یەحیا فایەق جاف
بەربژێركردنی هەردوو بەڕێزان جەنابی كاك نێچیرڤان ئیدریس بارزانی بۆ پۆستی سەرۆكی هەرێم و كاك مەسروور بارزانی بۆ پۆستی سەرۆكی حكوومەتی هەرێم، هەنگاوێكی دروست و حەكیمانەی پارتی دیموكراتی كوردستانە بۆ ئەمڕۆی كوردستان و ناوچەكە، بەتایبەتی دوای ئەوەی جەنابی سەرۆك مەسعود بارزانی ئامادەنەبوو پۆستی سەرۆكی هەرێم وەربگرێتەوە، ئەم دوو دەستنیشان كردنە لەلایەن سەركردایەتیی پارتی دیموكراتی كوردستانەوە بۆ ئەمڕۆی سیاسیی و ئابووری كوردستان، دوو دەستكەوتی گەورە و پڕ بەرهەم دەبێت، چونكە پارتی دیموكراتی كوردستان دوو سەركردەی بە توانا و لێهاتووی خۆی بۆ ئەم ئەركە گەورە نیشتمانییە ڕاسپاردووە، زۆربەی شارەزایان پێشبینی ئەوە دەكەن، بەرهەمی ئەمەش بەزوویی لەسەر ژیان و بژێوی كوردستانیان دەردەكەوێت. با بێمەوە سەر كرۆكی بابەتەكە كە من مەبەستمە لێرەدا تۆزقاڵێك لەسەری بدوێم، بێگومان ئەستەمە هەبێت بتوانێت نكۆڵی لەوە بكات، كە جەنابی كاك نێچیرڤان ئیدریس بارزانی دیبلۆماتێك و سیاسەتمەدارێكی لێهاتووی ئەمڕۆی گۆڕەپانی سیاسیی كوردستان و عێراق و ناوچەكەیە، پشت ئەستوور بەو باكگراوەندە دەوڵەمەندەی كە لە خەبات و تێكۆشانی كوردپەروەرانەی باب و باپیران و مێژووی پڕ سەروەریی بنەماڵە شۆڕشگێڕەكەیەوە بۆی ماوەتەوە، جەنابیان ئەمڕۆ بووەتە ژمارەیەكی هەرە دیار و گرنگی گۆڕەپانی سیاسی و ئاشتی و ئابووری كوردستان و ناوچەكە و، جەنابیان یەكێكە لەو سەركردە لاوانەی كە هەر لە سەرەتای بەرپرسیارێتییەوە لە حزب و حكوومەت، خاوەن كاریزمایەكی نموونەیی و سەركەوتوو بووە، لە ساتە خۆش و ناخۆشەكانیشدا دا توانیووێتی بە لێهاتوویی خۆی، لە چارەسەركردنی كێشەكاندا زووبانی هەڕەشە و خۆگیڤكردنەوە و پەنجە ڕاوەشاندنی بەرانبەرەكان بگۆڕێت بۆ دیالۆگ و لێكحاڵیبوون و چارەسەری ئاشتییانە. خۆ ئەگەر پێویست بە نموونە هێنانەوەش بكات، بێشك نموونەكان لەم ڕووەوە گەلەك زۆرن، نزیكترین نموونەش دوای ڕیفراندۆمە سەركەوتووەكەی گەلی كوردستانە، بەسەرپەرشتی و سەرۆكایەتی جەنابی سەرۆك مەسعود بارزانی، بینیمان بەڕێزیان چلۆن بە لێهاتوویی خۆی ڕووبەڕووی لێككەوتەكانی پاش ڕووداوەكانی 16ی ئۆكتۆبەر بووەوە، خەمخۆری و دڵسۆزیی جەنابیان بووە هۆی ئەوەی، قەوارەی هەرێمی كوردستان لەو پیلانگێڕییە هەمەلایەنەیە، كە لەلایەن گرووپی شانزەی ئۆكتۆبەر و هاوپشتەكانیانەوە بەرنامەداڕێژی بۆ كرابوو لە ناوچوون بپارێزێت! بەڵێ، جەنابیان بە هێمنی و عەقڵمەندی خۆی