دلۆڤان حەسەن رەزیكی
پێكڤەژیان ئەو پێدڤییە یا دبیتە بنەما و شەنگەستەكێ نەگۆڕ بۆ ژیانەك ئارام و پێشكەفتنا بەردەوام. د هەمی پەرتووكێن ئاسمانی،دەستوورێن وەڵاتان تا جارنامەیا مافێ مرۆڤی ژی دا ب رۆنی باس ل گرنگی و پێدڤییا وەكهەڤی،پێكڤەژیان و ئێك دووقەبوولكرنێ كریە.
ژبەركو ل هەر وەڵاتەكێ رێز ل هەموو رەنگ و دەنگ و هزرێن جۆدا جۆدا نەهێتەگرتن، هەڤوەڵاتیێن وی وەڵاتی مینا “گیانەوەرێن دڕندە”دێ بەردبنە گیانێ هەڤدوو. دژبەرییا (ئۆل،نەتەوە،مەزهەب،رەنگ و دەنگێن جۆدا)بەرهەمێ وێ ژبلی دەردەسەری و ژیانەك ئالۆز چ تشتێن دی نابیت.ب خۆشبەختانەڤە ل هەرێما كوردستانێ هەر ل سەردەمێ “شەهید شێخ عەبدلسەلام بارزانی” تا دگەهیتە لێڤەگەڕێ كوردان “مەسعود بارزانی”و سەرۆكێ هەرێمێ”نێچیرڤان بارزانی” گرنگی یا ب پێكڤەژیانا هەمی ئۆل،مەزهەب،كێمەنەتەوەیان هاتیە دان.
نوكە هەرێما كوردستانێ بوویە نموونەیا پێكڤەژیانێ ل عیراق و تەڤایا رۆژهەڵاتا ناڤین. هەڤوەڵاتیێن هەرێمێ بێی گوهدانا جێوازییا ئاین و بیر و باوەران و ب گیانەكێ برایانە سەرەدەریێ ل گەل هەڤدوو دكەن. یا بێگۆمانە هەڤوەڵاتیێن هەرێما كوردستانێ ئەڤ دەولەمەندییا پێكڤەژیانێ ژی ژ رێبەرێن خوە وەرگرتییە.لەوما بێ وژدانییە باس ل پێكڤەژیانا ل هەرێمێ هەی بهێتەكرن و باس ل پارێزەرێن وێ پێكڤەژیانێ نەهێتەكرن. ژبلی لێڤەگەڕێ كوردان “مەسعود بارزانی”كو هەردەم مینا چەترەكێ بوویە بۆ هەمی تاكێن ل كوردستانێ دژین، د هەمان دەم دا نێچیرڤان بارزانی ژی شیایە ببیتە ئەو پارێزڤان یێ كو هەرێما كوردستانێ مینا تابلۆیەكا پڕی رەنگ بپارێزیت و گیانێ براینی و پێكڤەژیانێ ل دەف هەموو تاكێن ڤێ هەرێمێ ب ڤەژینیت. چونكی سەرۆكێ هەرێمێ “نێچیرڤان بارزانی”ل وی دەمێ د پۆستێ سەرۆك وەزیران دا چەندین پێنگاڤێن گرنگ هاڤێتن ژبۆ پاراستن،پێشڤەبرن و دەولەمەندكرنا فەرهەنگا پێكڤەژیانێ ل هەرێما كوردستانێ. كارێن وی بۆ ڤێ چەندێ د زۆرن لێ دێ ل ڤێرە بتنێ باس ل كێمەك ژ وان كاران كەین. رۆلێ حكوومەتا هەرێمێ ب سەرۆكایەتییا نێچیرڤان بارزانی یێ بەر چاڤە كو هەردەم گرنكی ب پیرۆزیێن هەمی تاكێن كوردستانێ دایە.
