شاخەوان برایم عەبدوڵڵا
گۆڕانكارییەكانی ناوچەكە بە تایبەتیش لە دوای دەركەوتن و قۆناغی سەرەتای كۆتاییهاتنی داعش، بە نیسبەت كوردەوە، ئەرێنی بوون، ئەگەرچی كورد ژمارەیەكی زۆری شەهید و قوربانی دا و بە خوێن ناوچەكەیەكی زۆریشی پاراست، بەڵام لەڕووە سیاسییەكەیەوە كورد قازانجی كرد بەوەی لە دوو بەشی كوردستاندا، پێشمەرگە و شەڕڤانان شەڕی گەورەترین گرووپی تیرۆریستییان كرد تا ئاستی ئەوەی وڵاتان ئەگەر وەك موجامەلەش بووبێت، لەسەر شاشە جیهانییەكانەوە گوتیان جیهان قەرزاری كوردە. دەی ئێستا پێویستە بڵێین جیهان شەرمەزاری كوردە!
لە شەڕی داعشدا تەواوی فۆكەسەكان لەسەر كورد بوون، ئەگەرچی دۆزی كورد، دۆزێكی نەتەوەییە و بە خاكەوە گرێدراوە، ئەوەی لە شەڕی داعشیشدا كردی، بەشێكی بۆ خۆی بووە، وەك بەرپرسیارێتی نەتەوەیی و نیشتمانی بەوەی رێگەی نەدا خاكەكەی داگیربكرێت، لەكاتێكدا نەتەوە و وڵاتەكانی دیكە، ئەمەیان نەكرد و گەورەشارێكی وەك مووسڵ و دەیان ناوچەی دیكەیان رادەستی چەند سەد چەكدارێكی داعش كرد، بەبێ ئەوەی پێنج سەعات شەڕی دژ بە داعش بكەن، بەڵام كورد لە هەرێمی كوردستان و رۆژئاوای كوردستاندا بە خوێن ئەو شەڕەی كرد، ئەگەر ناوچەیەكیشی داگیر كرابێت، دواتر هەوڵی وەرگرتنەوەی داوە، لەبەر ئەوەی ئیرادەی رووبەڕووبوونەوەی داعش لە زاكیرەی هەر كوردێكدا بەهێز بووە و ئێستاش هەمان ئیرادە هەیە. لە نموونەی شنگال و مەخموور و گوێڕ و كۆبانی و دەیان ناوچەی دیكە كە كەوتنە ژێر دەسەڵاتی داعش، بەڵام بەخێرایی ئازادكران. لەكاتێكدا كورد چەكی پێشكەوتوو و پارەی باشیشی نەبوو، بەپێچەوانەی سوپای ئەو دەوڵەتانەی لەبری ئەوەی شەڕ بە چەكەكانیان بكەن، بەپێچەوانەوە بە چەكی سوپا لە كورد و لە سوپاش درا، بەهۆی ئەوەی لە دوای خۆیانەوە هەرچی چەكوچۆڵیان هەبوو، رادەستی داعشیان كرد كە بووە هۆی بەهێزبوونی داعش.
بە درێژایی مێژووی درووستبوونی دەوڵەتی عێراق، لەو وڵاتە وێرانەیەدا، كورد دژایەتی زۆری كراوە، كوژراوە، ئەنفالكراوە، خاكی تەعریبكراوە، كیمیابارانكراوە، لەشكركێشی كراوەتەسەر و هەموو رێگەیەكیشی لە دژی گیراوەتەبەر، بە ئامانجی بزركردنی شووناس و رەسەنێتیی كورد لەسەر خاكەكەی خۆیدا، كە لە گەلەكۆمەیەكی نێودەوڵەتیدا لە بەرژەوەندی چەند وڵاتێكی ناوچەیی لە نموونەی عێراق و توركیا و ئێران و سووریادا خاكەكەی دابەشكراوە.
لە 16ی ئۆكتۆبەری 2017دا سوپا و حەشدی شەعبی بە فەرمانی دەسەڵاتدارانی عێراق و بە هاوكاری گرووپێكی ناوخۆیی، هێرش كرایە سەر كورد و پێشكەوتووترین چەكی ئەمەریكی لە دژی كورد بەكارهێنرا، تەنیا لەبەر ئەوەی هەرێمی كوردستان پرسی بە خەڵكەكەی كرد ئایا دەتانەوێت سەربەخۆ بن یان لەگەڵ عێراقدا بمێننەوە؟ ئەمەش وەك رەگەزێكی گرنگی دیموكراسی بەوەی رێگە بە هەموو نەتەوە و كیانەكان دەدات چارەنووسی خۆیان دیاری بكەن، ئێ كوردیش تەنیا ویستی چارەنووسی خۆی دیاری بكات، ئەویش لە رێگەی سوودوەرگرتن لە دیموكراسی كە دواتر بە چەك و هێرش و گەمارۆدان، وەڵامدرایەوە.
دوای ئەوەی شەڕی داعش لە سووریاش نەما، كورد خەریك بوو پێگەی خۆی لە رۆژئاوای كوردستانیش درووست دەكرد، كەچی دیسان بە چەك و هێرش وەڵامی كورد درایەوە، لەكاتێكدا دەتواندرا ئەو كێشەیەی رۆژئاوا و توركیا لە رێگەی دیالۆگ و دانوستاندنەوە چارەسەر بكرێت و پەنا بۆ بژاردەی شەڕ نەبرێت، وەك ئەوەی سەرۆك بارزانی چەندانجار داوای كرد كێشەی نێوان رۆژئاوای كوردستان و توركیا پێویستە لە رێگەی ئاشتی چارەسەر بكرێت، بەڵام بە داخەوە بە پاڵپشتی سوپای توركیا و گرووپێكی توندڕۆی ئیسلامی ئێستاكە هێرش دەكرێتە سەر كورد و كۆمەڵگەی نێودەوڵەتیش سەرباری ئەوەی لێرەولەوێ رەخنە دەگرن و ئیدانەی هێرشەكە دەكەن، بەڵام هێشتا ژن و منداڵی سووتاوی كورد، هاوار دەكەن و جیهانیش گوێی لە هاوار و گریان و ئازارەكانی نەتەوەیەك نییە و رۆژ دوای رۆژیش ئازارەكانی ئەو نەتەوەیە گەورەتر دەبن، سەرئەنجام ئەو نەتەوەیەش پەرچەكرداری دەبێت، بە جۆرێك ئەگەر كورد سەقامیگری نەبێت، ناوچەكەش سەقامگیر نابێت.
