فریاد محەمەد – ئەڵمانیا
رۆژی 14ی شوبات، 56ـەمین كۆنفرانسی ئاسایشی میونشن بەڕێوەچوو، ئەو كۆنفرانسە ساڵانە تەگەرە و كۆسپەكانی بەردەم ئاسایشی جیهان تاوتوێ دەكات، ئەمساڵیش هاوشێوەی ساڵانی رابردوو، مسرور بارزانی سەرۆك وەزیرانی كوردستان بە سەرۆكایەتی شاندێكی باڵای هەرێمی كوردستان بەشداری تێیدا كرد، لەو كۆنفرانسەدا سەرۆك وەزیران و پتر لە500 لە گەورە بەرپرسانی وڵاتانی جیهان بەشدارییان تێدا كرد، بە یەكێك لە گەورەترین كۆنفرانس و كۆنگرە لە سەر ئاستی دنیا دادەنرێ كە تێیدا تاوتوێی دۆخی ئاسایشی دنیا بكات، هەر بۆیەش هەموو چاوەكان دەچنە سەر چاڵاكی و جموجۆل و دیدارو دیبەت و سیمنارەكانی كۆنفرانسەكە.
لەمیانەی بەڕێوەچوونی كۆنفرانسی ئاسایشی میونشن، جگە لەوەی تەنگژەی ئێستە و تەگەرەو ئاریشەكانی بەردەم ئاسایشی جیهان گەنگەشە دەكرێت، هاوكات پەیوەندی دیپلۆماسی، هەماهەنگی سەربازی، ئاسایشی ئەنتەرنێت، جەنگ دژ بە داعش، وزە و بواری تەندروستی باسیان لێوە دەكرێت، ئەم بوارانەش هاوشێوەی پرسی ئاسایش بگرە زیاتریش بە لای هەرێمی كوردستان دا جێی بایەخە، بۆیە بە لای شاندی كوردستان لە بەشداری كردن لە كۆنفرانسی ئاسایشی میونشن لەم بوارانەش دا پەیوەندی و هەماهەنگیەكان لەگەل وڵاتانی جیهان برەوی پێ بدرێت.
كورد بە گشتی بە گرنگییەوە ساڵانە بەشداری لە كۆنفرانسی میونشن دەكات، هاوكات وڵاتانی رێكخەر و بەشداریش گرنگی بەشداری هەرێمی كوردستان لە سەر ئاستی باڵا دەبینن، بۆیە لەمیانی بەڕێوەچوونی رۆژەكانی كۆنفرانس چەندین دیدار و كۆبونەوەی فەرمی لە نێوان شاندی كوردستان بە سەرۆكایەتی سەرۆك وەزیران لەگەڵ سەرۆك وەزیران و گەورە بەرپرسانی وڵاتان كە بەشداری ئەو كۆنفرانسەیان كردووە بەڕێوەدەچێت.
بەو پێیەی هەرێمی كوردستان كەوتۆتە ناو جوگرافیایەكی پڕ لە كێشە، وڵاتانی دراوسێی لە ناو دۆخێكی ئاڵۆزی سیاسیی و تەناهیی و جڤاكی دان، تیرۆر لەو ناوچەیە هەمیشە مەترسییەكی گەورەیە نەك تەنیا بۆ كوردستان و ئەو ناوچانەی ئاڵۆزیان تێدایە بەڵكو مەترسی و هەڕەشەیەكی جیددییە بۆ سەر ئاسایشی هەموو جیهان، لەم روانگەیەوە كورد لە هەمووان زیاتر بە شاندێكی باڵا لەسەر ئاستی سەرۆك وەزیران بەشداری لە كۆنفرانسی میونشن دەكات، هاوكات لە ئەنجامەكانی دەڕوانێ.
ئەمڕۆ هەرێمی كوردستان كاراكتەرێكی ژمارە خوێندراو و گرنگە لە ناو هاوكێشەی ناودەوڵەتی دا، هەم لە بواری ئاسایش و بە دیهێنانی ئاسایش بۆ جیهان، هەمیش لە بواری وزە و تەندروستی و ئاسایشی ئەنتەرنێت و روبەڕووبوونەوەی تیرۆر، هەر بەم چاوەش جیهان لە گرنگی كورد دەروانێ، بە تایبەتیش لە شەڕی دژ بە تیرۆردا، هەمووانیش دەزانن ئەوە هێزی پێشمەرگەی كوردستان بوو ئەفسانەی داعشی تێكشاند، بۆیە وڵاتانی جیهان لە چەند ساڵی رابردوودا پەیوەندیەكی پتەو و بەهێز لە بواری دیپلۆماسی و ئاسایش و هەماهەنگی سەربازی و بوارەكانی تر لەگەڵ هەرێمی كوردستان دروست كرد، ئێستە دەكرێ كورد سوود لەو پەیوەندییە دیپلۆماسی و هەواڵگری و سەربازییانەی وەربگرێ كە ئەمڕۆ لەگەڵ دنیای دەرەوە هەیەتی.
بە وردبوونەوە لە دیدار و كۆبونەوەكانی سەرۆك وەزیرانی كوردستان لە دوو رۆژی كۆنفرانسی ئاسایشی میونشن، بە تایبەتیش كۆبونەوە لەگەل سەرۆك وەزیرانی بولگاریا و وەزیری بەرگری ئەڵمانیا و وەزیرانی دەرەوە و وزە و بەرگری ئەمەریكا، دیدو بۆچوون و تێروانینی روونی هەرێمی كوردستان لەبارەی هەڕەشەكانی تیرۆر بۆ سەر ئاسایشی جیهان بە نوێنەرانی وڵاتانی بەشدار لەكۆنفرانسی ئاسایشی میونشن خرایەروو، دووپاتیش لەوە كرایەوە بەوەی پێویستە كۆمەڵگەی ناودەوڵەتی لە بواری پەیوەندی دیپلۆماسی و هەماهەنگی سەربازی دا پتر لە یەكتر نێزیك ببنەوە و تواناكان كۆبكرێنەوە بۆ دوورخستنەوەی یەكجارەكی مەترسی و هەڕەشەكانی تیرۆر كە بۆ سەر ئاسایشی جیهان هەیە، هاوكات وڵاتانی زڵهیز و بڕیار بەدەستی جیهانیش دووپاتیان لە گرنگی هەرێمی كوردستان كرد بۆ بەدیهێنانی ئاسایشێكی سەقامگیر بۆ جیهان، ستایشەكانی وەزیرانی بەرگری ئەڵمانیا و ئەمەریكا، وەزیری وزەی ئەمەریكا بۆ سەرۆك وەزیرانی كوردستان لە بارەی رۆڵی ئەرێنی هەرێمی كوردستان لە هەوڵدان بۆ بەدیهێنانی سەقامگیری ئاسایش بۆ جیهان، پێشكەش كردنی سوپاسگوزاری بە هێزی پێشمەرگەی كوردستان كە لە بڕی هەموو جیهان شەڕی تیرۆری كرد و قوربانیەكی زۆری لە پێناو مرۆڤایەتی بەخشی و ئەفسانەی گەورەترین دەواڵەتی تیرۆریستی تێكشاند، دەرخەری ئەوەیە كوردستان فاكتەرێكی گرنگە بۆ بەدیهێنانی ئەو سەقامگیری ئاسایش كە كۆمەڵگەی ناودەوڵەتی بۆ جیهان هەوڵی بە دیهێنانی بۆ دەدات.
