دیمانە: مسلم دۆلەمەری- بارزان
هەموساڵێك دوویادی گرنگ لەمێژووی گەلی كورددا هەن ئەویش 1ی ئازار و 14ی ئازارە، كە یەكەمیان یادێكی ماتەم و پڕ لە خەمی گەلی كوردە، چونكە لەم رۆژەدا سەركردە و ناسنامەی كوردایەتی بارزانیی نەمر ماڵئاوایی لەگەل و نیشتمانی كردووە. دووەمیشیان كە یادێكی پرشنگداری مێژووی گەلەكەمانە، ئەویش هەڵاتنی خۆری گەشی ئاسمانی گەلی كوردە، رۆژی لەدایكبوونی سەركردە و باوكی روحی نەتەوەی كورد بارزانی نەمرە، بۆ زیاتر شرۆڤە لەسەر ئەم یادانە و سەردانی كوردستانیان و بیانیان بۆسەرمەزاری نەمران، لە چاوپێكەوتنێكی تایبەت بە رۆژنامەی خەبات بەرێز خەلات بارزانی نوێنەری جەنابی سەرۆك بارزانی لەسەر مەزاری نەمران بەم شێوەیە بۆ خەبات هاتە ئاخافتن.
سەرەتا خەلات بارزانی گوتی: هەموومان دەزانین كە 1-3 رۆژی وەفاتی رابەری گەلی كورد مستەفا بارزانیە، كە ئەمساڵ چلەمین ساڵیادی وەفاتی بوو، دەبینین لەم رۆژەدا بەهەزاران كوردستانی لەتەواوی كوردستان و بگرە لە دەرەوەی كوردستانیش بە دڵێكی پڕ لە سۆزو وەفاییەوە سەردانی مەزاری نەمران دەكەن لە بارزان. ئەویش لەبەر ئەم رێبازە پیرۆزەی بارزانیی نەمرە، كە بەبێ جیاوازی نەتەوەیی و ئایینی و ناوچەگەری و عەشیرەتگەری، خەباتی بۆ ئازادی و سەربەخۆی كورد و كوردستان دەكرد. بۆیە ئەمڕۆ تەواوی كوردستانیان بەبێ جیاوازی خۆیان لە ژێر چەتری ئەم رێبازە دەبینن و بە سۆزو وەفاییەوە بۆ دووپاتكردنەوەی وەفاداری خۆیان سەردانی گلكۆی نەمران دەكەن. هەروەها لە 14-3 كەئەویش رۆژێكی شكودارە لە مێژووی گەلەكەمان كە رۆژی لەدایكبوونی بارزانی نەمرە. لەم رۆژەدا كە پشووی فەرمیشە لە كوردستان، بەهەزاران كوردستانیان و خەڵكانی دیكەی بیانیش سەردانی مەزاری نەمران دەكەن، بەتایبەتی لاوان و قوتابیان و چەندین چالاكی گرنگ ئەنجامدەدرێت، لەوانە دارچاندن كە جوانی و نوێبوونەوە بە ژینگەی كوردستان دەگەیێین. لەبارەی سەردانی لایەنە سیاسییەكان و ناوچە و دەڤەرەكانی كوردستان بۆ سەرمەزاری نەمران، خەلات بارزانی گوتی: دەتوانم بڵێم ساڵ بەساڵ سەردانی دلسۆزانی رێبازی بارزانیی نەمر بۆ سەر مەزاری نەمران لەزیادبووندایە، بەبێ ئەوەی كە لەم رۆژانەدا ئێمە مەراسیمی تایبەتمان هەبێت. ئەمە تەنها دڵسۆزی و وەفاداری گەلەكەمانە بۆ رێبازی بارزانیی نەمرو رێزگرتنیانە لە گلكۆی نەمران، كوردستانیان لە زۆربەی ناوچەكانی كوردستان بێ ئەوەی كە كادری پارتیشبن و بێ ئەوەی لایەنگری پارتی بن، بگرە لایەنی دیكەی حزبیی وسیاسیی كوردیشن، پۆل پۆل بە خۆی و خانەوادەیانەوە سەردانی مەزاری نەمران دەكەن، لێرەدا دووبارە دەڵێم هەر لەبەر ئەوەیە كە بارزانیی نەمر موڵكی هەموو كوردێك بووە و بەبێ جیاوازی خەباتی بۆ ئازادی گەلی كورد كردووە. بۆیە ئەمرۆ كورپەروەران و وەفادارانی رێباز و خەباتی پڕ سەروەری بارزانیی نەمر بەبێ جیاوازی سەردانی گلكۆی نەمران دەكەن.
