خه‌بات: سەردار حوسێن
هەرگیز لەوە ناخۆشتر نییە ئیش لەسەر هاوكار و هەڤاڵێكی ئازیزت بكەیت، كە تەمەنێكی پڕ لە یادەوەریت لەگەڵی هەبێت و تەنهاش چل رۆژ بەسەر مەرگی ناوادەی تێپەڕی بێت، وەلێ دواجار یادەكردنەوەیش باشترە لە لەبیرچوونەوە. سەید محەمەد سەروچاوەیی رۆژنامەنووس و پەیامنێری چالاكی رۆژنامەی خەبات، كە دوایین چركەساتەكانی تەمەنیشی هەر لە نێو ئۆفیسی رۆژنامە بردەسەر، لەم راپۆرتەدا كە تایبەتە بە تێپەڕبوونی چل رۆژ بەسەر مەرگی لەناكاوی سەید محەمەد سەروچاوەیی، خەیام سەید محەمەد لەبارەی باوكییەوە قسە بۆ خەبات دەكات، ژمارەیەك لە هەڤاڵ و هاوكارانی لەم راپۆرتەدا بیرەوەرییەكانیان لەگەڵی دەگێرنەوەو بۆ بەرزراگرتنی گیانی بەرزەفڕی ئەو ئازیزەمان راپۆرتە بڵاونەكراوەكانی بڵاو دەكەینەوە.
سەلام عەبدوڵڵا سەرنووسەری رۆژنامەی خەبات، لەچلەی كۆچی دوایی ڕۆژنامەنووس سەید محەمەد سەروچاوەیی دەڵێت: سەر لەبەیانی ڕۆژی 2018/12/16 ڕۆژنامەی خەباتی كارمەندێكی چالاكی لەدەستدا كە لەبارەگای ڕۆژنامەكەمان گیانی سپارد.
سەید محەمەد كە ڕۆژنامەنووسێكی خاوەن ئەزموون و چالاك لە زۆر بواردا یەكێك لەو ڕۆژنامەنووسانەبوو كە چاوەڕێی داهاتوویەكی گەشی لێدەكرا، چونكە خۆیشی ئەو بوارەی كردبووە شوێنی تواناكانی كە لەزۆر بواری دیكەشدا هەیبوون.
سەید محەمەد بەو ئەزموونە دوورودرێژی كە لەبوارە جیاجیاكاندا هەیبوو تێكڕای تواناكانی خستبووە خزمەت ڕۆژنامەی خەباتەوە و بەردەوام ڕاپۆرتی سیاسی و شیكردنەوەی مەیدانی هەبوو.
ئەگەرچی لەو بوارەدا زۆرجار تووشی ناڕەحەتیش دەبوو، چونكە ئەو شوێنەی ئەو دەربارەی دەدوا جێگەی زۆر هەستیار بوو، بەتایبەتی كە هێزێكی چەكداری بەهێز لەو ناوچانە هەبوو كە لەگەڵ بیروڕای سەیدیشدا ناكۆك بوو لەگەڵ بوو لەگەڵ ئەوەشدا، بێ گوێدانە مەترسیەكانی سەر ژیانی ئەو كاری خۆی بە بەردەوامی دەكرد زوو زوو ڕاپۆرت و نووسینی سەبارەت بە دۆخی ناوچەكە بۆمان دەنارد.
سەید محەمەد، چونكە لە بنەماڵەیەكی تێكۆشەر بوو هەرگیز گوێی بە مەترسییەكانی سەر ژیانی نەدەدا بەتایبەتی كە خۆی هەر بەتەمەنی یەك ساڵی باوك و دایكی چووبوونە جیهانی نەمری یەوە و سەختی ژیانیان بۆ سەید محەمەد بەجێهێشبوو، وەكو كوڕی گەورەی ماڵ، بۆیە ئەركی پێشگەیاندن و پەروەردەكردنی براو خوشكەكانی گرتبوونە ئەستۆ و سەربەرزانە هەموویانی پێگەیاند.
سەید محەمەد لە بواری هونەریشدا ئەسپی خۆی تاودابوو و ئەكتەرێكی سەركەوتوو بوو، هەروەك یارمەتیدەرێكی هەمیشەیی دەرهێنەربوو كە بەسەرنج و تێبینییەكانی هەمیشە كاری شانۆیی دەوڵەمەندتر دەكرد.
هەزاران سڵاو لە گیانی ئەو شەهیدە كە تا دوا چەكەكانی ژیانی لە خەبات لەنێو خەباتدا بەردەوام و هەر لەوێش گیانی بەجیهانی ڕۆژنامەگەری بەخشی.
دلشاد وەسانی بەڕێوەبەری نووسین لە رۆژنامەی خەبات، كە تەمەنێكی زۆر و بەردەوام ئاگای لە كاروچالاكییەكانی سەید محەمەد سەروچاوەیی بووە، دەڵێت: سەید محەمەد سەروچاوەیی رۆژنامەنووسێك بوو، زۆر گرنگیی بە كشتوكاڵ و بوژاندنەوەی كوردستان و ئاوەدانكردنەوەی گوندەكان دەدا، دەتوانم بڵێم سەید محەمەد ڕۆڵی لەوەدا هەبوو كە میدیای كوردی گرنگی بە گوندنشین و كشتوكاڵ بەشێوەیەكی گشتی بدات، ئەو كەسێك بوو تێكەڵاوی گوندنشین و رەوەندەكان بوو، هەمیشە لە كوێستانەكانەوە راپۆرتی لەبارەی ئاژەڵداری لە كوردستان ئامادە دەكرد. سەروچاوەیی پێ بەپێ لەگەڵ رەوەندەكان بەرەو كوێستان هەڵدەكشا، زۆرجاریش تەلەفۆنی بۆ دەكردم دەیگوت ئەمڕۆ لە فلان گوندم چ راپۆرتێك بكەم، یان دەیگوت راپۆرتێكم لەبەردەستە چ تێبینی و سەرنجتان چییە، ئەوەی سەید محەمەد دەیكرد، كارێك بوو بە هەموو رۆژنامەنووسێك نەدەكرا، ئامادەبوو بە حەفتە ماڵ و منداڵی خۆی بەجێبهێلێ و بە كۆڵەپشتەكەیەوە روو لە گوندو ئاواییەكانی بناری قەندیل بكات، لە هەموو وەرزەكانی ساڵ و هەواڵ و راپۆرتی دەربارەی گوندەكان ئامادە دەكرد، كەسێك بوو پیشەكەی خۆی خۆشدەویست.
سەید محەمەد تەنانەت لەكاتی تۆپبارانكردنی گوندەكانی بناری قەندیلیش لە لایەن وڵاتانی دەوروبەر هەر لەناو گوندنشینان دەمایەوە، بۆیە لای خەڵكی گوندەكانی بناری قەندیل خۆشەویست بوو، چەند جارێك لەكاتی تۆپباران پەیوەندی پێوە دەكردین، لەگەرمەی تۆپباران هەواڵەكانمان بەدەنگ لێوەرگرتووە.
