خه‌بات: فاتیح بەرزنجی
بەگوتەی دكتۆر “د. كامیل نامیق” پزیشكی پسپۆڕی نەخۆشیەكانی هەناو و دڵ و بەڕێوەبەری نەخۆشخانەی پسپۆڕی نەشتەرگەری سەنتەری دڵ، ئەو سەنتەرە لەساڵی 2007ەوە توانیویەتی هەزاران كەس لەمردن رزگار بكات بەهۆی ئەنجامدانی نەشتەرگەری دڵ و تاكە سەنتەرە لەسنووری هەولێر، نەخۆشانی شارەكانی دیكەی عێراقیش سەردانی دەكەن بۆ چارەسەركردن و ئەنجامدانی قەستەرەو باڵۆن و نەخۆشانی كوردستان و عەرەبیش سوودێكی بەرچاویان لەو سەنتەرە وەرگرتووە.
نزیكەی 15 پزیشكی پسپۆڕی نەشتەرگەری دڵ لەو سەنتەرە شەوو رۆژ لەخزمەتی هاووڵاتیاندانەو رۆژانە 5-6 نەشتەرگەری ئەنجامددرێت، ئەو پزیشكانەی كەلەسەنتەرەكەدا كاردەكەن و نەشتەرگەری دڵ و قەستەرە و باڵۆن ئەنجامددەن بەشداریان لە مەشق و راهێنان كردووە لە دەرەوەی وڵات و سێ پزیشكی پسپۆڕی دڵ لەوڵاتی ئەڵمانیا گەڕانەوە و لەسەنتەرەكە دامەزراون و دوو لەو پزیشكانە شەبەكەو باڵۆن دەكەن، كە یەكێكیان نەشتەرگەری، كاری ئەنجامدانی نەشتەرگەری كارێكی وا ئاسان نییە و كارەكانیان زەحمەت و ماندووبوونە، جاران نەخۆشانی دڵ بۆ ئەو نەشتەرگەریە سەردانی ولاتانی دەرەوەیان دەكرد، لەبەر نەبوونی نەخۆشخانەی لەمجۆرەی سەنتەری دڵ.
دەربارەی گرنگترین كارەكانیان و زیاد بوونی جەڵتەی دڵ وەك رۆژنامەی خەبات سەردانی نەخۆشخانەی سەنتەری دڵ مان كرد، دكتۆر “كامیل نامیق” بۆ خەبات روونیكردەوە: لەماوەی چەندین ساڵ بەسەركردنەوەی ئەو سەنتەرە و شارەزایی پزیشكانی خۆمان لەكوردستان، نەشتەرگەری دڵ و قەستەرە و باڵۆن لەشاری هەولێر و لەنەخۆشخانەی سەنتەری دڵ بەسەركەوتوویی ئەنجامددرێت، دوای ئەوەی كە ژمارەیەك پزیشكی كوردستان لە دەرەوەی وڵات مەشق و راهێنانیان كرد و شارەزاییەكی تەواویان لەو بوارە وەرگرتووە، ئێستابەهەرزانترین نرخ لەچاو نرخی نەخۆشخانەی ئەهلی و كەرتی تایبەت لە سەنتەری دڵ نەشتەرگەری دڵ و قەستەرە و باڵۆن ئەنجامددرێت و رۆژانە بەبەردەوامی لەو سەنتەرە 5-6 نەشتەرگەری ئەنجامددرێت جگەلەئەنجامدانی 25-30 شەبەكەو باڵۆن و قەستەرە دەكرێ، بەپێی ئەو ئامارەی كەتۆماركراوە ساڵی پار 954 نەشتەرگەری دڵ ئەنجامدراوە و دوو لەو نەشتەرگەریانە نەشتەرگەری گەورە و دەگمەن بوون، وەك ئەو نەشتەرگەریەی كە بۆ منداڵێك ئەنجامدرابوو كەبۆیەكەمجارە ئەو جۆرە نەشتەرگەریە بەهاوكاری تیمێكی وڵاتی هیندستان بوو، نزیكەی هەشت كاتژمێری خایاند و بەسەركەوتوویی كۆتاییهات، لەبەر زۆری ژمارەی نەخۆشان و بچووكی نەخۆشخانەكە و زۆری سەردانیكردنی خزم و كەس و كاری نەخۆش هەراسان بووین، پێویستە كەس و كاری