دەربارەی سەردانی كوردانی پارچەكانی تری كوردستان خەلات بارزانی گوتی: خەباتی بارزانی بۆ ئازادی نەتەوەی كورد بووە نەك ناوچەیەك و عەشیرەتێك. بۆیە ئەمڕۆ بەدەیان كوردستانی لە مەهاباد و عەفرین و ناوچەكانی دیكەی پارچەكانی كوردستانی بۆ ماوەی چەندین رۆژ بە سەرما و ماندووبوون و برسییەتیەوە بە رێپێوان بۆ نوێكردنەوەی سۆزو وەفاداری خۆیان بۆ رێبازی بارزانیی نەمر سەردانی مەزاری نەمران دەكەن. ئەمە ئەوە ئەوە دەگەیێنێت كە خەباتی بارزانی چەترێك بووە بەسەر نەتەوەی كورد لە سەرتاسەری كوردستان. هەروەها دڵسۆزانی رێبازی بارزانی خاوەنی عەقیدەی بارزانی -ن، نەك پارتایەتی و لایەنگری پارتایەتی، كە هەتا ئەم رێبازە خاوەنی ئەم دڵسۆزە و خاوەن عەقیدانە بن، هیچ هێز و دوژمنێكی گەلەكەمان ناتوانن ئیرادەی گەلەكەمان بشكێنێت.
سەبارەت بە سەردانی كونسۆلخانەكانی بیانی لە كوردستان و عێراق و لایەنە سیاسییەكانی دیكە عێراق بۆ سەر مەزاری نەمران، خەلات بارزانی ئاشكرایكرد: ئەم ساڵ زیاتر لە 18 كونسوڵخانەی وڵاتانی بیانی لە كوردستان و عێراق سەردانی مەزاری نەمرانیان كردوە. هەروەها بەدەیان بەرپرس ولایەنی سیاسیی عێراقیش و بگرە ژمارەیەكی بەرچاویش لە دیپلۆماتكارو سیاسیی و كەسایەتی وڵاتانی دیكەی بیانیش سەردانی مەزاری نەمرانیان كردوە و هەروەها سەرسام بوونە بە دەڤەری بارزان لەرووی كەلتووری دەڤەرەكەو ژینگەپارێزی و دەیان یاسای دیكە ژیانی مرۆڤایەتی، بەتایبەتی سادەیی گۆڕی بارزانیی نەمر، كە لایان جێگای سەرنج بووە. بەڵام لای ئێمە سادەیی گۆڕی بارزانیی نەمر رامانی ئەوەیە كە بارزانی نەمر بەسادەیی ژیاوە و ژیانی لە ئەشكەوت و دەربەدەری و ئاوارەی و شەونخونی بەسەر بردووە، ئەویش لە پێناو ئازادی ودۆزی گەلی كورد، هەروەها گۆڕی بارزانی نەمر لەسەر بنەماكانی ئیسلام بەسادەی و ساكاری دروستكراوە و هەروەكو گۆڕی پێشمەرگەیەكی شەهید وایە.
دەربارەی سەردانی سەرۆك هۆزە عەرەبەكان بۆ سەرمەزاری نەمران، خەلات بارزانی گوتی: ئەم ساڵە ژمارەیەكی زۆر لە كەسایەتی ناوداری عەرەب و سەرۆك هۆزەكان سەردانی مەزاری نەمرانیان كردووە. ئەوان لێرە پڕ بەدڵ سوپاسی سەرۆك بارزانیان دەكرد، كە رێبازی بارزانیی نەمری بەرنەداوە لەهاوكارییكردنیان بەتایبەتی هاوكارییكردنی ئاوارە عەرەبەكان، كە زیاتر لە دوو ملیۆن ئاوارەی شەڕی داعش لە كوردستانەو خزمەتیان دەكرێت لە گشت روویەكەوە بەبێ جیاوازی ئایینی و نەتەوەیی و ناوچەگەری.
لەكۆتاییدا خەلات بارزانی نوێنەری جەنابی سەرۆك بارزانی لەسەر مەزاری نەمران گوتی: داواكارم یەكرێزو یەك دەست بین بۆ ئەوەی ببین بە گوڵێك بۆ سەرگۆری شەهیدانمان و ببین بە گولەییەك بۆسینگی دوژمنانی گەلەكەمان.
