خه‌بات: دلۆڤان هالۆ – زاخۆ:- عۆمەر ئۆرەیی، بەرپڕسێ لقا ٨ یا پارتی دیموكراتی كوردستان ل ئیدارەیا سەربخوە یا زاخۆ د دیدارەكێ دا بۆ خەبات دیار كر كو سەرۆك مەسعوود بارزانی وەكو لێڤەگەڕێ مللەتێ كوردە ل هەر چار پارچەیێن كوردستانێ، ئەو كەسێ كو بڕیاڕێن دروست بدەت بتنێ جەنابێ سەرۆك بارزانی یە و پێدڤییە بۆ هەر بابەتەكێ گرنگ ڕاوێژا وی بهێتە وەرگرتن، و ئەز باوەرناكەم ل دەڤەرا ڕۆژهەلاتا ناڤەڕاست هەمیێ كارەك یان بڕیارەك بێی ڕاوێژا سەرۆك بارزانی بهێتە كرن، چونكی جهێ باوەریا هەموو لایەكێ یە.
عۆمەر ئۆرەیی گۆت ژی:”ب باوەریا وەلاتێ توركیا و عەبدوللا ئۆجەلانی بتنێ سەرۆك بارزانی دشێت زامنێ ڤێ ئاشتیێ بیت، و ئەگەر ئەو نەبیت ئەڤ ئاشتیە سەرناگریت و شەرێ د ناڤبەرا توركیا و پەكەكێ دا ناهێتە چارەسەر كرن، لەوما ل دووڤ داخوازیا عەبدۆللا ئۆجەلانی شاندێ ئیمڕالیێ سەرەدانا سەرۆك بارزانی كرن و د گەلدا كۆمبوون ژ بۆ وەرگرتنا ڕاوێژ و بڕیارا سەرۆك بارزانی دەربارەی وێ ئاشتیا كو بڕیارە د ناڤبەرا توركیا و پەكەكێ دا بهێتە ئەنجامدان.
زێدە تر ژی گۆت:” پشتی كو هەموو لایەن گەهشتینە وێ باوەریێ كو ب چەكی چ ئاریشە چارەسەر نابن، ل سەر ڤی بنەمایی توركیا داخوازا وێ چەندێ كر كو ئاشتی بهێتە بەرقرار كرن، ڤێ ئاشتیێ دێ گەلەك ڕەنگڤەدانێن خوە یێن ئەرێنی هەبن كو یا ژ هەموویێ گرنگ تر دێ خوین ڕشتن ب دوماهیك هێت، و دێ ئاشتی و برایەتی و پێكڤە ژیان ل دەڤەرێ بەرقرار بیت، و ئەم وەكو كوردستانا باشوور ژی دێ ژ ڤێ ئاشتیێ د مفادار بین چونكی خەلكێ مە دێ زڤڕنە سەر گۆندێن خوە و دێ ب ئێمناهی و ئارامی ژین، بۆ ڤی دەمێ مللەتێ كورد تێدا دژیت پێكڤە ژیان یا گرنگە، چونكی وەسا دیارە ڕوودان و پێشهات بلەزن و دێ گۆهۆڕینێن مەزن ل ڤێ دەڤەرێ دروست بن، لەوما پێدڤییە كورد بۆ هەر پێشهاتەكێ د ئامادە بن”.
