خه‌بات: هاوار مورتكەیی- تونس-
یسر مەعلا كچە شەترەنجزانێكی هەڵبژاردەی ئافرەتانی تونسە، یاریزانی یانەی بینزرتی تونسیە، كە لەمیانی بەشداری كردنی لە فیستیڤاڵی شەترەنجی نێودەوڵەتی تونس بەدەرفەتمان زانی دیمانەیەكی لەگەڵیدا ئەنجام بدەین و تیشك بخەینە سەر ژیانی وەرزشی و هەروەها دەسكەوتەكانی لەبواری شەترەنج، ئەو كچە تەمەن 17 ساڵە و توانی نازناوی لاوانی ئافرەتانی تونس بەدەست بهێنێ، پێی وایە شەترەنج وای لێكردووە كە ترس لەناخی كەمبكاتەوە لە رووبەرووبنەوەكاندا.
یسر مەعلا لەبارەی شەترەنجەوە دەڵێت: شەترەنج ئەو وەرزشەیە كە فێری بڕوابەخۆبوونت دەكات، لەكاتی یاریكردن ئارامیت پێدەبەخشێ، ئەو ترسە لە ناخی یاریزان كەمدەكاتەوە كەلەهەر رووبەروونەوەیەكدا دروست دەبێت، جیا لەمانەش زۆرترین هاوڕێ دەناسی و زیاتر ئاشنا دەبی بە كلتوری گەلان، ئێستاش شانازی بەخۆم دەكەم كە ئەمڕۆ یاریزانێكی شەترەنجم.
ئەو كچە شەترەنجزانیە تونس لەبارەی دەسكەوتەكانی دەڵێت: ئەگەرچی درەنگ دەستم بەشەترەنج كرد، بەڵام توانیم شوێن پەنجەی خۆم دیاربكەم لەماوەیەكی كورتد، من لە ساڵی 2015 فیری شەترەنج بووم، لە ساڵی 2016 بەشداری پاڵەوانێتی لاوانی تونسم كرد، لە ساڵی 2018 بەشداری پاڵەوانێتی پێشكەوتووانی ئافرەتانم كردو خۆشبەختانە توانیم ریتینگم بەرز بكەمەوە.
لەكۆتاییدا یسر مەعلا یاریزانی یانەی بینزرتی تونسی لەبارەی شەترەنجزانانی یانەی خانزاد كەبەیەكەوە لە فیستیڤاڵی نێوەدەوڵەتی شەترەنجی تونس بەشداری كردبوو گوتی: خۆشحاڵ بووم بۆیەكەمینجار ئاشنا بووم بەشەترەنجزانانی كوردستان، ئەوان كەسانی زۆر كۆمەڵایەتین و زوو لەگەڵمان تێكەڵ بوون، نەوەك هەر لەكاتی یاریكردن، بەڵكو لەدوای یاری شەترەنجیش بەیەكەوە دەچووینە دەرەوە و دادەنیشتین و وەك هاوڕیمان لێهاتبوو ، ریزو خۆشەویستیم بۆیان هەیە.
