فارس قادر فەقێ عەبدوڵڵا*

ماوەیەكە راگەیاندنەكان چ وەك تیڤی و كەناڵەكان، چ وەك چاپەمەنییەكان هەندێ بابەت دەورووژێنن كە لە بەرژەوەندی خودی خۆشیان نییە، هەروەك گوتەنی: لقی دارێك دەبڕن كە خۆشیان لەسەر ئەو دارەن. یان قسەیەكی تر هەیە لە كوردەواری دەڵێن: یەكێك بە یەكێكی گوت بێم گوێت بگرم لەو دونیایە دەتگێڕم، ئەوەی تریش وەڵامی دەداتەوە و دەڵێ: خۆ خۆشت لە گەڵمیت. كەواتە هەموومان لەگەڵ یەكین، لەناو یەك بەلەم داین، گەر هەر كارەساتێك رووبدات هەموومان لە ناو دەچین، یان ئازار دەخۆین، وەك یەك بەڵێ، بە دڵنیاییەوە دەبێ بزانین هەر بەردێك بكەوێتە ژێر پێی هەر كوردێك، هەموو كورد لە ئەنجام ئازاری پێ دەگات و زەرەرمەند دەبێت، ئەگەرچی لە كاتی ئێستاش بە دیار نەكەوێ، بەڵام راستیێكە و دەبێ بیزانین لە هەر شوێنێكدا كورد زامدار بێت، وەك یەك جەستە دەرئەنجام كاریگەری لەسەر هەموو بەشەكانی ئەندامی جەستە وەك یەك دەبێت، بە داخەوە هەروەك ئاماژەمان پێكرد، هەندێ لە راگەیاندنەكان چ بە مەبەست و چ بە نەزانی، كۆمەڵێك بابەت دەجولێنن، یان دروست دەكەن بە دڵنیاییەوە تەنها دوژمن تێیدا سوودمەند دەبێت، جا هەندێك لەو راگەیاندنانە بڕیاریان داوە كە هەردەم (موعارەزە بن) بەڵام، چ موعارەزەیەك وەك گوتەنی هەموو شتێك لە لایان رەشە و رەفزە، كەواتە تەنها موعارەزە نین، بەڵكو (رافیزەن) چاك و خراپ لایان خراپە، ئەمە لە لایەك لە لایەكی ترەوە بەداخەوە ئەوەی بڕیاریشی داوە لەناو حكوومەت بێت، ئەمیش بە نەفەسێكی خۆ فەرزكردن خۆی نیشاندەدات و دەسەپێنێت، هەرچەندە هەندێ كات رەنگە هاشوهۆشێكی دامەزراندنی حكوومەت بێت، وەك كورد دەڵێ (بای پێش باران بن) كە زۆر بە داخەوە بۆ بەرژەوەندی تەسكی حزبایەتی، هەرچی دێتە سەر زاریان دەیڵێن و شرۆڤەی ناتەندروستی بۆ دەكەن، تا ئەو رادەیەی كە چەندین ساڵە ئەوانەی تەپڵی دیموكراسییەت لێ دەدەن، ئێستاش باسی هێز دەكەن، باسی شوێنی جوگرافیای دەسەڵاتییان دەكەن، بۆ دابەشبوونی نێو ماڵی كوردی، هەروەك لێرە و لەوێ لە برایانی (ینك) گوێبیست دەبین، جارێك دەڵێن ئێمە شەریكین، جارێكی تر دەڵێن خاوەن پێشمەرگەین، هەروەها دەشڵێن ئێمە خاوەن خەباتی شاخین و جارێكی تریش دەڵێن بە دەنگ نییە، بە قوەتە و بە هێزە و كۆمەڵێك قسەی تر فڕێ دەدرێ، بە داخەوە كە ئەمە نیازی خێری تێدا نابینرێت و دوورە لە گیانی تەبایی و برایەتی و بڕوابوون بە دیموكراسییەت و سندوقی دەنگدان، بۆ نموونە هەروەك لە وتارەكانی تریشم ئاماژەم پێكردووە لە رۆژنامەی خەبات ژمارە (5629)، بابەتێكم وەڵام دایتەوە بە ناونیشانی (راستكردنەوەی چەند هەڵەیەكی مێژوویی كە لە ژمارە (7706) بەرواری 4/11/2018 لە كوردستانی نوێ ئاماژەی پێكرابوو و هەروەها لە ژمارە (5637 و 5653 و 5657) كە وەڵامی هەندێ بابەتی ناتەندروست و نادروستم تێدا روونكردووەتەوە، بەو ناونیشانانە، وەك (بەرێز گەلی كوردستان نەخێر وانییە، نامەیە یان بێ ئاگایی و نەزانی، هەم وەڵام هەم ئامۆژگاری). بە داخەوە ئەم كارە لەم ماوەیە بەردەوامە و هەرچەندە من نەپڕژایمە سەر هەموو وتار و هەواڵ و مێزگەردەكان، بەڵام لە هەموومان بە ئاگاین و رۆژانە بەرچاو دەكەون و داخێكی گەورەیە كە ئەو بۆچوون و بەرژەوەندییە حزبییانە خەریكە خۆی فەرز بكات لەسەر بەرژەوەندی گشتی، لە شوێنیان و كار و بەرژەوەندی حزبی ببێت بە مەبەست و دروشمی خەباتی حزبەكەیان، لە لایەكی تر لە هەندێ راگەیاندنی تری بێ ناسنامە، یان ناسنامە گوماناوی و خزمەتكاری ئەجێندا دەرەكییەكان لە لای ئەوان هەر بە یەكجار كاولكارییە و هەردەم لەسەر شاشەی تیڤییەكان هەری هات و بیكوژە و ببڕەیە، (دەكوژن و نایشارنەوە). زۆر بەبێ ئەدەبی قسە دەكەن، وەك ئەوەی دەنگی 99% میللەتیان لەگەڵدا بێت، هەردەم باسی ئەوە دەكەن كە دەسەڵات بۆگەنە و دەبێ لابدرێت، زۆر سەیرە باسی دەنگی میللەت دەكەن لە كاتێكدا 8 كورسیان هەیە، دەڵێن دەبێ 45 كورسی پارتی و 21یەكێتی كە دەكەن بە 66 لە دەسەڵات لابدرێت، سەیرە 8 كورسی دەیەوێت 66 كورسی لابدات، داوای چاكسازیش دەكات، گوایە نەوەیەكی نوێین كەسانێكی نوێخوازن، بەڕاستی شەقامی كوردی فەوزایە و هەموو شتە بەس دیموكراسی نییە، بەڕاستی هەروەك مەلای مەشهوور گوتەنی: مرۆڤ خاوەنی ئەو جۆرە عەقڵە بێت، دوژمنی بۆچییە و خۆی دەبێت بە دوژمنی خۆی و كردەوە و كرداری دەبن بە دوژمنی سەری خۆی. جا هیوادارم هەڵوەستەیەك بكەین و پێداچوونەوەیەك بكەین و كەم بڵێین و باش بڵێین، سەر لە خەڵك نەشێوێنین و ورەی خەڵك نەڕوخێنین و حیساب بۆ تابووری پێنجەم بكەین و نەبین بە بڵندگۆی دوژمنان و بە بێ ئاگایی لە خۆمان خزمەت بە دوژمن نەكەین و گەر نەتوانین خزمەتیش بكەین بە میللەت، با چیتر ئازاری خەڵك نەدەین، فەرموودەكەی سەرۆك بارزانیش زۆر جوانە با هەموومان كاری پێ بكەین و بڵێین: (گەر كوردایەتی گرانە خیانەت نەكردن ئاسانە). با هاووڵاتییەكی بێ زەرەر بین، گەر ناتوانین سوودمەندبین، با چیتر شاشەی تیڤی و راگەیاندنەكان بەناوی كورد ماڵی كورد وێران نەكەن، دەبا بەس بێت شەرم بكەین، چیتر مێژووی كورد ناشیرین نەكەین، ئەم میللەتەش قوڕبەسەرتر نەكەین.

*ئەندامی ئەنجوومەنی سەركردایەتیی پارێزگای هەولێر (پ.د.ك).