خەبات: سەفەر یوسف میرخان ژاژوكی:-
ماموستا فەلەكەدین كاكەیی خەباتكارێكی ماندوونەناسی رێگای رزگاری كوردستان بوو، رۆشنبیرێكی مەزنی هەمیشە لە سەنگەری گەل، رۆژنامەنووسێكی بلیمەت و قوتابخانە بۆ نەوەكانی ئەمڕۆ بوو. داكۆكیكارێكی گەورە بوو لە ئازادی و پێكەوەژیان و بیری رۆشنی دیموكراتی، كەسایەتییەكی كوردستانی و خۆشەویست و جێگای رێزی هەموو لایەك بوو، سیاسەتوانێكی بە حیكمەت و قاڵبووی ژیانی پێشمەرگایەتی بوو، روناكبیر و نووسەر و ئەدیبێكی هەمیشە بەبەرهەم و بە بڕشت بوو، هاوسۆز و هاو ئاراستەبوو لەگەڵ بیری مرۆڤایەتی و پێشكەوتنی كۆمەڵایەتی، خزمەتكارێكی هەمیشە بەخەمی كولتور و هونەر و ئەدەب و رۆژنامەگەریی كوردستان بوو. لە دەستچوونی مامۆستا فەلەكەدین وشكبوونی ناوادەی كانییەكی هەمیشە هەڵقوڵاو بوو، لە دەستدانی مرۆڤێكی كەم وێنە بوو، زیانێكی گەورە بوو بە هەموو كایەكانی كولتوور و رۆشنبیری كوردستان گەیشت.
ژیان و خەباتی فەلەكەدین كاكەیی
فەلەكەدین سابیر كاكەیی ناسراو بە فەلەكەدین كاكەیی لە ساڵی 1943 لە دایك بووە و نووسەر و رۆژنامەنووس بووە لە سەرەتای ساڵی 1957 - 1959 دەستی بە چالاكی قوتابی و لاوان كردووە.
لە ساڵی 1964 دەستی كردووە بە نووسینی رۆژنامەنووسی بە زمانی عەرەبی و لە ساڵی 1967 لە بەغدا، رۆمانی بیتاقەی یانسیبی چاپكردووە و چەندین چیرۆكی بە زمانی كوردی و عەرەبی نووسیوە، سەرباری وتارگەلێكی ئەدەبی و وەرگێڕان لە كوردی بۆ عەرەبی و بە پێچەوانەوە.
فەلەكەدین كاكەیی لە نیسانی 1967 گۆڕانكارییەكی لە ژیانی نووسینیدا بەسەر دا دێت و دەچێتە ریز پەیامنێران و نووسەرانی رۆژنامەی ئەلتەئاخی ، كە رۆژانە بە زمانی عەرەبی لە بەغدا دەردەچوو، كە تا ئەمڕۆش بەردەوامە، وەك پەیامنێر و نووسەر لە ئەلتەئاخی كاری كردووە، دواتر بۆتە نووسەرێكی جێگیر و نووسەری لاپەڕەكان و بەڕێوەبەری نووسین .
لە 2003 بۆتە سەرنووسەر و ئێستاش خاوەن ئیمتیازیەتی هەروەك سەرنووسەری چەندین رۆژنامە و گۆڤاری دیكەی بە كوردی و عەرەبی بووە، چ لە شار یان شاخ لە كاتی بەرگریدا.
لە ساڵی 1974 بۆتە بەڕێوەبەری راگەیاندن لە ناو شۆڕش و بە پڕاكتیك بۆتە سەرنووسەری ئێزگەی دەنگی كوردستان، واتە لە ساڵی 1974ەوە تا 1994 بە بەردەوامی سەرپەرشتی كردووە، واتە بە درێژایی 20 ساڵ بێ پچڕانەوە مەگەر بە هۆی وەستانی ئێزگەوە ، كە هەندێك جار رادەوەستا.
