سەگڤان هالو
سەڕەتا ئێمە وەك كورد پێویستە لە گەڵ پێشهاتە سیاسییەكاندا هەنگاوبنێین ،جا چ لە سەر ئاستی نێودەوڵەتی بێت یانیش هەرێمایەتی و عێڕاق ، چونكە ڕووداوە سیاسییەكان ئەمڕۆ لەم سەردەمەدا زۆر خێڕان و دۆزی كوردیش ئەوە لە كورد دەخوازێت كە لەسەربنەمای لۆژیك مامەڵە لەگەڵ دۆخەكەدا بكات، ئەمە و كومەڵێك فاكتەر هەن كە دەبێ بەهەند وەربگیرێن تاوەكو دوانەكەوێت. ڕێكخستنەوەی نێوماڵی كوردی یەكێكە لەو هۆكارە گرنگانەی كە دۆزی كورد لە ئامانج نزیك دەكاتەوە، گەر ئێمە بمانەوێت كوردستانێكی بەهێز بنیات بنێین، دەبێ هەوڵ بدەین بیروڕای نەتەوەیی، سیاسی و ئایینییەكان بە گشتی لە ژێر چەترێكی نیشتمانیدا كۆبكەینەوە و یەكدەنگ و تەبا بین لە پێناو سەرخستنی ئەو ئامانجە پیروزەدا، ئامانجێك كە ڕوبارێك خوێنمان بۆ بەخشیوە.
زۆر بەداخەوە هێشتا بیروڕا سیاسییە جیاوازەكانی كوردستان نەیانتوانیوە خۆیان ڕزگار بكەن لە بیری تەسكی حزبایەتی و بەرژەوەندیی حزبی و تاكەكەسی لە سەروی بەرژەوەندیی گشتیدا جێی گرتووە، كە ئەمەش لە ڕاستیدا زیانێكی گەورەی بە دۆزی ڕەوای گەلەكەمان گەیاندووە و بەرژەوەندیی گشتی كەوتۆتە ژێری ژێرەوەی بەرژەوەندییە تایبەتەكان، بەردەوامبوونی دۆخێكی لەم چەشنەش لە داهاتوودا پێش هەموو شتێك خودی لایەنە سیاسییەكان تیایدا زەڕەرمەند دەبن و پێگەی جەماوەریی خۆیان لە دەست دەدەن، كەواتە لەمڕۆ بە دواوەش حزبەكانی كوردستان گەر بەرژەوەندیی گەلی كوردستان بكەنە پێوەری خەبات و تێكۆشانی خۆیان و لە بەرچاوی بگرن، بێ شك لە ڕووی پێگەی جەماوەرییەوە بەهێز دەبن، ئەوە حزبە سیاسییەكانن دوای دەرچوونیان لە هەڵبژاردنەكاندا بە دەنگی خەڵك جڵەوی دەستەڵاتی سیاسی دەگرنە دەست، كەواتە دەنگی خەڵك سەنگی مەحەكە و پرەنسیپی بەرژەوەندیی گشتیش فاكتەری بەهێزی سەركەوتنیان دەبێت لە داهاتوودا و پێچەوانەكەشی ڕاستە.
شایانی باسە هەتاوەكو كوردستان نەبێتە خاوەن یەكگوتاری سیاسی ناتوانێت خۆی لەگەڵ پێشهاتە سیاسییەكاندا بگونجێنێت، چونكە لە یەكترازانی سیاسی بە درێژایی قۆناغەكان هۆكاری سەرەكی زاڵبوونی دەوڵەتە داگیركارەكانی كوردستان بووە بەسەر دۆزی ڕەوای كورددا كە هەتاكو ئەمڕۆش ئەم پەرتەوازەبوونەی كورد بەردەوامە. بۆیە لە كۆتایی دەگەینە ئەم ئەنجامە پێویستە هەوڵ بدرێت وڵاتی خۆمان لە پەرتەوازەیی بیروڕا سیاسییەكان ڕزگار بكەین و بە چڕی بیروباوەڕی كوردایەتی لە سەر هەموو ئاستەكاندا بڵاو بكەینەوە هاوشانی بایەخدان بە بەرژەوەندیی گشتی گەلەكەمان تاكو هەم لەسەر ئاستی نێودەوڵەتی و هەرێمایەتی و عێڕاقدا بكارین لە داهاتوودا كوردستانێكی بە هێزو خاوەن سەنگ و پێگە بنیات بنێین.
