خه‌بات: هاوار مورتكەیی
رەوەندا چۆلتز Rauanda Schultz ئەو كچە شەترەنجزانە كە ساڵی 1994 لە وڵاتی بەڕازیل لەدایك بووە، یەكێكە لەوانەی كە خەونی زۆرە بۆ گەیشتن بە لووتكەی ئەو یارییە، بۆ ئەمەش دۆستەكەی ساندرۆ ماریكۆی Sandro Mareco ئەرژەنتینی كە هەڵگری بڕوانامەی شەترەنجە GM و یەكێكە لە دیارترین 80 كەسایەتییەكانی جیهان، وەك راهێنەریەتی و بەردەوام هەوڵی خۆی لەگەڵ دەدات بۆ ئەوەی بەخەونەكانی بگات، لاپەڕەی وەرزشی رۆژنامەی خەبات دیمانەیەكی لەگەڵ ئەو كچە شەترەنجزانەی بڕازیل ئەنجام داوە بەمشێوەی خوارەوە.
رەوەندا چۆڵتز دەڵێت: سەرەتای ئاشنابوونم بە شەترەنج بۆ ئەوە دەگەڕێتەوە كە بینیم ئەوانەی ئەو یارییە دەكەن، دەرفەتی زۆریان بۆ دەڕەخسێت لەهێنانەدی خەونەكانیان بەتایبەتیش لە گەشتی وڵاتان و زیاتر تێكەڵ بوون لەگەڵ خەڵكی، دیارە منیش لە خێزانیكی هەژار لەدایك بووم، دەستنیشانكردی ئەو یارییەم بەباش زانی و زۆر بەجدیەوە دەستم پیكرد، سەرەتا لە قوتابخانەی برازامای بڕازیلی دەستم پێكرد و تا ئەو توانایەم لەخۆم رادیت كە بەشداری پاڵەوانێتییەكان بكەم، كە دیارترینیان بەشداریكردنم بوو لە پاڵەوانێتی جیهانی 2012 كە لە سلۆڤینیا بەڕێوەچوو، ئەوكات بەشداریم لە ئاستی خوار 18 ساڵیدا كرد.
دواتر چۆلتزی تەمەن 23 ساڵ لەبارەی خەون و گرنگیی ئەو یارییەوە گوتی: ئێستا لەم كاتەدا زۆر یاریی ناكەم بەڵكو هەموو كاتم بۆ راهێنان تەرخان كردووە، لەمەشدا دۆستەكەم ساندرۆ ماریكۆی ئەرژەنتینی زۆر هانم دەدات، هەوڵ دەدەم ببەمە شەترەنجزانێك نوێنەرایەتی بڕازیل بكەم لە ئۆڵۆمپیاد، كە ئەمەش خۆماندووكردنی دەوێت و دەمەوێ ئەمساڵ بەس خۆم بۆ ئەوە ماندوو بكەم، ئێستا رۆژانە 20 جۆره تەكتیكی راهێنان دەكەم،. هەورەها كاتیكیشم بۆ ئەوە تەرخان كردووە كە سەیری هەموو یارییەكانی جیهان بكەم، شەترەنجم زۆر خۆش دەوێت، ئەو یارییە ژیانی گۆڕیوم. لە رێگای شەترەنجەوە فێربووم كە بە زمانەكانی ئینگلیزی و ئیسپانی قسە بكەم، كە ئەمەش خەونی منداڵیم بوو، چونكە ئەگرە شەترەنج نەبوایە مەحال بوو بگەمە ئەو خەونە، چونكە هەمووان دەزان پرۆسەی خوێندن لە بڕازیل زۆر خراپە، شەترەنج بەختەوەری لە ژیاندا پی بەخشیوم، و وایلێكردووم ماندوێتی لەبیر بكەم.