فەلەكەدین كاكەیی لە ساڵی 1980 تا1991 بە پڕاكتیك سەرنووسەری رۆژنامەی خەبات بوو، كە بە نهێنی لە شاخ دەردەچوو، لە نێوان ساڵانی 1993 -2001 بە سەرنووسەری خەبات، كە دامەزرا و هەفتانە ژمارەیەكی لێ دەردەچوو، بە درێژایی ساڵانی 1960 -1974 رۆڵی هەبووە لە چالاكییەكانی سەندیكا، جەماوەری و جوتیارییەكان و كرێكارییەكاندا.
لە ساڵی 1979 بە ئەندامی لێژنەی ناوەندی پارتی دیموكراتی كوردستان هەڵبژێردراوە، دواتر بۆتە ئەندامی مەكتەبی سیاسیی لە هەمان ساڵدا و تا ئێستاش لە ناو سەركردایەتی حزبدا ماوە.
لە 1992 لە یەكەمین خولی پەرلەمانی كوردستان بە ئەندامی ئەنجوومەنی نیشتمانی كوردستان هەڵبژێردراوە.
لە ساڵی 1996 بوو بە وەزیری رۆشنبیری حكوومەتی هەرێمی كوردستان، لە 2006 دووبارە هەڵبژێردرایەوە بە وەزیری رۆشنبیری.
لە ساڵی 1992 تا 2005 ئەندام پەرلەمان بووە، ئەندامی چەندین یەكێتی و رێكخراوی رۆشنبیری نووسەران و رۆژنامەنووسان بووە.
هاوكات ئەندامی یەكێتی پەرلەمانتارانی كوردستان و سەرۆكی كۆمەڵەی برایەتی كورد و تورك بوو، بەشداری لە ژمارەیەكی زۆری كۆنگرەی ناوخۆیی و نێودەوڵەتی كردووە بە تایبەتی پەیوەست بە ئۆپۆزسیۆنی عێراقی لە ساڵی 1985 ەوە تا گۆڕانی رەوشی عێراق. دەیان نامیلكە و كتێبی بە هەردوو زمانی عەرەبی و كوردی داناوە.
رۆژی31/7/2013 فەلەكەددین كاكەیی سیاسەتوان و بیرمەندی ناسراوی كوردستان و ئەندامی پێشووی سەركردایەتی پارتی دیموكراتی كوردستان لە هاوینەهەواری سەڵاحەددین كۆچی دوایی كرد.
خوالێخۆشبووفەلەكەدین كاكەیی نموونەی پێشمەرگەی روژانی تەنگانە بۆ كوردایەتی، نمونەی سەركردەی پارتی دیموكراتی كوردستان، ئەستێرەیەكی راستەقینەی رێبازی بارزانیی نەمر كە هەر لە تەمەنی لاوێتییەوە تاكو دوا ساتەكانی تەمەنی بەردەوام لە خەبات و خزمەت دا بوو.
مامۆستا فەلەكەدین كاكەیی مرۆڤێكی شۆڕشكێر بووە و عاشقی رێگای بارزانیی نەمر بووە، مامۆستا فەلەكەدین نوسەر و رۆشنبیری هەستكردن بە ئازارەكانی كوردستان ،كەسێك كە هەموو تەمەنی خۆی بۆ خەباتی سیاسی و پێشمەرگایەتی لە رۆژانی سەخت تاكو كۆچی تەرخان كرد،مامۆستا فەلەكەدین نمونە مرۆڤێكی نەرم و نیان و سەبر و تەحمول،نمونە پێشمەرگەی روژانی تەنگانە بۆ كوردایەتی، نمونە سەركردەی پارتی دیموكراتی كوردستان، نمونە نوسەرێكی سەركەوتو و نمونە رووناكبیری كوردستان، نمونە تێكۆشەرەك كە هەمیشە لە گەڵ ئیش و ئازارەكانی خەلكی كوردستان بووە، هەمیشە خۆشەویستی سەركردایەتی پارتی بووە ،مامۆستا فەلەكەدین كاكەیی قارەمانی رۆژانی سەختی تەنگانە بوو لە رۆژ و قۆناغەكانی سەخت چ لە شۆڕشی مەزنی ئەیلووول چ لە شۆڕشی گوڵانی پێشكەوتنخوزا، كەسێكی متمانە و باوڕپێكراوی نزیك شەهیدی هەمیشەلە یاد ئیدریس بارزانی و جەنابی سەرۆك مسعود بارزانی بووە، مرۆڤێك بوو كە تەنها ئامانجەكانی بیروباوری رێگای بارزانیی نەمربووە،هەمیشە پەیوەندی لە گەڵ نوسەران و رۆشنبیران و رۆژنامەنوسەكان دۆستانە بووە.
