كارزان فەقێ
ئەمریكا ئەو وەلاتێ خوەدی بهێزترینە ل سەر هەموو ئاستان، ئاستێ سەربازی، ئابووری، وەبەرهێنان و چاندن ، هەروەسا ل سەر ئاستێ پیشەسازی و تەنكنۆلۆژیا و گەلەك بیاڤێن دی، هێز و شیاێن ئەمریكا بوویە ئەگەر كو هەڤپەیمان و دۆستێن ئەمریكا ژی د رەوشەكا باش و خوەش دا بژێن، ل رۆژهەلاتا ناڤین ئەمریكات گەلەك دۆست و هەڤپەیمان هەنە، تەماشەی هەر دۆستەكێ ئەمریكا بكەین ، دێ وێ یەكێ بینین كو د رەوشێن خراب و نە لبار دا ئەمریكا ب هانا وێ هاتیە و ب تنێ نەهێلایە، ژ وان ژی كورد ل هەرێما كوردستانێ، ئەگەر ژ سەرهلدانێ و تا نها دەست پێ بكەین، ئەمریكا هیچ دەمەكی دژی ڤێ قەوارەیا كوردان ل هەرێما كوردستانێ نەبوویە، سەرەرای كو دژ نەبوویە ژی، ل دەمێن بەرتەنگی و قەیرانان ژی خوە دیاركریە و دەستێ وێ یێ هاریكاریێ ل هەولێرا پایتەختێ هەرێما كوردستانێ هاتیە دیتن و هێزا وێ ژی هەم ل سەنگەرێن شەری و هەم ژی د بیاڤێ پێشخستنا كەرتێ ئابۆرێ هەرێما كوردستانێ رۆلێ خوە دیتیە.
ئەڤ پەیوەندیە كەنگی دەستپێكر و ل كیژان دەمی وەرچەرخان ب خوەڤە دیت؟ بێگومان نێچیرڤان بارزانی، سەرۆكوەزیرێ بەرێ یێ هەرێما كوردستانێ و سەرۆكێ نها یێ هەرێمێ رۆلەكێ دیار د پێشخستنا ڤێ پەیوەندیا دناڤبەرا هەرێما كوردستانێ و ئەمریكا دا گێرایە، ب رەنگەكێ ل سەردەمێ دەەستهەلاتا نێچیرڤان بارزانی دا وەكی سەرۆكێ حكو مەتا هەرێما كوردستانێ؛ پەیوەندیا هەولێر و واشنتۆن گەهشتیە بلندترین ئاست، تا رادەیەكێ وەها دەم بۆ دەمێ شاند و بەرپرسێن بلندێن ئەمریكا ل هەرێما كوردستانێ دهاتن دیتن و ب هنارتنا كۆمپانیێن وان یێن وەبەرهێنانێ، وەبەرهێنانەكا مەزن ل هەرێما كوردستانێ هاتە كرن و ئابۆرێ ڤێ هەرێمێ و خەلكی ژی گهۆرینەكا بەرچاڤ بخوەڤە دیت، دبیاڤێ سەربازی ژی ب هەمان شێوە و پتر ژی، د شەرێ داعشێ ئەمریكا ل گەل وەلاتێن خوە یێن هەڤپەیمان پێشمەرگە ب تنێ ل سەنگەری بجهـ نەهێلان و ل ئەسمانێ ژی ب فرۆكەیێن خوە پشتەڤان و هاریكارێ شەرێ دژی تیرۆرێ بوون، لێ بزاڤێن بهێزكرنا هەرێما كوردستانێ ب تنێ ل وی سەردەمی نەبوو دەما نێچیرڤان بارزانی د حكومەتێ دا، بەلكو بارزانی كو نها سەرۆكێ هەرێمێ یە، د پۆستێ خوە یێ نوو ژی دا دەست ژ وان بزاڤێن خوە بەرنەدایە و داوی دەركەفتنا وی ژی، د ئیمزاكرنا لێكتێگەهشتنەكا بارزگانی و ئابوری بوو دناڤبەرا هەردوو ژوورێن بازرگانیێن هەرێما كوردستان و ئەمریكا. ئەو لێكتێگەهشتن دێ بۆ هەرێما كوردستانێ چ كەت؟ وەكو یا دیار ژوورا بازرگانی و پیشەسازیا ئەمریكا ئێك ژ مەزنترین ژوورێن سەر ئاستێ جیهانێ یە و خوەدان پتری سێ ملیۆن ئەندامە ژ كۆمپانیێن وەبەرهێنانێ، هەروەكو سەرۆكێ هەرێمێ ب خوە گۆتی: ئیمزاكرنا لێكتێگەهشتنێ دێ دەرگەهی ل هەمبەر سێ ملیۆن كۆمپانیان ڤەكەت كو وەبەرهەێنانێ ل هەرێما كوردستانێ بكەن.
كەواتە وەبەرهێنان ل هەرێمێ د ڤی دەمی دا دەربازی قۆناغەكا نوو و وەرچەرخانەكا گرنگ دبیت. دێ بیتە ئەگەر ژی هەموو ئەو شوونوارێن چار سالێن بۆری ب ئەگەرێ قەیرانێ ل هەرێما كوردستانێ دروست بووین، بەرزە ببن و ئابۆرێ هەرێما كوردستانێ وەكو جاران و بهێزتر ڤەگەریتەڤە.
