شەنگە هاوار كاكەیی
بەپێی سەرچاوەیەكی هەواڵی سۆمەریە نیوز، لە رۆژی چواری یازدە كە گوایە بەرهەم ساڵح سەرقاڵی داڕشتنی پلانێكە بۆ ئاساییبوونەوەی دۆخی ئەمنی شاری كەركووك و ئەم هەواڵەش پشتڕاست كراوەتەوە لەسەر لێدوانی زارەكی سەرۆكی بەرەی توركمانی ئەم شارە “ئەرشەد ساڵحی” كەوا بەرهەم ساڵح لە دەستپێكی ئەركەكانیدا سازشی بوونی بۆ بەجێگەیاندنی ئەو پەیامە بووە كە رێگانەدات هێزی پێشمەرگە بگەڕێتەوە بۆ شاری كەركووك.
لە راستیدا ئەم هەنگاوە و را و تەكبیرە داڕشتنێكی تازە نییە لە بەرنامەی سەرانی خاكفرۆشان، بەڵام، بە هۆی بۆچوون و رەهەندی جیاوازەوە لەناو باڵەكانی یەكێتی بەربەرەكانێی ناوخۆیی باڵەكان هەمیشە ئاسۆی خۆزگە لە دڵی تاكی كورددا دەگەشایەوە بەوەی ئەمجارە لەم دەرفەتە چارەنووسسازەدا بە جیاواز چەرخی قەدەری بسوڕێتەوە لە بەرژەوەندی هاونیشتمانیانی شاری كەركووك و ناوچە كوردستانییەكانی دەرەوەی ئیدارەی هەرێم. هەڵبەتە بە بەرنامە و نەفەسێكی تازە سیاسەتیان داڕێژن كە لە خزمەتكردنی دۆخەكە سڵ نەكات و لە بازنەی بەرژەوەندی دۆزی كورد بسوڕێتەوە و هەنگاو بنێن بەرەو دەستەبەربوونی ئارامییەكی فیعلی و دۆخەكەش بەرەو ئاشتی سەقامگیریی بڕوات لە ناوچە كوردییەكان بە گشتی و لە شاری كەركووك بەتایبەتی. كە ئەم مافە هەرگیزاو هەرگیز لەم شارە فەراهەم نەبووە و دەرگای واڵا نەبووە بەڕووی تاكی كورددا لە هیچ ئانوزەمانێكدا هەر لە سەرەتاوە تاوەكو ئەمڕۆمان وەكو نەتەوەیەك خاوەن ماف و ئەرك لەم شارە تەنانەت ئەمجارەش كەركووك و كەركووكییەكانی ناوچە دابرێنراوەكان، لە لایەن كاربەدەستانی حكوومەتی بەغدا بە رۆژی نیوەڕۆ رۆڵ و مافیان بە هەند وەرنەگیرا و فەرامۆش بووە، لە لایەن كاربەدەستانی حكوومەتی عێراقەوە، لەم تەشكیلە تازەیەدا كە چەند رۆژێك لەمەوبەر داندرا كە متمانە بەخشرایە عادل عەبدولمەهدی و وەزیرەكانی، بەڵام، هەمیسان مافی كورد وەڵانرا لە وەرگرتنی مافە دەستوورییەكانی خۆی كە بەپێی دەستوور كورد بۆ دووەم نەتەوەیە لە عێراقدا. تەنانەت پۆستی وەزیرایەتی نەبەخشرا بە یەك كەسایەتی كورد نە لە كەركووك و نە لەناوچە كوردییەكان، كە دەبووایە وەكو نەریتی سیاسی ئەم دوو قوتبە هاوڕای یەك تەكبیر بن لە كاتی دانان و داڕشتنی سیاسەتی پلانی ستراتیژیی وڵاتدا كە