خه‌بات: ساسان دەروێش- هۆڵەندا
لە چەند ساڵی ڕابردوودا ئاستی كشتوكاڵ لە هەرێمی كوردستان پێشكەوتنێكی گەورەی بەخۆیەوە دیووە لەبەرهەمهێنانی بەربوومی خۆراكی خۆماڵی و زیادبوونی لە بازاڕەكان، بۆیە حكومەتی هەرێمی كوردستان لە دوای چارەسەری دۆزینەوەی بازاڕكردنیان بوو بەتایبەتی هەناردەكردنیان بۆ ئەوروپا وهەوڵەكانی د. دلاوەر ئاژگەیی بەرپرسی نوێنەرایەتی حكومەتی هەرێمی كوردستان لە یەكێتی ئەوروپا و ئەوهەنگاوەی كە لە مانگی ڕابردوودا لەلایەن چەند كۆمپانیایەكی كشتوكاڵی كوردستانرا بە بەشداربوونی چەند كۆمپانیایەكی هۆڵەندی پێكەوە كۆنفرانسێكیان لە شاری لاهای هۆڵەندا ئەنجام داو تێیدا چەندین كەسایەتی كورد و هۆڵەندای لە بوارە جیاجیاكان بەشداری كارایان هەبوو بۆ گفتوگۆكردن لەسەر پرسی كشتوكاڵی كوردستان، ئەوەی جێگای سەرنجی ئامادەبووانی ئەو كۆنفرانسە بوو نمایشكردنی پێشانگایەكی نموونەی بەروبوومی كشتوكاڵی بوولە نێو هۆڵی كۆنفرانسەكە لەلایەن ئازاد محەمەد عەبدوڵا جووتیارێكی نموونەی شاری هەڵەبجە ڕێكخرابوو بەم شێوەیەش بۆ خەبات دوا.
سەرەتا ئازاد محەمەد پێی خۆشبوو كە بەخێرایش بێت باس لە ژیانی خۆی بكات و گوتی: من كوڕە جوتیارێكی كوردستانم وخەڵكی شاری هەڵەبجەی شەهیدم لە دایكبووی ساڵی 1972 ـم و خێزاندارم، بۆ خۆم خاوەنی دووكوڕ و دووكچم ، لەگەڵ چوار خوشك و سێ برا، باوكیشم بەحەمەی سافە بەناوبانگە ، پیشەی جووتیاریشم لە باوكمانەوە بۆ ماوەتەوە، بەڵام جیاواز لەوكارە جوتیارییەی كە پێشتر ئەوان كردوویانە ، زیاتر لە 25 بۆ 30 ساڵە كاری باخداری و كشتوكاڵ دەكەم و زیاتر لە 16 ساڵیشە لە خانووی پلاستیكیدا كاردەكەم وزانست و ئەزموونێكی باشم وەرگرتووە، ئاوات وخولیام ئەوەبووكە ڕۆژێك ببمە خاوەنی پارچە زەویەك بەدڵی خۆم ئەوەی لە بیرو خەیاڵمدا هەیە تێیدا بنێژم یان بچێنم سوپاس بۆ خوا ئەو ئاواتەم هاتۆتەدی و ئێستا بەدڵی خۆم و بەوپەڕی هەستكردن بەهێز وتوانای خۆم كار دەكەم و ساتێكیش بۆ پشوودان ناناسم لە پێناوی زیاتر فێربوون و زیاتر بەخشین .
پاشان ئازاد محەمەد هاتەسەر باسكردنی ئەزموونی خۆی و كارەكانی وگوتی: پێش كارەساتی هەڵەبجە من باخداریم دەكرد كاتێكیش كارەساتەكە ڕوویدا ئێمە لەسەر زەوی و ماڵی خۆمان دەربەدەری ئێران بووین و پوورێكم و منداڵەكانیشی تیاچوون وبێ سەروشوێن مانەوە، لە دوای گەڕانەوەمان جارێكی تردەستم كردەوە بەكشتوكاڵكردن تا بەئەمڕۆ دەگات ، سەرەتا لەبەر بێ دەرامەتی نەم توانی خانوی پلاستیكی بكڕم خۆم هەستام بەدروستكردنی ، سێ بۆ چوار ساڵ كارم لەژێریاناكرد وكۆمەڵێك بەرهەمی كشتوكاڵیم تیابەرهەم هێنا دواتر هەرزان بوون بووم بە خاوەنی 20 خانووی پلاستیكی ودوانزە ساڵ خەریكیان بووم بۆمن بوونە ئەزمونێكی دەوڵەمەند بەوكارانەی كە تیدا تاقیم دەكردنەوە بۆ نموونە برنج وكۆمەڵیك بەروبوومم تیابەرهەم هێنا دواتر بێ هیچ ساركەرە وبەكارهێنانی ووزە كۆمەلێك هەنارم تیا هەڵگرت كە دەفرۆشران ئەمە بووە جێگایی سەر سوڕمانی دەوروبەرەكەم وجوتیارانی كوردستان كە پشتم بەئەزمونی خۆم بەستوەچ لە شێوەی ئەندازەی ناشتنەكان وكێڵان ودابەشكردنی ئاوبۆیان لە ڕووبەڕی حەوت بۆ هەشت دۆنم زەویم هەیە لە ناحیەی سیروان سەربەگوندی بەشارەتی كەرتی حەوت، زەویەكانم وەك تاقیگا لێكردووە لە بیرۆكەی