سوورە مەرگەیی
سەركردایەتیی سیاسی كورد دەبێ بە ئاگاییەوە لە رووداوەكانی ئەم دواییەی عێراق بڕوانێ، رووداو و پێشهاتەكان بە شێوەیەكن كە عادل عەبدولمەهدی دەڵێ: لە نێوان دوو بژاردە داین، یان مانەوەی حكوومەت یان نەمانی دەوڵەت، كورد دەبێ خۆی بۆ هەردوو ئەگەرەكە ئامادە بكات، ئەگەر وەك عادل عەبدولمەهدی دەڵێ: بژاردەی یەكەم و مانەوەی حكوومەت بێ، ئەركی كورد و لایەنە سیاسییەكان جیاواز دەبێ لەوەی بژاردەی دووەم و نەمانی دەوڵەت بێ.
پێشەكی دەمەوێ ئاماژە بۆ ئەوە بكەم هەر كامێك لەو دوو بژاردانە بێتەدی كە وەك عادل عەبدولمەهدی دەڵێ بژاردەی سێیەم بوونی نییە، كورد و لایەنە سیاسییەكان بۆ وەڵامدانەوەی درووستی هەر یەكێك لەو دوو بژاردانە تەنها یەك بژاردەی لە پێشە، ئەویش یەكدەنگ و یەك هەڵوێستی نەتەوەییە. بژاردەی دووەم و سێیەمیش ئەگەر هەبن، هەر یەكدەنگی و یەك هەوڵوێستییە، بۆیە ئەگەر حكوومەت بمێنێ، ئەوا لەم قۆناغەدا لایەنە سیاسییەكان بە یەكدەنگی و یەك هەڵوێستی دەتوانن مافە دەستوورییەكان بۆ كورد دەستەبەر بكەن، خۆ ئەگەر بژاردەی دووەم رووبدا و دەوڵەت نەمێنی، ئەوا دووبارە لایەنە سیاسییەكان بە یەكدەنگی و یەك هەڵوێستی دەتوانن مافە نەتەوەیی و نیشتمانییەكان بۆ كورد دەستەبەر بكەن كە سەربەخۆیی كوردستانە.