نەخۆش هاوكاریمان بكەن، ئەویش بەكەمكردنەوەی سەردانیكردنی نەخۆش و چەندین جار تەختەی خەوتنی نەخۆشان لەلایەن كەس و كاری نەخۆشەوە شكاوە، بۆ ئەووی نەخۆشخانەكەش گەورەتر بكەین هەوڵماندا پارچە زەویەكی تەنیشت نەخۆشخانەكەمان وەربگرین، تانەخۆشخانەكە فراوانتر بكەین، بەسوپاسەوە لەلایەن رێزدار “نێچیرڤان بارزانی” سەرۆكی ئەنجومەنی وەزیران رەزامەندی وەرگیرا تا باڵەخانەكە دروستبكرێت، جگەلەوەش لەگەڵ باڵەخانەكەش بڕیارە دوو ئامێری قەستەرەی تازە دابینبكرێت و رەزامەندی بۆ ئەو ئامێرانە وەرگیراوە و بودجەشی بۆ دابینكراوە، پەنا بەخوا لەماوەی یەك ساڵدا باڵەخانەكە تەواو دەبێت، لەو حاڵەتەشدا دەتوانین 45 قاوشی خەوتنی نەخۆش بكەینەوە، لەئێستادا نزیكەی 110 تەختی نەخۆشمان هەیە، دوای فراوانكردنی دەبێتە 200 تەختی نەخۆش.
دواتر دەربارەی زیادبوونی جەڵتەی دڵ بەڕێوەبەری نەخۆشخانەی سەنتەری دڵ گوتی:چەندین هۆكار هەیە بۆ جەڵتەی دڵ وەك وەرزش نەكردن و نەجووڵان و خواردنی فاست فود و خێرا لەهەمووی گرنگتر كێشانی نێرگەلەو جگەرە لەلایەن توێژی گەنجانەوە و رۆژانە ژمارەیەك لە گەنجان سەردانیمان دەكەن و باس لەكێشانی نێرگەلە و جگەرە دەكەن و دەڵێن رۆژانە 3-4 جار نێگەلەو 2-3 پاكەت جگەرەش دەكێشم، كە ئەو گەنجانەش تەمەنیان لە نێوان 20-25 ساڵانن و لەو تەمەنە كورتەی ژیانیاندا تووشی جەڵتەی دڵ دەبن، بۆیە پێویستە بەزوویی ئەو شتانە واز لێبهێنن، بۆئەوەی خۆیان لە جەڵتەی دوور بخەنەوە، پێویستە ئەو گەنجانە ئەو راستیە بزانن كە نێرگەلە جگە لە خراپی تووشی جۆرەها نەخۆشیت دەكات، بەتایبەتی ئەو كەسانەی لە گازینۆكان نێرگەلە دەكێشن تووشی نەخۆشی سیل و نەخۆشی سینگ دەبن، داوایان لێدەكەین كە تازووە دوور بكەونەوە لە كێشانی نێرگەلە و جگەرە، هەقوایە وەزارەتی تەندروستی بەهاوكاری لایەنە پەیوەندیدارەكان یاسایەك دابنرێت بۆ نێرگەلەی نێو گازینۆكان، تا سنوورێكی بۆ دابنرێت و ئەو شوێنانە لە ژێر چاودێری لایەنە پەیوەندیدارەكانەوە دابن.
دواتر دكتۆر “كامیل نامیق”گوتی: لەسەنتەری دڵ نرخی نەشتەرگەریەكان گران نین لەچاو نرخی نەخۆشخانە ئەهلیەكان، ئەو بڕە پارەیەی كە وەریدەگرین لە نەخۆشان، نرخەكەی زۆر هەزانترە و بۆ ئەنجامدانی نەشتەرگەری دڵ نزیكەی 3 ملیۆن دینارە و لەنەخۆشخانە ئەهلیەكان نرخەكە یەكجار گرانترە، لە ئەنجامدانی قەستەرە 300 هەزار دینارو نرخەكە لە دەرەوەی سەنتەرەكە بە60-70 وەرەقەیە، بۆیە نرخەكان لە ئەنجامدانی نەشتەرگەری دڵ بۆ منداڵان لەسەر ئەكی مەكتەبی سەرۆكی حكوومەتی هەرێمی كوردستان نەشتەرگەریەكان ئەنجامددەن.
