خەبات ــ دهوك:
ب هەلكەفتا یوبیلا زێرین ودەربازبونا 50 سالا ل سەر پارێزگەهبونا دهوكێ ل ئێڤاریا ڕوژا 2019/6/12 ل پاركێ نەوروز ب ئامادەبونا فەرهاد ئەمین ئەتروشی پارێزگەرێ دهوكێ وجێگرێن پارێزگەری و سەروك وئەندامێن جڤاتا پارێزگەهێ وچەند بەرپرسێن ئیداری و حزبی وجەماوەری وكەسایەتیێن پارێزگەهێ ڕێ ورسمێن كەرنەڤالێ حەفتێ یێ پارێزگەهبونا دهوكێ هاتنە گێران.
ل دەست پێكا ڕێورسمان پێشانگەها دهوكا كەڤن وبازارێ ئازاد وپێشانگەهێن كلتورێ كوردی هاتنە ڤەكرن. پاش ڕێپیڤانا كردوسێن جەماوەری وترومبێلێن خەملاندی ژپانوراما ئازادی كو ژمارا وان 46 كردوسێن جورا وجور وترومبێلێن خەملاندی دەستپێكر، ل دوڤدا ئاهەنگا هونەری هاتە سازكرن. پاش پەیڤا ڕێڤەبەریا گشتی یا ڕەوشەنبیری و هونەری ژلایێ ئەیوب ڕمەزان هاتە خاندن و بڤێ هەلكەفتێ پیروزباهیا بەرێزان نێچیرڤان بارزانی سەروكێ هەرێما كوردستانێ و مسرور بارزانی سەروكێ حكومەتا هەرێما كوردستانێ كر وخواست كو جەنابێ هەردوویان خزمەتا خەلكێ كوردستانێ ب گشتی ویێ پارێزگەهێ ب تایبەتی بكەن.
هەروەسا دیاركر كو ئارمانج ژسازكرنا كەرناڤی ئەوە بو نیشادانا كلتورێ دەڤەرێ ودیاركرنا شیانێن فەرمانگەها وسازیێن میری یە ودانەنیاسینا هەموو پارێزگەهێ ژرویێ سروشتی وچاندن وكلتوری و گەشتیاری ویوبیلا زێرین و 50 سالیا پارێزگەهبونا دهوكێ ل هەموویان پیروزكر.
پاش پارێزگەرێ دهوكێ پەیڤەك پێشكێشكر وبناڤێ خو وكارگێریا پارێزگەها دهوكێ ب خێر هاتنا هەموو مێهڤانان كر وپیروزباهیا ئێك ئێكە یاخەلكێ پارێزگەهێ كر ب هەلكەفتا 50 سالیا پارێزگەهبونا دهوكێ وهیڤی خاستن ڕوژێن خوشتر ب سەر خەلكێ كوردستانێ ویێ پارێزگەهێ دابهێن ودەست خوشی ل ڕێڤەبەریا ڕەوشەنبیری وسەروكاتیا باژێرڤانیا دهوكێ وهەموو لایەنان كر یێن كەرنەڤال ڕێكخستی.
هەروەسا پارێزگەرێ دهوكێ بناڤێ خەلكێ پارێزگەهێ سوپاسیا جەنابێ سەروك مسعود بارزانی كر كو ل سالێن دەربازبوی ڕولەكێ بەرچاڤ هەبویە بو پشتەڤانیكرنا پارێزگەها دهوكێ دهەموو بواران دا، هەروەسا پیروزباهیا ڕێزداران نێچیرڤان بارزانی سەروكێ هەرێما كوردستانێ ومسرور بارزانی سەروكێ ڕاسپاردی یێ حكومەتا كوردستانێ كر وداخازا سەركەفتنێ بو هەردوویان خواست وهیڤی خاستن كو جەنابێ وان ل قوناغا بهێت پتر پشتەڤانیا پارێزگەها دهوكێ بكەن.
پارێزگەرێ دهوكێ ئاماژە دا پارێزگەهبونا دهوكێ كو ل 27/5/1969 هاتیە ئاڤاكرن ئەوژی ژبەرهەمێ شورەشا ئەیلولا مەزن وخەباتا پێشمەرگێ قەهرەمان یێ وی دەمی بویە، هەروەسا گوت پارێزگەها دهوكێ یا دەولەمەندە ژرویێ دیروكێ وئابوری وكشتوكالی وگەشت وگوزاری وهەموو بیاڤێن دن ودەڤەر جهێ پێكڤە ژیانا هەموو ئول ونەتەوەیانە.