پێكڤەژیان ل هەرێمێ گەهاندییە ئاستەكی،كو هەر تاكەكێ ڤێ هەرێمێ یێ ئازادە ئاینێ خوە پەیرەو بكەت و هەتا بانگەشێ ژی بۆ بكەت، و هیچ ئاینەك یان مەزهەبەك ل سەر ئێكێ دی نەهێتە فەرزكرن و چ كەس ژ بەر بیروباوەرێن وان نەهێنە پشتگوه هاڤێتن. دیسان حكوومەتێ رێگری كریە كو پەیرەوكەرێن ئاینەكێ هێرشێ بكەنە سەر ئاینەكێ دی و سزایێن توند بۆ هەر ئێكی داناینە یێ كو بزاڤێ ژبۆ تێكدانا پێكڤەژیانا ل هەرێمێ بكەت، هەروەسا چەندین پەرستگەه بۆ پەیرەوكەرێن ئاینێن جۆدا جۆدا ل هەرێمێ هاتینە ئاڤاكرن، دیسان جوداهی نەهاتییەكرن د ناڤبەرا چ ئۆل و نەتەوەیاندا و ب ئێك چاڤ هاتینە تەماشا كرن و گەلەك كارێن دی. هەر ئەڤ كولتوورێ فرەڕەنگی و وەكهەڤیێ یە كوردستان كریە ناسنامەیا پێكڤە ژیانێ ل سەرانسەری رۆژهەڵاتا ناڤین.
هەروەسا مەسرور بارزانی سەروكێ حكوومەتا كوردستانێ، هەردەم روولەكێ بەچاڤ هەبوویە ل پاراستنا خەلكی كوردستانێ ژ مەترسیێن ناڤخویی و دەرەكی، بێشك روڵی مەسروربارزانی ل شەڕێ دژی تیرورستێن (داعش) ل دەشتا نەینەوا و تەفایا كوردستانێ روولەكێ بەرچاڤ بوویە ل پاراستنا هاووڵاتیی و سڤیلان ب تایبەت برایێن كرستیان و ئێزدی كو ب شێوەكێ دڕندانە كەفتبوونە بەر (كەنیزەكرن و ئەنفالا داعشا). لەوما یافەرە هەردەم روڵی نێچرڤان بارزانی و مەسرور بارزانی لبیرامەبیت، كا چەوا ئەوان ل بن چاڤدیێری و رابەراتییا سەروك مسعود بارزانی بەردەوامی دایە ب فەرهەنگێ هەڤ قبول كرن و پێكڤەژیانا هەمی پێكهاتە و نەتەوە و ئاین و مەزهەبێن كوردستان، كو ماكا ڤێ پێكڤە ژیانێ ژ ئاراستە و شیرەتێن بابێ روحییێ كوردستان بارزانیێ نەمر بوویە. ئەڤان سەركردە و پێشڕە و سەردارێن مە، ئەڤروپێكڤەژیان ل كوردستانێ گەهاندییە ئاستەكی كو هەموو (موسڵمان،ئێزدی،مەسیحی،كاكەیی،كلدان،زەردەشتی…هتد)ب برایانە و مینا خێزانەكا مەزن د كوردستانێ دا بژین و هەلگرێن خەم و خۆشیێن ئێك بن.
ب هەبوونا ڤێ پێكڤەژیانیێ یە كو ئەڤرو هەرێما كوردستانێ سەرنجا وەڵاتێن بیانی بۆ خوە راكێشای و وەڵاتێن بیانی نەچاركرین مینا دۆست و هەڤپەیمان سەرەدەریێ ل گەل بكەن. ئەڤەژی گۆتنەكا سەرۆكێ هەرێمێ نێچیرڤان بارزانی د سەلمینیت دەمێ د گۆتارەكا خوەدا گۆتی: “پێكڤەژیان و لێبورینا ناڤخویی دێ پشتەڤانییا نیڤدەولەتی ژی بۆ مە مسۆگەر كەت”.
راستە پلان و پیلانێن دوژمنان هەبووینە و بەردەوام هەنە كو ڤێ ئێك دووقەبوولكرنا ل هەرێمێ هەی نەهێلن.لێ دڤێت هەر ئێكێ ل سەر ئاخا هەرێما كوردستانێ دژیت ڤێ ئاخێ ب مۆلكێ خوە بزانیت و هەر تاكەكێ ل هەرێمێ دژیت خوەدی چ بیر و باوەر و رەنگ و دەنگەك بیت ب برایێ خوە بزانیت،دا ئەڤ پێكڤەژیانا ل هەرێمێ هەی هەر بمینیت و ئەو خەونێن دوژمن دبینن هەر بمینن خەون.