سەید محەمەد سەروچاوەیی لەو كاتەوە كە لە رۆژنامەی خەبات دەستی بە ئیش كرد، زۆر جار ئاگاداری دەكردمەوە كە هەندێ میدیا و ئاژانسی هەواڵ داوای هەواڵ و راپۆرتیان لێ دەكرد، دەیگوت ئەگەر رازی نەبن راپۆرت و هەواڵیان بۆ ئامادە ناكەم، ئەگەرچی هیچ دەزگایەكی میدیا قبوڵ ناكات رۆژنامەنووسەكانی لە دەزگای دی كاربكەن، بەڵام من دەمزانی كە كاك سەید محەمەد خاوەن منداڵە و جگە لەو مووچە متەوازعەی خەبات، هیچ مووچە و سەرچاوەیەكی دیكەی نییە، بۆیە پێم دەگوت بە مەرجێك رازی دەبین كاریان لەگەڵ بكەی كە بەخۆبەخش و خۆڕایی نەبێت، چونكە ئەو پیاوە بۆ هاوكاریكردن سەری پێوە نەبوو، دەمزانی ئەو دەزگایانەی داوای هاوكاریكردنیان لێ دەكرد، سوودی لێ وەردەگرن و دەزگای خێرخوازیش نەبوون، تا ئەویش بەخۆڕایی كاریان لەگەڵ بكات، بۆیە پێم دەگوت ئەگەر وەك سەرچاوەی دیكەی پەیداكردنی داهات مامەڵەیان لەگەڵ دەكەی كاریان بۆ بكە، وەك باسم كرد لەبەرئەوەی هەواڵ و راپۆرتەكانی تایبەت بوون بە ژیانی گوند و ئاژەڵداری، وایكردبوو ئەو لایەنەی ژیانی خەڵكی كوردستان ببێتە جێی بایەخی میدیا، بۆیە دەزگاكانی میدیا زۆر جار روویان لە سەید محەمەد دەكرد بۆ ئەوەی هاوكاریان بێت، بۆیە سەید محەمەد رۆڵی دیاری لە گرنگیدان بە گوند و ژیانی گوندنشین و رەوەندەكان هەبوو، دەتوانم بڵێم كاری رۆژنامەنووسیی ئەو تایبەت بوو بەو لایەنەی ژیانی خەڵكی كوردستان.
لەلایەكی دیكەشەوە، سەید محەمەد كەسێكی زۆر رۆح سوك بوو، زوو جێی خۆی لە نێوان دۆست و برادەرەكانی دەكرەوە، كەسێك بوو دەیتوانی لەگەڵ هەموو چین و توێژ و گەورە و بچووكدا هەڵ بكات، لای تەواوی رۆژنامەنووس و كارمەندانی خەبات خۆشەویست بوو، لە چلەی كۆچی دوایی خوالێخۆشبوو سەید محەمەد سەروچاوەییدا، هەزاران سڵاو بۆ گیانی پاكی دەنێرین و لە خوا دەپاڕێینەوە جێگەی ئەو هاوكارو هەڤاڵەمان بەهەشت بێت و سەبووری بە خانەوادەو كەسوكاری ببەخشێت، هاوژین و منداڵەكانی تەمەن درێژ بن و منداڵەكانی لە خوێندن و ژیانی رۆژانەیاندا سەركەوتووبن.
كەریم قادر بەڕێوەبەری پێشووی نووسین لە رۆژنامەی خەبات، یەكێك لەو هەڤاڵانەی سەید محەمەد سەروچاوەیی بوو، كە ساڵانێكی زۆر دۆستایەتییەكی بەهێزیان لە نێواندابووەو بەردەوام سەروكاریان بەیەكەوە هەبووە، لە چلەی خوالێخۆشبوو سەید محەمەدی هاوكارمان دەڵێت: هەواڵی كۆچی ناوادەی هاوكار و دۆستی كارم سەید محەمەد سەروچاوەیی تاساندمی، ئاخر هێشتا زوو بوو دەست لەم دنیایە هەڵبگرێت، كە بە قەولی خۆی زۆر شتی گرینگ مابوو بیكات هەم بۆ خاناوادەكەی هەم بۆ گەلەكەی.
كاك سەردار داوام لێدەكات لە چلەكەیدا بەسەرهاتێكی نێوانمان بگێڕمەوە، كە لەم دنیا پڕ لە كێشەیەدا بەم دەمودەستە شتێكی ئەوتۆی شایەن بە دۆستایەتی من لەگەڵ كاكە سەیدم وەبیرنایەتەوە، یا رەنگە لەبەرئەوە بێت، هەرگیز حەزی من نەبووە دوای مەرگ لەبارەی دۆستەكانمەوە بنووسم، ئەگەر لە ژیاندا كارێكم بۆ نەكردبن و دڵم ئاسوودە نەكردبن.