توانی شكست بە پیلانی پیلانگێڕان بێنێت و لەگەڵیشیدا كێشمەكێشی نێوان بەغدا و هەرێم بە تێڕوانینی حەكیمانە و دووربینی خۆی بەرەو ئاقاری هێوركردنەوە و ئارامی بەرێت، واقیعبینی و خوێندنەوەی ڕاست و دروستی بەڕێزیان بۆ ئەو كاتی دۆخەكە، بووە هۆی ئەوەی، زووبانی گفتوگۆ و دیالۆگ زاڵبێت و هەمدیس وڵاتان بێنەوە پێشەوە و پشتگیری لە جەنابیان و هەوڵە ئاشتیخوازانەكانی بكەن، هەر ئەمەش وایكرد لە پای شەڕ و تانك و تفەنگ و چاوسووركردنەوە كوشتن و ماڵوێرانی، زمانی دیالۆگ و ئاشتی و لێكحاڵیبوون سەركەوێت، ئەم هەوڵە دیبلۆماسییەی جەنابیان ئامانجی تەواوی خۆی پێكا، ئەمڕۆش هەمووان بەرهەمی ئەو دووربینییەی جەنابیان لەسەر ژیانی یەكە یەكەی هاووڵاتییانی عێراق و كوردستان و ناوچەكەش دەبینن. لە ڕووی (وزە) و ئاوەدانییەوە، هیچ گومان لە ڕۆڵی جەنابیان نییە، ئەو پێشكەوتنانەی ئەمڕۆ لە هەرێمەكەمان لەم ڕووەوە بە دەستهاتوون، بە هەوڵ و هیمەت و دووربینی جەنابیان بووە، بەڵێ هەر سیاسەت و دووربینی جەنابیان و پارتی دیموكراتی كوردستان بوو وای كرد، هەرێمی كوردستان بچێتە نێو نەخشەی وزەی جیهانییەوە، ئەوەتانێ ئێستا ڕۆژ دوای ڕۆژ، كۆمپانیا گەورەكانی وزە و ئاوەدانی ڕوو لە هەرێمەكەمان دەكەن، ئەوەی ئەمڕۆ دەیبینین لەم لایەنەوە بەرهەمی ئەو سیاسەتە ڕاست و درووست و بەرچاو ڕوونییەی بەڕێزیان بووە بۆ ئەمڕۆ و ئایندەی هەرێمی كوردستان، سوپاس بۆ خودا ئەمڕۆ كوردستان بووەتە خاوەن وزەی خۆی و ڕۆژ دوای ڕۆژ هەنگاوەكان لە خاسەوە بەرەو خاستر ئاستەنگییەكان دەبڕن. لە ماوەی حوكمڕانێتی جەنابیاندا، بەتایبەتی لە سەردەمی كابینەی هەشتەمدا، زۆر ئاستەنگ و كێشەو پیلانگێڕی بۆ دروستكرا، سەرەڕای هەموو ئەو ئاستەنگ و پیلانگێڕیانەی دژ بە حكوومەتەكەی و خودی خۆشی وەكو كادیرێك و سەركردەیەكی لێهاتووی پارتی دروست دەكران، بەڕێزیان توانی ئەم دۆخەش بە لێهاتوویی تێپەڕێنێت. شەڕی داعش و بڕینی مووچە و پیلانگێڕی نێوخۆیی و دەرەكی و كشانەوەی هەندێك لایەن لە كاتێكی زۆر ناسك و هەستیاردا لە حكوومەتەكەی، نەبوونە هۆی ئەوەی جەنابیان لە ئەركە نیشتمانییەكەی ساردبكەنەوە و سەرئەنجام لە ڕووبەڕوبوونەوەی هەموو ئەو گرفت و كێشانەدا سەركەوتوو بوو، هەر ئەمەش وایكرد جەنابیان بە حیكمەت و هێمنی خۆی، بەسەر كۆی ئەو پیلانگێڕیی و پیلانگێڕانەدا زاڵ بێت و دۆخەكەی هەنگاو بە هەنگاو لە گرژی و ئاڵۆزیی و نائومێدییەوە گۆڕی بۆ هیواو و ئومێد و بڕوا بەخۆبوون. بێگومان لەم جیهانەدا هیچ حكوومەت و دەسەڵاتێك بێ كەمووكوڕی نییە و ناشبێت، جێی داخە لە سەردەمی كابینەی هەشتەم هەندێك بەرپرس لە ئاست متمانەی جەنابی كاك نێچیرڤان ئیدریس بارزانی دا نەبوون، بەشێوەیەك لە شێوەكان بەرژەوەندیی كەسیی خۆیان وەپێش بەرژەوەندی میللەت و حزبەوە خست، بوونە جێی ڕەخنەی زۆری هاووڵاتییان بەگشتی و ئەندامانی پارتی دیموكراتی كوردستان بە تایبەتی. ئێستاش كە جەنابیان نزیكە لەوەی ئەم پۆستە جێ بێڵێت و ئەركێكی نیشتمانیانەی گەورەتر وەربگرێت، دەبێت هەمیشە ستایشی خۆڕاگری و ماندووبوونی بەڕێزیان بكەین، چونكە ئەوەی جەنابیان لەم چەند ساڵەی دواییدا كردی و ئەنجامی دا كاری گەورەبوون، بەرانبەر ئەو پیلانگێڕییە زۆرانەی كە دژ بە بەڕێزیان و كابینەكەی لە ئارادابوون. ئەوەی پەیوەستە بە كابینەی نۆیەمیشەوە، تا كاتی نووسینی ئەم چەند دێڕە هیچ ڕووینەداوە و سەرەداوەكانیش تا هەنووكە دەرنەكەوتوون، جیا لە چەند دیدارێك نەبێت، بەڵام پێش دروستبوون و دەستبەكاربوونی ئەم كابینەیە، پێشبینی ئەوە دەكرێت، كە بە دروستبوونی ببێتە یەكێك لە كابینە هەرە سەركەوتووەكان، هەر لە ئێستاشەوە ئەم كابینەیە بووەتە جێگای ستایش و دڵخۆشی زۆری هاونیشتمانیان، بەتایبەتی كە پاڵێوراو بۆ پۆستی سەرۆكی حكوومەت، جەنابی كاك مەسروور مەسعود بارزانی یە، كە دەرچووی هەمان قوتابخانەی بارزانیی نەمر و ڕۆڵەی بە ئەمەكی جەنابی ڕێبەری گەلی كوردستان كاك مەسعود بارزانییە، لە هەمان كاتیشدا بەو پێیەی بەڕێزیان لە ئەركی پێشووتری وەكو ڕاوێژكاری ئەنجوومەنی ئاسایشی هەرێمی كوردستان زۆر سەركەوتووانە كارەكانی خۆی بە جێ گەیاندووە، هەر بۆیە ئەم دەستنیشانكردنەی بەڕێزیان لەلایەن سەركردایەتی پارتییەوە، بووەتە جێگای ستایشی زۆربەی هەرە زۆری هاووڵاتییان، لە ئێستادا ئومێدەكان بە كابینەی داهاتوو بۆ بەجێ گەیاندنی دروشمەكەی پارتی بەرەو بنیاتنانی كوردستانێكی بەهێز كە برا گەورە سەرپەرشتی دەكات زۆرن. بێشك ئەوەی لە جەنابی كاك مەسروور بارزانی چاوەڕوان دەكرێت ئەوەیە، كە بە دەستێكی پۆڵاین لە هەموو گەندەڵكار و كەمتەرخەمان بدات و ڕێگای ئەوەیان پێ نەدات، یاریی بە چارەنووسی گەلەكەمانەوە بكەن و سەروەت و سامان و داهاتی میللەتەكەمان بە تاڵان ببەن، بەشێوەیەك هەڵسوكەوت لەگەڵ ئەو جۆرانەدا بكات، كە نێو دام و دەزگاكانی حكوومەت جێگایان نەبێتەوە، بۆ ئەوەی نەبنە بەڵاو دوژمنی خۆخۆر بۆ حكوومەتەكەی جەنابیان، نابێت ئیدی ڕێگا بە هەندێك بدرێت یاریی بە چارەنووسی گەلەكەمانەوە بكەن.