لە بنەڕەتدا لەسەر مەبدەئی شەراكەت و تەوافوق دامەزراوە وەكو ئەتەكێتی عورفییش دەبوایە پۆستێكی وزاری بۆ كەسایەتییەكی كوردستانی لە ناوچە كوردستانییەكان دەستەبەر بووایە، ئەگەر لە دەرگای موجامەلەیەكی رۆتینی رەق و رووتیش بێت، دەبوایە كورد بێبەش نەبوایە لەم چانس وەرگرتنە، بەرهەمی دەركەوتە بێت بۆ بەرژەوەندی و نەتەوەی كورد بۆ كەسایەتییەكی كەركووكی یا كەسایەتییەكی لەم ناوچانە كە ئەم مافە دەستەمۆ بوو، دەرچوو بە فیعلی ئەم ناوچانە لە دۆگمای سیاسەتدا لە بیركراون و دابڕێنراون و بێشك لە ماف و ئیمتیازات، لە خاك، لە پرسی نەتەوەیی، تەنانەت لە شەكاوەیی ئاڵاكەی كە هێمای كوردە. ئەوەی ئاشكرایە بۆ هەموو لایەك شاری كەركووك چەقی هاوكێشە سیاسییەكانە و سەنگی مەحەكی یەكلاكەرەوەی كێشەكانە و خاكی گەرمە ئامادەیە بۆ سەرهەڵدانی ململانێ نەتەوەییەكان لە نێوان پێكهاتەكانی كورد و عەرەب و توركمان، بۆیە بوونی وەزیری كورد لەم تەشكیلە حكومیە چ لە حكوومەتی بەغدا چ لە حكوومەتی خۆمان، حكوومەتی هەرێمی كوردستان گرنگییەكی ئەوتۆی هەیە لە ئاوێزەی سیاسەتدا، چوون ئەم ناوچانە تایبەتمەندی خۆیان هەیە، كەوا داگیركراون لە لایەن هێزێكی عێراقییەوە لە سەردەمێكدا كە تەپوتۆزی هێز و سەپاندن رواوەتەوە ئاسۆ بە خۆری دیموكراسییەتدا ئاشنا بووە و لۆجیكی سەپاندن و داگیركردن لە هەرە نەنگییە گەورەكانی ئەم سەردەمەن لە فەرهەنگی سیاسەتدا و مافەكانی مرۆڤ بەوپێیە و لەم روانگەیەوە بۆ داهاتووی كورد گرنگە وەزیرێكی كورد حزوری هەبێت لە هەیكەلی فەرمانڕەوایەتی! چ جای سەرۆك كۆمارەكەی كورد بێت، هەڵگری پاسەپۆرتی پێشمەرگایەتی لە باخەڵ و هەگبەیدا كرۆكی بە گەرمیەوە گرتبێت، كوڕە پێشمەرگە بێت، بەڵام بەداخەوە بەپێی وتەكانی ئەرشەد ساڵحی رێككەوتوون لەگەڵ بەرهەم ساڵح كە هێزی پێشمەرگە نەگەڕێتەوە ئەم شارە و ئەم ئەركەش رادەستی هێزێكی سەربازی ئەكرێت لە ئایندە، گوایە لە پێكهاتەكانی نێو پارێزگا پێكدەهێندرێت و ئەم هێزەش سەر بە وەزارەتی ناوخۆ یان بەرگری عێراق دەبێت بۆ پاراستنی شاری كەركووك.
ئەوەی جێگای ئامەژەدانە بەرهەم ساڵح لە سەردانێكی بۆ شاری سلێمانی ئەم دەستپێشخەرییەی خستووەتەڕوو، وەكو پلانی چارەسەر بۆ بەر قەراربوونی ئاسایش لەم شارە. وەكو دەستپێشخەری بەرهەم ساڵح.
