككردنەوەی پەمپ، لەحیمكردن، چاككردنەوەی ئامێرەكان، داڕشتنی قاڵب و كارەباشی هەیە، تەواوی بەشەكانی ئەو دەزگایە لەلایەن كەمتر لە 100 فەرمانبەرەوە بەڕێوە دەبرێن، ئەوان داوای زیادكردنی بوودجەكەیان دەكەن تا بتوانن كاری باشتر بكەن بۆ بووژانەوەی دڵی ئامێرەكان.
سەرجەم ناوچەكان رووی تێدەكەن
ئەگەرچی لەسەر تابلۆكەیان هەولێر نووسراوە، بەڵام ئەوان دەڵێن ئێمە كار بۆ سەرجەم بەڕێوەبەرایەتییەكان دەكەین لە هەموو شار و ناحیە و گوندەكانیش، وەك پڕۆژەكانی بەڕێوەبەرایەتیی ئاوی هەولێر و ئاوی دەوروبەری هەولێر، ئاوی سۆران، ئاوی كۆیە، بەڕێوەبەرایەتیی ئاوی دهۆك، ئاوی دەوروبەری دهۆك وەك شێخان، سمێل، ئامێدی، ئاكرێ، كەڵەك و هەروەها بەڕێوەبەرایەتیی ئاوی سلێمانی و كەلار و زۆرجاریش لە سنوورەكانی ماددەی 140ـشەوە ئامێری لەكاركەوتوو بەكار دەخەنەوە.
چی چاك دەكەنەوە؟
ئەو بەڕێوەبەرایەتییە لە هەولێرەوە كار بۆ خزمەتكردنی خەڵكی كوردستان دەكات بە لەفكردنی ماتۆڕی كارەبایی، چاككردنەوەی پەمپ (بوستر)، چاككردنەوەی جەگ وەلف بە هەموو قەبارە و جۆرەكانی بە دووبارە بەكارهێنانەوەی ئامێرە شكاوە قورسەكان، هەروەها چاككردنەوەی قاعیدەی سێت پەمپ و ماتۆڕ و چاككردنەوەی مۆلیدەی كارەبایی وەك مەكینە و تەولید و بۆرد كۆنتڕۆڵ، چاككردنەوەی ئۆتۆمبێل و ئامێرەكانی وەرشەكە، چاككردنەوەی ئامێری ئاوەڕۆ كە گرنگییەكی زۆریان هەیە لە بواری خزمەتگوزارییە گشتییەكان، هەروەها چاككردنەوەی ماتۆڕ و ترۆمپای كلۆر و غەنزیرەی ئاوی قورس و گێڕبۆكس و دروستكردنی دیشلی جۆراوجۆر كە هەر یەك لەمانە گرنگی تایبەتیان هەیە لە سێكتەرەكانی خزمەتگوزاری وەزارەتی شارەوانی.
ئاماری دوو ساڵەی كارەكانیان
قەیرانی دارایی كاریگەری لەسەر ئەوانیش هەبووە، بەڵام بەردەوام بوونە لە كاركردن، تەنیا لە ساڵی 2018دا، 55 ماتۆڕی كارەبایی و 5 دانەش لە غەتاسی ئاوی قورس، 15 دانە پەمپی غەنزیرە، 94 دانە لە بووش برانس و قوفڵی ئاو و جەگ و وەلف و 2 دانە مولیدەش چاككراونەتەوە.
لە ساڵی 2019شدا، واتە لە 10 مانگی رابردوودا زیاتر لە 23 ئامێری ماتۆڕی كارەبایی و غەتاسی ئاوی قورس، هەروەها 24 دانەش لە پەمپی غەنزیرە و 83 قوفڵی ئاو و شەفت و جەگ وەلف و كۆپلین و 3 دانە مۆلیدەش چاكراونەتەوە. كارمەندانی وەرشەكە دەڵێن، ئەگەر حكوومەت بوودجەی زیاتریان بۆ دابینبكات، كاری زیاتر دەكرێت.
