کوردستان ئاشتیی دەوێت و لە ئاسایشی خۆی خۆش نابێت

دڵشاد محه‌مه‌د ئه‌حمه‌د نه‌قشبه‌ندی*
لە میمبەری پێغەمبەری خوداوە ﷺ، لە ڕەحابى ئەو ئاینەی پاراستنی گیان، ئاسایش و ئاشتیی کردووەتە مەزنترین مەبەستەکانی شەریعەت، بە ڕوونی دەڵێین: بەئامانجگرتنی نووسینگەی تایبەتیی سەرۆک وەزیرانی کوردستان جەنابی مەسرور بارزانی بە فڕۆکەی بێفڕۆکەوان، کارێکی ڕەتکراوە و شەرمەزارکراوە و بەهیچ جۆرێک ناكرێت ڕێگەیەک بێت بۆ ئاشتی یان هۆکارێک بۆ چارەسەرکردنی ناکۆکییەکان.
خوای گەورە دەفەرموێت: ﴿وَلَا تَعْتَدُوا إِنَّ اللَّهَ لَا يُحِبُّ الْمُعْتَدِينَ﴾ [البقرة: 190]. هەروەها پێغەمبەری خودا ﷺ دەفەرموێت: «المسلم من سلم المسلمون من لسانه و يده» (متفق عليه). شەریعەتی ئیسلام بۆ پاراستنی گیان، پاراستنی ئاسایش و ڕێگریکردن لە زوڵم و دەستدرێژی هاتووە و لەبەرئەوە دەستدرێژیکردنە سەر کەسانی ئارام، دامەزراوەکان و شوێنە مەدەنییەکان خزمەت بە هیچ ناکات جگە لە ئاژاوە و هەڕەشەکردن لە سەقامگیری و چاندنی تۆوی ترس لە ناو خەڵکدا.
ئەم هێڕشەی کە نووسینگەی تایبەتیی سەرۆکی وەزیرانی کوردستانی بەئامانج گرت، تەنها ڕووداوێکی ئاسایشیی ئاسایی نییە، بەڵکو ئاڵۆزکردنێکی مەترسیدار و هەڕەشەیەکی ڕاستەوخۆیە بۆ سەر ئاسایش و سەقامگیریی کوردستان و هەوڵێکە بۆ تێکدانی رێڕەوی خەڵکێک کە ئاوەدانی، گەشەپێدان و ئاشتییان هەڵبژاردووە. ئێمە لەم میمبەرە ئاینی و نیشتمانییەوە بە توندترین دەستەواژە ئەم هێرشە بێباکانە و قبوڵنەکراوانە شەرمەزار دەکەین و جەخت دەکەینەوە کە کوردستان جەنگی ناوێت و بە دوای ئاڵۆزیدا ناگەڕێت و ناشیەوێت خاکەکەی ببێتە گۆڕەپانێک بۆ یەکلاکردنەوەی حساباتەکان.
سەرۆک وەزیرانی کوردستان جەنابی مەسرور بارزانی گوتی کە ئەم هێرشانە ڕێگرییان لێ ناکەن لە ئەنجامدانی ئەرکەکانیان و پاراستنی هاووڵاتییان، ئەمەش پەیامێکی ڕوونە کە تیرۆر و هەڕەشە ڕێڕەوی کوردستان ڕاناگرێت.
هێزی سەرکردایەتی لە هەڵگیرساندنی جەنگدا نییە، بەڵکو لە پاراستنی خەڵکەکەیدا، پاراستنی ئاسایشی و بەردەوامیدان بە ئاوەدانی لەگەڵ بوونی ئاستەنگەکاندا. کوردستان ئەمڕۆکە زیاتر لە هەر کاتێکی دیکە پێویستی بە یەکڕیزی، دوورکەوتنەوە لە فیتنە و وەستانەوەی هەمووانە لە پشت ئاسایش و سەقامگیریی نیشتمانەکەمان.
لە میمبەری پێغەمبەرەوە ﷺ دەڵێین: جیاوازی پاساو بۆ دەستدرێژی ناهێنێتەوە و ناکۆکیی سیاسیی پاساو بۆ بەئامانجگرتنی کەسانی بێتاوان نادات و هێزی ڕاستەقینە لە هەڵدان و ئاراستەکردنی فڕۆکەی بێفڕۆکەوان و موشەکدا نییە، بەڵکو لە ڕێزگرتن لە ژیانی مرۆڤ، ڕێزگرتن لە سەروەریی ئەوانی دیکە و دانیشتن لەسەر مێزی گفتوگۆدایە.
خوای گەورە دەفەرموێت: ﴿وَلَا يَجْرِمَنَّكُمْ شَنَآنُ قَوْمٍ عَلَىٰ أَلَّا تعدِلُوا ۚ اعْدِلُوا هُوَ أَقْرَبُ لِلتَّقْوَىٰ﴾ [المائدة: 8]. کوردستان دەستی ئاشتی درێژ دەکات، بەڵام لە هەمان کاتدا لە ئاسایش و سەقامگیریی خۆی خۆش نابێت. دامەزراوەکانی بەردەوام دەبن لە ئەنجامدانی ئەرکەکانیان و پاراستنی هاووڵاتی لە پێشەوەی بەرپرسیارەتییەکانی دەمێنێتەوە. لەم بارودۆخەدا، ئەرکی هەموومانە بوەستینەوە دژی فیتنە، ڕەتکردنەوەی توندوتیژی، پاراستنی یەکڕیزیی کۆمەڵگە و ڕێگەنەدان بە هیچ لایەنێک کە کوردستان بکاتە گۆڕەپانێک بۆ ململانێ هەرێمایەتییەکان.
خودایە کوردستان و خەڵکەکەی بپارێزە، ئاسایش و سەقامگیریی بپارێزە و فیتنە و جەنگی لێ دوور بخەرەوە، ڕۆڵەکانی و سەرکردایەتییەکەی بپارێزە و ئاسایش لە وڵاتەکان بچەسپێنە، ئاشتی و پێکەوەژیان و دڵەکانی خەڵکەکەی ئاوێتەی یەکتر بکە و هەمووان هیدایەت بده بۆ ڕێگەی حەق و ئاشتی.
لە میمبەری پێغەمبەروە ﷺ بە ڕاستگۆیییەوە دەڵێین: کوردستان خاکی ئاشتییە، خەڵکەکەی ئاسایشی دەوێت و سەرکردایەتییەکەی بەرەو ئاوەدانی بەردەوامە و ئیرادەی لە بەرامبەر هەڕەشە و دەستدرێژییەکاندا ناشکێت.
*پێشنوێژ و وتاربێژ