ئەوەی ئەمەوێ بیڵێم خۆزگە ئەم هەواڵە تەنها دەنگ كۆ دەبوو، دوور بێت لە راستی، چونكە هێزی پێشمەرگە تاكە هێزی نیشتمانییە بۆ پاراستنی خاك و نیشتمان و سنوورەكانی هەرێمی كوردستان، ئەو هێزە هاوردەیی كەوا بەرهەم ساڵح پشتئەستوور و قایمە پێیان، هەمان هێزبوونیان هەبوو كە شەڕی داعش هەڵگیرسا، بەڵام! كە روویدا هەر ئەوان بوون هانایان بۆ هێزی پێشمەرگە هێنا كە بیانپارێزن، بۆیە رۆڵی هێزی پێشمەرگەی كوردستان بەرچاوبوو، نەك تەنها بۆ پاراستنی سنووری هەرێمی كوردستان بگرە، بۆ پاراستنی شەرەف كەرامەتی ماڵومناڵی ئەو هێزە عەرەبیانە كە لە دەوروبەرمان دەژین، ئێستا كە لەم رۆژگارەمانە ئەگەر ئەم واقیعە و ئەم دۆخە سەپێندراوە، نەبێ كەوا بەرۆكی دۆز و میللەتی كوردی گرتووە، بە هۆی وەلا بۆ پرسی رێفراندۆم و سەربەخۆیی، لە ئاكامی ئەم خواستەمان ناوچە كوردستانییەكان بوونە قوربانی، ئەگەر ئەم بارودۆخە ئەم كەشە تەماویە بوونی نەمێنێ، هەرگیز هەڵی لەم شێوەیە ناڕەخسێت بە بەردەوامی بە چاوەڕوانی دڵنیایین لە هەلۆێست نواندنی برا پێشمەرگەكانمان و هێزی پێشمەرگە بە چەند كاتژمێرێك كەركووك و سەرجەم ناوچە كوردییەكانمان ئازاد دەكەن لە ركێفی هێزی داگیركەردا، هەرگیزا و هەرگیز دڵیان بە فەرمانەكانی بەرهەم ساڵح ئاو ناخواتەوە كە هێزی داگیركەر ببێت بە پشت و پەنای كورد و رێگای نەدەدا كە گاڵتە بە هەستی نەتەوایەتی بكرێت. كەوا بەرهەم ساڵح خۆی بە رەچەڵەك سەر بە هەمان نەتەوەیە و ئەو راستییانە بەرقەرارن كە هێزی پێشمەرگە تاكە هێزی بەرگریكردنی خاكی كوردستانە و خەڵكی كوردستانیش متمانەیان پێ بەخشیوە، ئەوە بۆ مێژوو دەمێنێت، نە بە فەرمانی بەرهەم، نە فەرمانی بەرهەمەكانی داهاتوو لە توانایان نییە و ناتوانن چۆك بە هێزێكی نیشتمانی دابنێن و بیبەزێنن كە ناوی هێزی پێشمەرگەیە و دڵنیاین جەنابیان دەمێكە دركیان بەو راستیانە كردووە، بۆیە هەمیشە حەزی بێ بنەمایی دوور بوون لە نادروستی ئەم دەنگۆیانە خۆزگەیەكە كە وا نەبێت! ئەگەریش دروستە دیارە پۆستی سەرۆككۆمار كە چەندین ساڵە بە كەسایەتییەكی كوردیی رازاوەتەوە، بەڵام نە لە خزمەتی دۆزی كورد بووە، نە لە خزمەتی میلەتی كورد بووە! كورد بێبەشكراوە لە ماف و ئیمتیازات لە ئامانجە نەتەوەییەكان لە ئیستحقاقی بودجە و… هتد، بۆیە دەكرێ لەم نهێنییە بكۆڵینەوە و بپرسین؟ ئاخۆ چ هۆكارە كە جێگای خۆشحاڵیە وەڵامی نهێنییەكانمان وەرگرتەوە بەوەی ئەم كورسییە كە بە دانیشتنی كوردە چەندین ساڵە گەرمە، تا ئێستا ئەوەی لەسەری دانشتبێت ئاڵوودە بووە بە داوی خۆشەویستی و دڵداری بۆ هاوسۆزەكانیان لە نەتەوەی عەرەب. لە كۆتاییدا دەتۆێنەوە وخۆیان لەیاد دەكەن كە كوردن و لە نەتەوەی كوردن، دیارە جەنابی بەرهەمیش كەوتە هەمان داوەوە، بۆیە ئەمجارەش دەڵێین ئەم دڵدارییەتان پیرۆزكرد لە پایەتەختی رەشید.
