حه‌سه‌ن نووری
پارتی ژ گرنگترین سه‌نته‌رێن سیاسی و دیپلۆماسی و جڤاكیێن كوردستانێ دئێته هه‌ژمارت، هه‌روه‌سا تاك و ئێكانه پارتی بوویه ل سه‌ر په‌خشكرنا هه‌ستا نه‌ته‌وایه‌تی و نیشتیمانی ل هه‌ر جهێ كورد لێ هه‌بن ژبۆ به‌ره‌ڤانیكرن ژ مێژوو و ملله‌ت و خاكا پیرۆزا كوردستانێ و ل هه‌ر كاودانه‌كی دا بووبن.
له‌وا ل هه‌ر ویستگه‌هه‌كێ چ پارتایه‌تی یان پارتی بخوه چ نیشتیمانی ل سه‌ر ئاستێ كوردستانا مه‌زن چ هه‌رێماتی پترترین چاڤ ل سه‌ر هه‌لوه‌ست و گوتنا دویماهیێ یا پارتی دیمۆكراتی كوردستانن.
كۆنگره‌یێ 14وه‌ك نموونه كو هه‌تاكو دوژمن و نه‌یارێن پارتی ژی، ژبلی دۆست و ئه‌ندام و لایه‌نگران، چڕكه ب چڕكه دشۆپینن.
و ئه‌ڤێ بۆیه‌را پارتایه‌تی سنوورێن ناڤخوه‌ی بوونێ به‌زاندن و بزاڤتن و جوه‌ڵه‌یێن ڤێ پرۆسێ لایه‌نگر و نه‌لایه‌نگر ژی ئێخستنه بیاڤه‌كێ دینامیكی یێ زێندی و كێم وێنه دا هه‌ر ژ پرۆسه‌یا گه‌ریانا ئه‌ندام و كاندیدان بۆ نوونه‌راتیا كۆنگره‌ی بخوه و هه‌تا دگه‌هیته رێوره‌سم و چالاكیێن ڤه‌كرنا كۆنگره‌ی و روونشتنا پرۆتۆكۆلی یا فه‌رمی یا ئێكه‌مین رۆژا كۆنگره‌یی و هاتنا نوونه‌رێن كۆنگره‌ی ژ هه‌می لقێن پارتیا مه، ئورۆپا و ئه‌مریكا ژی دناڤدا، ئه‌ڤه و زێده‌باری هه‌می كوردێن جیهانێ چاڤێ وان ل سه‌ر به‌رنامه‌یێ ئاینده‌یێ پارتیا مه‌یه ژبۆ رزگاریا نه‌ته‌وه‌یی و نیشتیمانی، چونكی پارتی بڕبڕه‌یا پشتا پرۆژێ نه‌ته‌وه‌یی یه و ل هه‌ر قه‌یرانه‌كا گشتی به‌رامبه‌ر دۆزا كورد هاتبیته پێش، پارتی بارێ قورسێ به‌رپرسیاریێ هه‌لگرتیه و خوه ژبه‌ر نه‌هاڤێتیه و به‌رپرساتی گرتیه ستویێ خوه و شرۆڤه‌كرنا بار و زروفان و ئاینده‌یێ دوور و نێزیك ب هویری و كوریری شرۆڤه‌كرینه و هێزه‌كا دوورمه‌ودایا پێشبینی و گریمانه‌یێن ناڤخوه و ده‌وروبه‌ر و ناڤده‌وله‌تی و جه‌سۆرانه هه‌ڤكێشه ل گه‌ل پێشهات و كارێكته‌رێن هاڤلدار كریه و لۆژیكانه سه‌ركردایه‌تیا وه‌لاتی كریه د هه‌ر بارۆزروفه‌كی دا چ دژوار چ ژی نۆرمال.
ئه‌ڤ كۆنگره دئێته ئه‌نجامدان د ده‌مه‌كی دا حوكمه‌تا كوردستانێ ب سه‌رۆكاتیا رێزدار كاك مه‌سرۆر بارزانی هه‌تا ئاسته‌كێ به‌رز جێگیریه‌كا مه‌زن فراهه‌م كر د ده‌مه‌كێ پیڤانه‌یێ دژوارێ پڕی قه‌یران دا ئه‌و بارودۆخ گوهارتن بۆ بارودۆخه‌كێ پڕی متمانه د ناڤبه‌را حوكمه‌تێ و هه‌ڤوه‌لاتیێن كوردستانێ دا، د وارێ ئابووری دا و جێگیربوونا مه‌هانیا مووچه‌خوران و ئه‌نجامدانا پرۆژێن ستراتیژی یێن دورستكرنا رێك و بان و ژێرخانا ئابۆری وه‌كو سایلۆ و پرۆژه‌یێن په‌نگاندانا ئاڤێ و سه‌رراستكرنا خزمه‌تگوزاریێن بنگه‌هین یێن ژیانا رۆژانه یا هه‌ڤوه‌لاتیان.
كۆنگره‌ێ 14 یێ پارتیا مه كۆنگره‌كێ ئۆمێدبه‌خشه ل سه‌ر هه‌می ئاسته‌كی دا، دێ بیته خالا وه‌رچه‌رخانێ د پێشدابرنا سیاسه‌ت و دیپلۆماسیا كوردی دا و دێ ئاماده‌كاریه‌كا خورت و بهێزبیت بۆ خوگه‌نجاندنا لۆژیكانه و ره‌فتاركرن ل سه‌ر پێشهات و نووهاتیێن ل سه‌ر ئاستێ ناڤخوه‌یی و هه‌رێمایه‌تی و نێڤده‌وله‌تی دا ب رابه‌راتیا سه‌رۆك بارزانی و رێبازا مه یا پیرۆز.