ئەتروشی ئەوژی دیاركر كو پارێزگەها دهوكێ لاندكا هەردوو شورەشێن ئەیلولا مەزن وگولانا پێشكەفتن خواز بویە وپشتی سەرهلدانا سالا 1991 دەڤەرێ گەلەك پێشكەفتن بخوڤە دیتی نە وهیڤی خاستن كو حكومەتا نوو پتر خو ل پێدڤیێن خەلكێ پارێزگەهێ بكەتە خودان.
دلایەكێ دن یێ پەیڤا خودا پارێزگەرێ دهوكێ گوت: وەكو ئەڤرو 12/6/2014 مە پوستێ پارێزگاریا دهوكێ وەرگرت ودگەل وەرگرتنا پوستەی گەلەك قەیران هاتنە پێش وەكو هاتنا تیرورستێن داعش وهاتنا ژمارەكا زور یا ئاوارە وپەنابەران وداكەتنا بهایێن پترولێ وبرینا بودجا هەرێما كوردستانێ ژلایێ حكومەتا ئیراقێ ڤە وئەڤان قەیرانا كارتێكرنەكا مەزن ل هەموو كەرتێن خزمەتكاری كر ودسەر ڤان هەموو قەیرانان ڕا مە بەردەوام پشتەڤانیا هێزێن پێشمەرگەی ودەزگەهێن ئێمناهیێ كریە وئێمناهیا وەلاتیان ودەڤەرێ هاتیە پاراستن وخزمەتگوزاریێن فەر وەكو ئاڤ وتەندورستی وخزمەتێن دن بەردەوام هاتینە دابینكرن وخزمەتا ئاوارە وپەنابەران هاتیە كرن.
پارێزگەرێ دهوكێ تەكەزكر كو مە پلانەكا باش دانابو ل سەر ئاستێ هەموو قەزا وناحیا بو دابینكرنا پروژێن خزمەتكاری بەلێ جهێ داخێ یە ژبەر وان قەیرانان نەهاتنە بجه ئینان لێ بەردەوام مە پروژێن خزمەتكاری ل سەر ئاستێ هەموو قەزا وناحیا بو وەلاتیان دابینكرینە.
ل دوماهیێ پارێزگەرێ دهوكێ سلاڤ ورێزین خو گەهاندنە خێزانێن شەهیدا وپێشمەرگێن قەهرەمان وهەموو خەلكێ پارێزگەهێ وكوردستانێ، وسوپاسیا هێزێن ئێمناهیێ ئاسایش وپولیس وهاتن وچونێ ودام ودەزگەهێن خزمەتكاری ولایەنێن سیاسی كر وسوزدا كو بەردەوام خزمەتا خەلكێ پارێزگەهێ تایبەت تەخا گەنج ولاوان بكەت.
پاش ئاهەنگا هونەری دەستپێكر و ئەڤان هونەرمەندان پشكداری تێدا كر: بلند إبراهیم، مەحمود بامەرنی، چوپی فەتاح، ڕومی هەركی.
پاش نمایشا جل وبەرگێن سەردەمێ پاشاتیێ ل ئیراقێ ژلایێ دار الازیا العراقیە هاتە كرن.
ل دوماهیێ یاریێن ئاگری هاتنە هاڤێتن. و ل ڕوژا دووێ یا كەرنەڤالی 13/6/2019 بەردەوامی ب بەرنامێن كەرنەڤالێ حەفتێ یێ پارێزگەهبونا دهوكێ هاتە دان ونمایشێن تیپێن هونەرێ مللی یێن دهوك، هەولێر، سلێمانیێ، شاریا هاتنە كرن و هونەرمەند عەزیز وەیسی چەند سترانا پێشكێشكرن.
هەژی گوتنێ یە ل ڕوژا 27/5/2019 ئاهەنگا یوبیلا زێرین یا پارێزگەهبونا دهوكێ ب پشتەڤانیا بەرێز فەرهاد ئەمین ئەتروشی پارێزگەرێ دهوكێ وهەڤكاریا ڕێڤەبەریا ڕەوشەنبیری وهونەری وسەروكاتیا باژێرڤانیا دهوكێ هاتبو سازكرن وچەند سمینار لدور مێژویا دهوك هاتبونە پێشكێشكرن وژبەر مەها ڕەمەزانا پیروزێ ئاهەنگا كەرنەڤالێ حەفتێ یێ پارێزگەهبونا دهوكێ بو ڕوژێن 12 و 13 مەها شەش 2019 هاتبو پاشئێخستن.