بۆیە بە ناچاری و لەبەر خاتری كاك سەردار دەنووسم: رۆژنامەی خەبات بووە هۆكارێك، كە من كاكە سەید محەمەد بناسم. ئەو عادەتەن درەنگ درەنگ سەری دەدا، بەردەوام لە شاخ و كێوە دوورەدەستەكان بە دوای هەواڵەكانی ئەو ناوچانە بوو، كە بەلامانەوە گرینگ بوو. خوا هەڵناگرێ بە پێی پێویست پەیوەندی پێ دەكردم و دەیگوت: لە فلان لامل و ترۆپەكەوە سڵاوت لێبێت.
بۆیە كە دەهات زۆر بە كۆڵە پشتەكەی سەرسام دەبووم، كە بە زەحمەت شتەكانی تێوە نابوون، دەبێت ئەمجارە چی بۆ خەبات تێدا بێت، لە هەمووشی خۆشتر، ئەو پێش ئێمە دەگەیشت، كە ئێمە دەگەیشتینە دەوام ئەو لەوێ بوو لە چاوەڕوانی ئێمەدا بوو، یەكسەر بە كۆمێنتێك و نوكتەیەكی نوێ، بێگومان بە شێوەزاری خۆی، كە تامو بۆیەكی دی بە كۆمێنت و نوكتەكە دەدا دەرگای قسەی دەكردەوە، دواتر دەچووینە ناو بابەتگەلێك، كە خۆشمان نەماندەزانی باسی رەوشی هەر چوار پارچە بە زۆر لێكدابڕاوەكەمان و هەردوو دنیامان كردووە. بێگومان چایە و جگەرەش بەردەوام لە گفتوگۆكانماندا ئامادە بوون.
لەم بۆنەیەدا جارێكی دی سەرەخۆشی لە خۆم و هاوكارانم لە رۆژنامەی خەبات و خانەوادەكەی سەید محمەد دەكەم و لەسەر قەوڵی باوی كۆمەڵگاكەمان لە خوای گەورە داواكارم بیخاتە بەر رەحمەت و دلۆڤانی خۆی.
عەزیز كوێخا رەسوڵ بەڕێوەبەری كارگێڕی رۆژنامەی خەبات، وێڕای ئەوەی لەو ماوە زۆرەی خوالێخۆشبوو لە رۆژنامەی خەبات كاری كردووە بەردەوام كاریان بەیەكەوە هەبووە، هاوكات لە دوایین چركەساتەكانی ژیانیشیدا لە نەخۆشخانە لەگەڵ سەید محەمەد بووە، ئەو دەڵێت: “سەید محەمەد سەروچاوەیی تەنها رۆژنامەنووسێكی چالاك نەبوو، بەڵكو پیاوێكی خۆشەویست و قسەخۆش بوو، زۆرجار حەزم دەكرد زوو ئیشوكارەكانی رایی نەكەم بۆ ئەوەی زۆرتر لەلام بمێنێتەوە، مانەوەی سەید محەمەد لە هەر كۆڕ و دانیشتنێكی دۆستانە تاموبۆیەكی جیاوازی بەو دانیشتنە دەدا، هەمیشە حەزمان دەكرد سەید محەمەد قسە بكات و ئێمە گوێ بگرین، ئەو رووداوە ناخۆش و تاڵەكانیشی بە نوكتە و پێكەنین دەگێڕایەوە، هەموو ئەو بیرەوەرییانەی لەگەڵ كاكە سەیدی خۆشەویست هەمانە شیاوی گێڕانەوەن، بەڵام رەنگە ئەم دەرفەتە بۆ ئەوە نەبێت بیروەرییەكانی تیادا بگێڕینەوە، بۆیە بەگشتی دەمەوێ باس لەوە بكەم ئەو هەمیشە پیاوێكی خاوەن هەڵوێست بوو، لە كارەكەی پێشەنگ و پیاوێكی راستگۆ و