هیمان رەمزی
ئەمجارەش كاندیدە سەركەوتووەكانی خولی پێنجەمی پەرلەمانی كوردستان لە لیست و حزب و قەوارە سیاسییە جیاجیاكانی هەرێم سوێندی یاساییان خوارد بۆ جێبەجێكردنی ئەركەكانیان بۆ ماوەی 4 ساڵی داهاتوو، كە كۆمەڵێك پرسی سیاسیی هەرێم بە هەڵپەسێردراوی ماونەتەوە، كە پرسەكان نەخشەی سیاسیی هەرێمی كوردستان دەخەنەڕوو لە رۆژهەڵاتی ناوەڕاست بە پلە یەك، ئەو پرسانەش كە دەزانین پرسی پرۆژە دەستووری هەرێمی كوردستان و پرسی سەروكایەتیی هەرێمی كوردستان و چەندان پرسی دیكەش.
پرۆژە دەستووری هەرێم زامنی مافی هەموو پێكهاتەكانە لە تەك مافی نەتەوەی كورد، زامنی مافەكان تەنها وشە نین، لەناو دەستووردا بچەسپێندرێت، بەڵكو دەستوور دەستپێكە و پێشكەشكردنی پرۆژە یاسای نوێ دێتەكایەوە و ئەو یاسایانەی كە پێویستە بگونجێن لەگەڵ پرۆژە دەستوور، دوای پەسەندكردن و چەسپاندنی دەستووری هەرێمی كوردستان دیسان هەموار بكرێتەوە و تا پێشێلی مافەكانی مروڤ نەكات، كە دەزانین رەچاوی كردووە بۆ چەسپاندنی ماددە و بڕگەكانی لەناو پرۆژە دەستووردا، وەك گفتوگۆیەكی فراوانی لە 2015 لەسەر كرا وەك پێكهاتەكان بە تایبەتی توركمانەكان، دەزانین كۆمەڵی مەدەنی رۆڵێكی زۆر چالاكانەی هەبووە و بەردەوامیشە بۆ چەسپاندنی 30بڕگەی مافی مرۆڤ، بۆیە گرنگی دەستوور ژیانی میللەت و دەستنیشانی سنوور و ناساندنی هێزی پێشمەرگە بە فەرمی لە ئەستۆ دەگرێت و ئەمەش لە بنەما سەرەكییەكانی بە دەوڵەتبوونە.
پاش هێرشی داعش بۆ سەر پێكهاتەكان لە 2014 دیسان وەرگرتنی ئەركی پاراستنی پێكهاتەكانی پەرلەمانی كوردستان و حكوومەتی هەرێمی كوردستان گرتە ئەستۆی خۆی پاش ئاراستەكردنی پرۆژە یاسایەك لە گشت رێكخراوەكانی تایبەتمەند لە بواری پێكهاتەكان و كەسایەتییەكان و لایەنە سیاسییەكانی پێكهاتەكان تا رادەیەكی بەهێز گەیشتن بە ئەنجامی ئامادەكردنی پرۆژە یاسای پاراستنی مافی پێكهاتەكان لە پەرلەمانی كوردستان و كە پەسەندكرا بە یاسای ژمارە 5ی ساڵی 2015 كە بە یەكەم یاسا دادەنرێت لە رۆژهەڵاتی ناوەڕاست و هەنگاوێكی مێژووانە هەژمار دەكرێت بۆ هەرێمی كوردستان، بەڵام ئێمە دەزانین هەر یاسایەك پێویستە بچێتە بواری جێبەجێكردن لە لایەن حكوومەتەوە و ئەو وەزارەتەی پەیوەستە بەو یاسایە، بەڵام ئەكەر تێبینی بكەین، پێكهاتەكانی ئایینە جیاكان، 8نوێنەریان هەیە بە فەرمی لە وەزارەتی ئەوقاف و پلەكانیان ناكاتە ئەو ئاستەی كە رێنمایی پابەندبوون بە یاساكە دەربكەن، بۆیە گرنگە بزانین بۆشاییەك هەیە لە كاری حكوومەت بۆ كاراكردنی یاساكە لە رێگای دانانی دەستەیەك بۆ پێكهاتەكان كە نوێنەرە ئایینەەكان چیتر رەبتیان نەمێنێت بە وەزارەتی ئەوقاف، بەڵكو بگوازرێنەوە ناو دەستەكە و دانانی نوێنەری پێكهاتە نەتەوەیەكانیش لە دەستەكە و دەسەڵاتیان پێ بدرێت، بێگومان لەگەڵ ئەو پلەیەی كە لە دەستەكەدا دەدرێت بە ئەندامانی دەستەكە تا بتوانن رێنمایی بە یاساكە دەربكەن و كارای بكەن لە گشت دامودەزكاكاندا و دوابەدوای هەنگاونانی زیاتر لە داهاتوودا.
