شاخەوان برایم عەبدوڵڵا
ئەمەریكا هەركە لە 2003 لەشكركێشی كردە سەر عێراق نەك هەر پرسی بە عێراقییەكان نەكرد، بەڵكوو بەشی زۆری وڵاتانیش بەو كردەیەی لەشكركێشییە رازی نەبوون، بەڵام سەرئەنجام هەر روویدا و ئەمەریكا لە ئاسمان و زەوییەوە خۆی گەیاندە عێراق.
هەردوو دەستەواژەكانی داگیركردن، رزگاركردن، لە پەیوەست بە عێراق، مشتومڕی زۆریان لەسەرە، ئەمەریكییەكان پێیانوایە عێراقییەكانیان لە چنگی سەددام رزگاركردووە و بەشی زۆری عێراقییەكانیش بەتایبەتی ئەو گرووپە شیعەیەی لە ئێرانەوە نزیكن، دەڵێن عێراق داگیركراوە.
هاتنی ترەمپ بۆ عێراق وەك دەگوترێت بەبێ پرسكردن، خوێندنەوەی زۆر هەڵدەگرێت كە عێراق لەم قۆناغەدا بووكەڵەی دەستی ئەمەریكایە. بەڵام سەرباری ئەوەش ئێستا هەراوهۆریایەكی زۆر لە عێراقدا هەیە بەوەی داوای دەركردنی هێزەكانی ئەمەریكا دەكرێت، لە نێو ئەو دەنگانەش قەیس خەزعەلی سەركردەی دیاری عەسائیبی ئەهلی حەق هەیە و بە توندی داوای دەركردنی ئەمەریكا لە عێراق دەكات تا ئاستی هۆشداری رووبەڕووبوونەوەی چەكداری لەگەڵ ئەمەریكییەكان، قەیس بە دەنگی بەرز دەڵێت بوونی ئەمەریكا لە عێراق لە بەرژەوەندیی عێراقدا نییە و لە پێناو ئەجێندا شاراوەكانی خۆی هاتووە و ئاسایشی ئیسرائیلیش بە ئاسایشی خۆی دەزانێت بۆیە هاتووەتە عێراق. ئاماژە بەوەش دەكات ئەوان دەیانەوێت بەشێوەیەكی فەرمی ئەمەریكا لە عێراق دەربكەن، بەڵام ئەگەر ئەمەریكا عێراق جێنەهێڵێت، ئەوكات لە بەرانبەر هێزەكانی ئەمەریكا دەوەستینەوە تەنانەت ئەگەر لە ڕووی چەكداریشەوە بێت. ئەم هۆشدارییەی قەیس خەزعەلی لە كاتێكدایە ئەمەریكا بەردەوام لە هەوڵدایە بۆ ئەوەی سوپای عێراق بەهێزتر بكات، هاوكات ئەو هێزەشی بڕیارە لە سووریا پاشەكشەی پێ بكات، دەیەوێت بە ئاراستەی عێراقدا بیهێنێت، وەك ئاماژەیەك ئەمەریكا نایەوێت لە عێراق دەربچێت، وەك ترەمپیش گوتی ئێمە خەرجی زۆرمان لە عێراق كردووە و دەمانەوێت چاودێری ئێرانیش بكەین، هەموو ئەوانەش لە كاتێكدان هێزە عێراقییەكان ئەوانەی لە ئێرانەوە نزیكن، دەیانەوێت رۆڵی ئەمەریكا لە بەرژەوەندی ئێران لە عێراق لاواز بكەن.
بە زیادبوونی گوشاری گرووپەكانی نزیك لە ئێرانیش، ئەوكات ئەوە بۆ كورد باشە، بەو مەرجەی كورد بتوانێ سوود لەو دەرفەتە وەربگرێت، هەتا عێراقییەكان گوشاری زیاتر لە ئەمەریكا بكەن، هەولێریش هێندەی دیكە لای ئەمەریكا خۆشەویستتر دەبێت و دەبێتە شوێنكاتی ئارام و جێگرەوەی عێراق بۆ واشنتۆن، بەتایبەتی كە هێزێكی گەورەی وەك پارتی نێوانی لەگەڵ ئەمەریكا خۆشە و بە پێچەوانەوە لەگەڵ ئێران باش نییە، هاوكات كردنەوەی ئەو كۆمەڵگە سیاسییەی ئەمەریكاش لە هەولێر كونسوڵخانە، ئەمە خۆی پەیامێكی روونە لەوەی ئەمەریكا دواجار چاوی زیاتر دەخاتە سەر كوردستان، بەوپێیەی ئەو كونسوڵخانەیەی لە هەولێر دروستی دەكات، پڕۆژەیەكی زۆر گەورەی سیاسییە و رووبەرێكی گەورەی زەوی بۆ تەرخانكراوە، وەك گرنگی هەولێر بۆ ئەمەریكا دێت، كەوایە هەڕەشەی ئەو گرووپە عێراقییە نزیك لە ئێران لە دژی ئەمەریكا و داوای دەركردنی ئەمەریكا، ئەمە پێگەی هەولێر گرنگتردەكات.