دەستپاك بوو، ئەوەندەی پەیوەندی لەنێوان من و ئەودا بووە، هیچ كاتێك كەموكوڕییەكم لێی نەبینیووە، قەناعەتی بەو بڕە مووچە كەمە هەبوو كە ببووە بژێوی ژیانی خۆی و خانەوادەكەی، دەیویست سەربەرزانە بژی و رەنجی خەبات و ماندووبوونی خۆی بچنێتەوە، بڕوای بە پیشەكەی هەبوو و بەئەمانەتەوە كارەكانی ئەنجام دەدا، زۆرجار دەیگوت: پێمخۆشە سەرم لێبدەن و خزمەتتان بكەم، پیاوێكی دەست و دڵ فراوان بوو، لەگەڵ ئەو ژیانەی خۆی راهات بوو، ئێستایش دوای تێپەڕبوونی چل رۆژە بەسەر كۆچی دوایی سەید محەمەدی هاوكارمان بەپێویستی دەزانم یادی ئەو رۆژنامەنووسە چالاكە بەرز رابگیرێت و ئەوەندەی لەتواناشدا هەبێت هاوكاری خانەوادە و كەسوكارەكەی بكرێت، دروود بۆ گیانی كاك سەید محەمەد و خوای گەورە سەبووری هەموومان بدات و منداڵ و خانەوادە سەربەرزەكەی سەركەوتووبن.
سەردار حوسێن بەرپرسی پەیامنێران و لاپەڕەی ریپۆرتاژی رۆژنامەی خەبات دەڵێت: سەید محەمەد سەروچاوەیی هاوكار و هەڤاڵێكی ئازیزی ئێمە بوو، دەتوانم بڵێم لە تەواوی تەمەنی كاركردنی سەید محەمەد لە خەبات ئاگاداری كارو چالاكییەكانی بوومە و بەهۆی تایبەتمەندی پیشەكەم لینكی بەردەواممان بەیەكەوە هەبووە، ئەو جگە لەوەی پەیامنێرێكی چالاكی بەشەكەی ئێمە بوو، زیرەكانەش مامەڵەی لەگەڵ ئەو بارودۆخە دەكرد كە لە سنووری دەڤەرەكەی ئەودا هەبوو، بۆیەش زۆرجاران بە پەیامنێری سەرسنوور و پەیامنێری شاخ ناومان دەبرد، هەمیشە بۆ ئەنجامدانی راپۆرت و دیمانەكانی پرسی دەكرد و دەیگوت: نامەوێ كارێك بكەم لەگەڵ ستایل و سیاسەتی رۆژنامەكەم نەگونجێ، نامەوێ شەرمەزاری ئێوە و ئەو كەسانەیش بم كە لێدوانمان پێ دەدەن و دیمانەیان لەگەڵ دەكەم، تایبەتمەندییەكی دیكەی سەید محەمەد ئەوەبوو رۆژنامەنووسێكی بە سەلیقە و پشوو درێژ بوو، نەیدەزانی ماندووبن چییە و مكوڕ بوو لەسەر ئەنجامدانی ئەو كارانەی مەبەستی بوو بیكات. مەخابن مەرگ مەودای نەدا كاكە سەید زۆرتر لەگەڵمان بەردەوام بێت و هەرگیزیش دوایین قسەكانیم بیرناچێتەوە كە لەرۆژی كۆچكردنی یەكجارەكی لە ژوورەكەی مندا كردی، بەڕاستی كۆچێكی لەناكاو و مەرگێكی ناوادەبوو، بۆیە تا ئێستایش هەموومانی تاساندووە و لەخوای گەورە داواكارین سەبووری بە خانەوادەكەی بدات و گیانی سەید محەمەد بە بەهەشت شاد بكات و خێزان و منداڵەكانی سەركەوتوو بكات.
