خه‌بات: بەرهەم شێخ عزەدین
لەهۆڵی رۆشنبیری لە هەولێر، بە ئامادەبوونی بەڕێزان بەرپرسانی باڵای حكوومی و حزبی و پەرلەمانتاران و هونەرمەندان و هەوادارانی دەنگی عەزیز شارۆخ، لەلایەن وەزارەتی رۆشنبیری – بەڕێوەبەرایەتی گشتی رۆشنبیری و هونەری هەولێر، كۆنسێرتێكی گۆرانی و موزیك بۆ هونەرمەند عەزیز شارۆخ و هاوڕێ موزیكژەنەكانی ساز كرا و رێز لە هونەرمەندی گەورەی موكریان مامۆستا عەزیز شاروخی گیرا ..بۆئامەدەكردنی ئەم ڕاپۆرتە بە سوپاسەوە بەڕێز سەردار قادر بەرپرسی راگەیاندنی بەڕێوەبەرایەتیی گشتی رۆشنبیری و هونەری هەولێر هاوكارمان بوو .
لە دەستپێكدا وتاری نوێنەری سەرۆكی حكوومەتی هەرێمی كوردستان لە لایەن بەڕێز زیرەك كەمال پێشكەش كرا و تیایدا وێڕای دەستخۆشی لە بەڕێوەبەرایەتیی گشتی رۆشنبیری و هونەری هەولێر بۆ ئەم چالاكییە، باسی لە ئەدای بەرزی هونەریی عەزیز شارۆخ كرد و هیوای تەمەنێكی درێژی ئاسوودەیی و پڕ بەخششی بۆ كرد. ئینجا فەرهەنگ غەفوور بەڕێوەبەری گشتی رۆشنبیری و هونەری هەولێر، بەناوی وەزارەتی رۆشنبیرییەوە وتەی بەخێرهێنانی پێشكەش كرد و پاشان تیشكی خستە سەر مێژووی درەوشاوەی عەزیز شارۆخ لە بواری هونەر و وێژە و رۆشنبیریدا، ئەم چالاكی و رێزلێنانەشی وەك وەفایەك بۆ ئەو هونەرمەندە رەسەنە دیاركرد، كە خزمەتێكی زۆری بە هونەر و فۆلكلۆر و رەسەنایەتی كورد كردووە. دواتر هەریەكە لە بەڕێزان تاهیر عەبدوڵڵا جێگری پارێزگاری هەولێر وتاری پارێزگاری هەولێر و ئینجا هیوا سوعاد وتاری لقی هەولێری سەندیكای هونەرمەندانی خوێندەوە و ڕۆڵ و ئەدای هونەریی مامۆستا عەزیز شارۆخییان بەرز نرخاند.
دوای خوێندنەوەی وتارەكان، لە كۆنسێرتێكی گۆرانی و موزیكدا، عەزیز شارۆخ بە هاوكاریی هاوڕێیانی موزیكژەن دوو گۆرانی پێشكەش بە ئامادەبووان كرد. لە بڕگەیەكی چالاكییەكەدا، بەڕێز ئیسماعیل بەرزنجی بیرەوەرییەكی خۆی لەگەڵ شارۆخ گێڕایەوە.
دكتۆر سالار عوسمان بریكاری وەزارەتی ڕۆشنبیری ولاوان یەكێك لەكار ئەكتەرە چالاك و هەڵسوڕاوە كانی حكومەتی هەریمە لەوەزارەتی ڕۆشنبیری كە لەهەركوێ بۆنی هونەر بێت ئەو لەوێیە و ئامادەیە بۆستایش كردنی كەسانی دڵسۆز بەهونەر لەمەراسیمی ڕێزلێنان لە شارۆخی ئامادەبوو دوای مەراسیمەكە لەواڵی تایبەتی خۆی لەتۆڕی كۆمەڵایەتی فەیسبووك نووسیویەتی.
ـ عەزیز شارۆخ ، دەنگێكی كوردیی ڕەسەن، دەنگێك بۆ كورد ژیا و بۆ كورد گۆرانی چڕی !. ـ لە هەولێری ڕەسەنەوە ڕێز لەو دەنگە ڕەسەنە نرا و پەیامگەلی نێو ئەو ڕێزلێنانەیش ئەوەیە : پێویستە وەك كورد گۆرانی بڵێین و وەك كورد گوێ لە گۆرانی ڕادێرین !. ـ كە ئەمڕۆ ئێوارە دڵ و ڕۆح و ئامێزی شارۆخ ـ مان گوڵباران كرد، ویستمان بڵێین: ئیتر دەبێ بە وەفاوە ئاوڕ لە دڵسۆزەكانی دوێنێ بدەینەوە !.
ـ كە هەولێر مەهاباد لە باوەش دەكات، گەرەكمانە بێژین: ئێمە هەموومان یەكین، بۆیە دەبێ لە دەور ڕووناكی خۆشەویستیدا كۆبینەوە !..
ئەركی ئێمەیە.