سەرۆك بارزانی: ڕۆڵی گەورەی فەلەكەدین كاكەیی لە شۆڕشی مەزنی ئەیلوول، وەك پێشمەرگە و سیاسەتمەدار و وەك ڕۆشنبیر و میدیاكار لە لاپەڕە زێڕینەكانی مێژووی گەلەكەماندا تۆمار دەكرێت.
بەڕێز جەنابی سەرۆك مسعود بارزانی، لە ماتەمینی خۆی بۆ كۆچی دوایی نووسەر و سیاسەتمەداری كورد فەلەكەدین كاكەیی نووسیبووی: ئەو پیاوە هەڵكەوتووەی گەلەكەمان، بە درێژایی تەمەنی خۆی لە پێناو نەتەوەكەیدا لە خەبات و تێكۆشاندا بوو، ڕۆڵی گەورەی ئەو لە شۆڕشی مەزنی ئەیلوول، وەك پێشمەرگە و سیاسەتمەدار و وەك ڕۆشنبیر و میدیاكار لە لاپەڕە زێڕینەكانی مێژووی گەلەكەماندا تۆمار دەكرێت.
لەو ڕۆژانەدا كە بە ئاگر و ئاسن هەوڵی بێدەنگكردنی كورد دەدرا، جێ پەنجەی فەلەكەدین كاكەیی لە ڕۆژنامەكانی التاخی و خەباتدا بۆ گەیاندنی پەیامی كورد، زۆر دیار و بەرچاو بوو.
كاك فەلەكەدین وەك ڕۆڵەیەكی هەڵكەوتووی برایانی كاكەیی، لە شۆڕشی گوڵانیشدا بەشدارییەكی چالاك و كاریگەری هەبوو. دوای ڕاپەڕینە مەزنەكەی گەلەكەشمان، كاك فەلەكەدین وەك ئەندامی خولی یەكەمی پەرلەمان و دواتر وەك وەزیری ڕۆشنبیری و وەك سیاسەتمەدار و ڕۆشنبیرێكی گەورە خزمەتی دۆزی ڕەوای گەلەكەی كردووە. بە درێژایی ساڵانی ڕابردوویش ڕاوێژكارێكی متمانە پێكراوی ئێمە بوو و بەشدارییەكی گرینگی لە دروستكردنی بڕیاری سیاسی لە كوردستان هەبووە.
لە دەستدانی ئەو ڕۆشنبیر و تێكۆشەرە ناودارەی گەلەكەمان، خەسارەتێكی گەورەیە.
نێچیرڤان بارزانی: فەلەكەدین كاكەیی ڕۆشنبیرییەكی زۆر فراوانی هەبوو، ئامانجەكانی هەمیشە زۆر گەورەتر بوون لە ئارەزووی شەخسی، كاركردنیشی زۆر فراوان و ماندوونەناسانە بوو.
بەرێز نێچیرڤان بارزانی بۆ كۆچی دوایی فەلەكەدین كاكەیی لە پەیامێكدا نووسیویەتی:
كە ئەم پەیامە دەنووسم بۆ نیشاندانی هاوخەمیی خۆم لەگەڵ نەتەوەكەم بەبۆنەی لەدەستدان و كۆچی دواییی فەلەكەدین كاكەیی، هەست بە خەمێكی زۆر گەورە دەكەم. كاك فەلەكەدین كەسێكی زۆر نزیك و خۆشەویستی من بوو، ئەو بۆ من وەك مامۆستایەك بوو.
