دەستەی دەروازە سنوورییەکانی عێراق رەزامەندیی نیشان دا لەسەر پێکهێنانی لیژنەیەکی باڵا و هاوبەش لەگەڵ حکوومەتی هەرێمی کوردستان بۆ پشکنینی مەیدانیی سنوورەکان و داخستنی تەواوی ئەو مەرز و خاڵانەی بە نایاسایی کار دەکەن؛ ئەمەش بە ئامانجی رێکخستنەوەی جووڵەی بازرگانی و بنبڕکردنی قاچاخچیتی.
سێشەممە 30ـی حوزەیرانی 2026، ئەنجوومەنی دەستەی دەروازە سنوورییەکانی عێراق کۆبووەوە و تێیدا رەزامەندیی کۆتایی لەسەر راسپاردەکانی ئەنجوومەنی وەزاری بۆ کاروباری ئابووری دەربڕی، بە مەبەستی پێکهێنانی لیژنەیەکی هاوبەش لەگەڵ نوێنەرانی هەرێمی کوردستان درا. ئەم بڕیارە لە چوارچێوەی هەوڵە چڕەکانی هەولێر و بەغدا دێت بۆ چەسپاندنی سەروەریی یاسا لە تەواوی دەروازە سنوورییەکاندا.
بەپێی راگەیەندراوی ئەنجوومەنی دەستەی دەروازە سنوورییەکانی عێراق ئەرکی سەرەکیی ئەم لێژنەیە، کە بە سەرۆکایەتیی دەستەی دەروازە سنوورییە فیدراڵییەکان و ئەندامییەتی لایەنە پەیوەندیدارەکان دەبێت، بریتییە لە ئەنجامدانی پشکنینی مەیدانی و ورد بۆ تەواوی هێڵی سنووری لە پارێزگاکانی هەرێمی کوردستان. لیژنەکە کار دەکات بۆ دەستنیشانکردن و داخستنی یەکجاریی سەرجەم ئەو دەروازە و خاڵە سنوورییە نایاساییانەی کە بەبێ رێگەپێدانی فەرمی و لە دەرەوەی چاودێریی دەوڵەت کار دەکەن.
هاوکات ئاماژەشی داوە، ئامانجی ستراتیژی لەم هەنگاوە، رێکخستنەوەی تەواوەتیی جووڵەی بازرگانی، توندکردنەوەی کۆنترۆڵی سنوورەکان و رێگریکردنە لە هەر جۆرە ئاڵوگۆڕێکی بازرگانی کە لە دەرەوەی رێکارە یاسایی، تەندروستی و گومرگییەکان ئەنجام بدرێت. چاوەڕوان دەکرێت بە جێبەجێکردنی ئەم بڕیارە، داهاتی گومرگی رێکبخرێتەوە و رێگری لە بەهەدەردانی سامانی گشتی و زیان گەیاندن بە ئاسایشی ئابووریی وڵات بگرێت.
دوێنێ دووشەممە، فالح ساری، وەزیری دارایی و وەزیری پلاندانان بە وەکالەت، سەرۆکایەتی پێنجەمین کۆبوونەوەی ئەنجوومەنی وەزاری بۆ ئابووری کرد، هاوکات شاندێکی هەرێمی کوردستان بە سەرۆکایەتی وەزیری دارایی سکرتێری گشتی ئەنجومەنی وەزیران سەرۆکی نوێنەرایەتی هەرێم، بەڕێوەبەرانی گشتی گومرگ و باج و بەدواداچوون، لەگەڵ ژمارەیەک لە پسپۆڕان بەشدارییان لە کۆبوونەوەکە کرد.