هاوكارمان نووسەر مەسعوود پەرێشانیش لەو یادەدا دەڵێت: لێرەوە دەمەوێ بەكورتی ئەو راستییە بڵێم كە كاكە حەمە ماندوو بوونی نەدەزانی، شەو و نیوەشەو هەواڵی خێرا و گەرم و گوڕی قەندیل و ناوچەكەی بۆ دەناردین، هەمیشە وەكو كارمزێكی بناری قەندیل لە هەڵبەز و دابەزدا بوو بەجۆرێك خۆشەویستی و متمانەی خەڵكیشی بەدەست هێنابوو.
چەندرۆژێك لەمەوبەر كە خانەوادەكەی هاتنە لامان و لەگەڵ سەرنووسەرو هەڤاڵانی دیكە پێشوازیمان لێكردن، لەوە گەیشم كە منداڵگەڵێكی وشیاری هاوشێوەی خۆی بەجێ هێشتوون، كە هەر هەموویان لەخۆی دەچن و مایەی ئومێدی هەموو لایەكمانن، خودا وەبەر دڵۆڤانی خۆی بخات و بەبەهشتی بەرینی خۆی بسپێرێ ر و ماڵ و منداڵەكانیشی بەسەربەرزی بهێڵێتەوە.
پرۆفایلی رۆژنامەنووس سەید محەمەد سەروچاوەیی
سەید محەمەد سەروچاوەیی رۆژنامەنووس و پەیامنێری رۆژنامەی خەبات، لە ساڵی 1971 لە رانیە لەدایكبووە و ماوەی 14 ساڵ كاری رۆژنامەوانی كردووە، لە تەمەنی یەك ساڵیدا دایك و باوكی بەهۆی رووداوێك شەهید دەبن و خۆی و خووشكە بچووكەكەی بە تەنها دەمێننەوە، لەگەڵ هەموو سەختی و ناخۆشییەكانی ژیاندا توانیوویەتی تا پۆلی شەشەمی ئامادەیی بخوێنێت و بەردەوامیش كاری كردووە بۆ پەیداكردنی بژێوی ژیان. لە ساڵی
1982 دەستی بەكاری نواندن كردووە و لەگەڵ تیپی شانۆیی سەروچاوە وەك ئەكتەر و یاریدەدەری دەرهێنەر خزمەتی بە بواری هونەریی دەڤەرەكە كردووە، لە ساڵی 2005 دەستی بەكاری رۆژنامەوانی كردووە و زۆربەی راپۆرت و هەواڵ و بەدواداچوونەكانی لە رۆژنامەی خەبات بڵاو كردۆتەوەو لە چەندین رادیۆ و سایتیش بەهەواڵ و راپۆرت بەشداریی كارای هەبووە. ئەو بەپێی ئەو پێگە جوگرافییە سەختەی لە سنووری كارو چالاكییەكانیدا بوو، تەنها بۆ رۆژنامەی خەبات نا، بەڵكو بۆ ژمارەیەكی دیكەی دەزگا میدیاییەكان سەرچاوەی هەواڵ و زانیاری میدیایی بوو، زۆرتر گرنگی بە ژیان و گوزەرانی رەوەند و جووتیارانی ناوچەكە دەدا و هەمیشەیش لە خەمی بۆردومان و تەنگژە و ئاریشەكانی سەرسنوور و ئەو بارودۆخە نائاسایی و لەناكاوانەدا بوو، كە نەخوازراوانە روویان لەو دەڤەرە دەكرد.
سەید محەمەد سەروچاوەیی لە ساڵی 1987 هاوسەرگیری لەگەڵ خانمێكی سەربەرز كردووە و دوو كوڕ و پێنج كچی لەدوای خۆی جێهیشتووە و لە رۆژی 16/12/2018 بەهۆی جەڵتەی دڵ بۆ یەكجاری ماڵئاوایی لە ژیان كرد.