لە دوای نسكۆی شۆڕشی ئەیلوولەوە، بەردەوام كاك فەلەكەدین كاكەییم لە ماڵێ خۆمان و لە بارەگاكانی پێشمەرگە، دەبینی. كاك فەلەكەدین و ڕەحمەتیی ئیدریس بارزانیی باوكم، لە دوای نسكۆ و دەستپێكردنی شۆڕشی گوڵان، بەردەوام پێكەوە كاریان دەكرد. ئامانجی زۆر گەورە و پەیوەندییەكی زۆر بەهێز و قووڵ، ئەوانی بەیەكتر دەبەستەوە، لەبەر ئەوەش هەموو كارەكانیان پێكەوە بەرهەمدار و سەركەوتووانە بوون.
كاك فەلەكەدین كەسێكی زۆر قووڵ بوو، لەبەر ئەوەش توانای پێشبینیكردنی زۆر بەهێزبوو، كەسێكی بیر و ڕەفتارپاك بوو، سۆفی و زاهیدێكی ڕاستەقینە بوو، پەیوەندییە ڕووحانییەكان ئەویان والێكردبوو، بەردەوام تەنیا یەك تەماحی هەبێت،ئەویش لێكۆڵینەوە بوو لە فكر و كولتووری كوردی و پەیداكردنی كات بۆ بڵاوكردنەوەی كتێبەكانی. ڕۆشنبیرییەكی زۆر فراوانی هەبوو، بەو هۆیەشەوە كێشەی كوردی، بە گەورەیی خۆیەوە دەبینی. زۆر بە دیقەتەوە چاودێریی پێشكەوتنەكانی كێشەی كوردی لە هەموو لایەك و ڕوویەكەوە، دەكرد. ئامانجەكانی هەمیشە زۆر گەورەتر بوون لە ئارەزووی شەخسی، كاركردنیشی زۆر فراوان و ماندوونەناسانە بوو.دانیشتن و گفتوگۆكردن لەگەڵ كاك فەلەكەدین زۆر خۆش بوو، بە ڕاستی گەنجینەیەكی فكر بوو. حەزی دەكرد خزمەتی هەموو كوردستان بكات،فەلەكەدین كاكەیی، لە دوای خۆی خۆشەویستییەكی گەورەی لەناو گەلەكەی و هەڤاڵەكانیدا بەجێهێشت، مێژوویەكی گەورەی لە خەباتكردن تۆمار كرد، سەدان ووتار و لێكۆڵینەوە و چەندین كتێبی بەهاداری لە دوای خۆی بەجێهێشتن.
فەلەكەدین كاكەیی لە بیر و یادەوەریی ئێمەدا هەر بە زیندوویی دەمێنێتەوە. ئەو نموونەی پێشمەرگەیەكی خاكی، ئاوارەیەكی بەسەبر، ڕۆژنامەنووس و نووسەرێكی قووڵ، سیاسەتمەدارێكی خاوەن پێشبینی بوو.
مامۆستا فەلەكەدین كاكەیی هەمیشە عاشقی قسەی حەق و راست بووە، هەمیشە مرۆڤێكی بوو كە ماندووبوونی لای نەبوو و هەرچی لە پێناو ئامانجەكانی رێبازی بارزانیی نەمر پێ كرابا ئامادە بوو گیانی خۆی فیدا، سەرنوسەری رۆژنامەی خەبات و التاخی بووە كە هەمیشە وەك سەرنووسەرێك پەیامی ئەو بابەتانەی بڵاو كردوەتەوە كە بۆ پێشكەوتنی كوردایەتی بووە، دوای راپەرین ئەندامی پەرلەمان و2 جار بووەتە وەزیری رۆشنبیری هەرێمی كوردستان، كەسێكی خۆشەویست بووە لای رێزدار نێچیرڤان بارزانی و هەمیشە هاوكاری بووە، خاوەن چەندین كتێب و نامیلكە بووە بۆ خزمەتكردنی كوردستان.