نوێ كە ئاشنایی بكەم بەمیللەتەكەم كە ساڵانە زیاتر لە 180 تۆن بەرهەمی كشتوكاڵی جۆراوجۆربەرهەم دەهێنم ، دەشتی شارەزور بۆ من و هەموو كوردستان خاكێكی بەپیت وئاڵتونیە وبەقەدەر هەردووچاوم خۆشم دەوێ نانی ماڵ ومنداڵ وتەنانەت چەند كرێكارێكیش كە لەگەڵمان كاردەكەن لەم خاكەوە بەرهەم دەهێنم وبازاڕەكانی كوردستانی لێ پڕدەكەم بەهیوام لە دەرەوە هاوردەی ئەم بەروبومانە نەكرێ كە جوتیارانی كوردستان سەرقاڵیانن و خەڵك فێربكرێ كە پشت بە بەرهەمی خۆماڵی ببەستن بۆ خۆراكەكانی ڕۆژانەیان ، هەروەها بەدەست و بازوی خۆم ناخی ئەوخاكە هەڵدەدڕم وخۆم پەین بەرهەم دەهێنم و دوور كەوتومەتەوە لە سەمادی كیمیاوی ، من خۆڵەمێش وڕیقنە وپاشەڕۆی ئاژەڵم بەكارهێناوە بۆ بنی شەتڵەكانم بۆ ڕووبەڕووبوونەوەی گرفتی گیاكەڵە وخۆرەوجاڵجالۆكە وكوللە ومێشولە دەستەوەسان نەبووم لەبەرامبەریان خۆشبەختانە تاڕادەیەك توانیومە ئەوكێشانەش بۆ خۆم و جوتیاران چارەسەر بكەم .
هەروەها دەربارەی بەشداربوونی لە كۆنفرانسی شاری لاهای وئامانجەكانی خستە ڕوو گوتی ، من وەك جوتیارێكی نمونەی كوردستان وشاری هەڵەبجە بەجلوبەرگی كوردی وخستنە ڕووی پێشانگایەك لە نمونەی بەروبومی كوردستان ونیشاندانی كۆمەڵێك وێنە كە پەیوەست بووبەم كارە لە هۆڵی كۆنفرانسەكەدامنا كە جێگایی سەرنجی بیانیەكان بوون وبەتامەزرۆوە تیاندەروانی و پرسیاریان لەبارەیەوە دەكرد ، خولیام بوو كە لە وڵاتێكی ئەوروپی ئەم كارە بكەم خۆشبەختانە كردم ، سوپاسی ژووری بازرگانی وڕێكخەری كۆنفرانسەكە وهەموو ئەو برادەرانە دەكەم هاوكاربوون لەگەیاندنی پەیامی جوتیارانی كوردستان ودۆزینەوەی بازاربۆ بەروبومەكانیان كە خاڵی سەرەكی گفتوگۆكانی كۆنفرانسەكە بوو بەهیوام كاری لەسەربكڕێ وئێمەش زیاتر هەوڵەكانمان چڕتربكەینەوە لە سەوزكردنی هەمووكوردستان وپێشنیارمان كرد بۆ حكومەتی هەرێمی كوردستان لەگەڵ دۆزینەوەی بازاربۆ بەروبومەكان بیریش لە كارگەی لە قوتوكردنی بەروبومەكان بكاتەوە بەتایبەتی هەنار كە لەلای ئەورووپیەكان كەم وگرانن وسوپاسی هەموو ئەو لایەن وپەیوەندیدرانەی حكومەتی هەرێمی كوردستان دەكەم كە خەمخۆرانە دەڕواننە دەستوپێی قڵیشاوی جوتیاران و ڕەنج وماندووبوونیان بۆ بەدەستهێنانی بەرهەمی زیاتری خۆماڵی ئەوەشی خواداویەتی بەمن لەم سەلیقەیە لەبواری كشتوكاڵ پێشكەشی هەموو جووتیارانی بكەم كە خزمەت بێت بەكوردستان كە ڕۆژانەش بەدەیان جووتیار پرسیاردەكەن ووەڵامی شیاویان دەدەمەوە جگە لە قوتابیان وكەسانی تر كە سەردانم دەكەن ڕۆژانەبۆ لای زەویەكانم .
لە كۆتاییشدا ئازاد محەمەد بەدڵێكی پڕلە خۆشیەوە گوتی: ناكرێ سوپاسگوزاری هەمووكوردانی تاراوگە نەبم لە هۆڵەندا وئەڵمانیا وسوید كە سەردانیانم كرد جگە لە ولاتانی تركە پەیوەنیان دەكرد بەتەلفۆنەوە وداوای میوانداریان دەكرد كە هەموو پێكەوە چ پێشوازیەكی گەرمیان لێكردم و دەرگایی ماڵ ومیوانداریان پڕبوون لە خۆشەویستی بۆم ئەوپیشوازیە گەرمەی كوردانی تاراوگە بوونە وەزی زیاتری كاركردنم كە تەنها بەرۆژ كارم دەكرد ئێستا دەبێت شەویشی لەگەل گرێ بدەم لەگەڵ هەموو ئەو بەرێزانەی كە دەرفەتی قسەكردنیان بۆ سازكردم لە هۆڵەكان ومیدیاكانی كوردی وبیانی هەر هەمووتان دڵسۆزی كورد وكوردستانن سەرمان بەرزە بەهەبوونی ئێوەی كوردانی تاراوگە.