لەپەیوەندییەكی تەلەفۆنی خەبات لەگەڵ بریكاری وەزیری ڕۆشنبیری دەربارەی ئەو ڕێزلێنانەی كەلە هەولێر بۆ عەزیز شارۆخ سازیان دابوو گوتی:ئەوە ئەركی ئێمەیە هەركەس خزمەتی هونەری كوردی بكات ئێمەڕێزی لێبگرین، پشتیوانی بكەین،وەدەمەوێیت ئەوەش بڵێم سنوور نەماوە ئێمە ڕێز لەهەرهونەرمەندێك دەگرین كە خزمەت بەهونەر دەكات لەهەرپارچەیەكی كوردستان بێت چونكە كوردستان هەمووی یەكە، هەروەها ئەوەش بەسەرچوو هونەرمەند هەتا وەفات نەكات ئێمە رێزی لێ نەگرین، ئێستا ئێمە بەپێچەوانەوە كاردەكەین هونەرمەندان تا لەژیانن ڕێزیان لێ دەگرین و دەستی ماندوویان دەگوشین. لەماوەی ڕابردووش ئەم هەنگاوەمان بەپراكتیكی جێبەجێ كردووە. هیوادارین ئەم شێوازی ڕێزگرتنە لەهونەرمەندان بەردەوامێیت لەداهاتووشدا.
فەرهەنگ غەفوور بەڕێوەبەری گشتیی رۆشنبیری و هونەری هەولێر لەواڵی تایبەتی خۆی لەتۆڕی كۆمەڵایەتی فەیسبووك نووسیویەتی: هەر كاتێك ناوی موكریان دەبیستین، دەیان یادەوەریی تاڵ و شیرینمان دێنەوە یاد، یادی كۆماری كوردستان لە مەهاباد، یادی پێشەوا قازی و شەهیدانی كۆمار، یادی هونەرمەندانی رەسەن و دەنگ زەڵاڵ، یادی كەڵە شاعیران و ئەدیبان و زمانزانان و زانایان و عارفان و هونەرمەندان و سەنعەتكارانی دەستڕەنگین، یادی مەملەكەتێكی ژینگەپاك و سروشت جوان و رازاوە، یادی رێبوارانی رێی تێكۆشان و زیندووهێشتنەوەی كولتوور و كەلەپووری كوردەواری و زۆر یاد و یاوەریی دیكە، كە هەر یادیان بەخێر. یەكێك لە یادگارییە جوانەكانی موكریان، مامۆستا عەزیزی شارۆخ، كە بە چریكە و دەنگ و ئاوازی رەسەن، شادی و ئارامیی پێ بەخشیوین و هۆگر و هەواداری خۆی كردووین. شارۆخ، دەنگێكی تێر و چریكەیەكی بەرز و هاواری گەلێكی زامدارە، لەناو مێژووەوە هاتووە و لەناو مێژووشدا دەمێنێتەوە.
لەبەشێكی دیكەی نووسینەكەی فەرهەنگ غەفور دەبێژێت: بۆیە ئەركە و پێویستە و لەجێی خۆیەتی، ئەوەی لەتوانادا بێ و بكرێ و بگونجێ، رێز لەو كەسایەتییانە بگیرێ، كە فەرهەنگێك بوونە بۆ نەوەی ئێستا و بۆ داهاتووش. لەو سۆنگەیەوە و بە هەستكردن بە بەرپرسیاریی هونەری و ئەخلاقیمان، ئەمڕۆ وەك بەڕێوەبەرایەتیی گشتی رۆشنبیری و هونەری هەولێر، لە مەراسیمێكی شایستەدا، لە هۆڵی رۆشنبیری لە هەولێر، رێز دەگرین لە تەمەنێك كە لە رێی بەردەوامی و پێشخستنی كاروانی هونەر و ئەدەب و فۆلكلۆر و رۆشنبیریی كوردیدا چووە سەر، رێز دەگرین لە ئاو و هەوای موكریان كە هەوێنی گیانی مامۆستا عەزیز شارۆخ و سەدان شارۆخی دیكەیە.
مامۆستا فەرهەنگ لەدووماهیدا دەڵێت: ئەمڕۆ كە هەولێری ئارامی و كوردایەتی، دەستەخوشكەكەی مەهاباد، لە میوانداریی هونەرمەندی گەورە مامۆستا عەزیز شارۆخ و هاوڕێ موزیكژەنەكانی دایە، زۆر هەست بە ئاسوودەیی و شادی دەكا، كە جارێكی دیكەش لە نزیكەوە، ئەم سیما جوان و پاكە و ئەم دەنگە زەڵاڵە دەبینێ و دەبیسێ، بۆیە هەولێر، وەك ئەمەكناسی و خۆ بەخاوەن زانین، ئەمڕۆ رێز لەعەزیز شارۆخ، رێز لە مەهاباد، رێز لە موكریان دەگرێ و هەزار جار پیرۆزە و كاروان و رێگات هەمیشە پڕ رێبواری پاك بێ، ئەی شارۆخی، چریكە و دەنگە رەسەن و بەسۆزەكەی موكریان.
لە دوا بڕگەی مەراسیمەكەشدا، رێزلێنان لە مامۆستا و هونەرمەند عەزیز شارۆخی دەستی پێكرد و ئەم لایەنانە رێزلێنانی خۆیان پێشكەش بە هونەرمەند كرد: وتەبێژی حكوومەت، وەزارەتی رۆشنبیری، پارێزگاری هەولێر، لقی 2ی پارتی دیموكراتی كوردستان، زانكۆی نۆلیج، لقی هەولێری سەندیكای هونەرمەندانی كوردستان، پەیمانگای لاوكی ئێواران.
