خه‌بات: سەرهەنگ نەجمەدین
لەیارییەكانی گەڕی یازدەهەمینی خولی پلە یانە نایابەكانی كوردستان بۆ وەرزەكانی 2018 – 2019 ئەم هەفتەیە لەرۆژانی پێنجەشممە وهەینی چەند یارییەكی گرینگ ئەنجامدران، لەوانە ئەم پێنجەشەممەیە لەنێو یاریگا فرەنسۆ هەریری 2 یانەی هەولێر و یانەی ئاكرێ ڕووبەرووی یەكتر بوونەوە، یانەی هەولێر دوای تێپەر بوونی شەست حەوت رۆژ تامی سەركەوتنی نەكردبوو لەسەر دەستی یانەی ئاكرێ دوای ئەم ماوە زۆرە یەكەم سەركەوتنی تۆمار كرد، یارییەكە لەبەرژەوەندی یانەی هەولێر بەئەنجامی 2-1 گۆڵ بەكۆتایی هات ، یەكەم گۆڵیش لەلایەن یاریزانی ئاكرێ رەیان عەبدولقادر تۆمار كرا، هەردوو گۆڵەكەی یانەی هەولێریش لەلایەن هەردوو یاریزانان هۆگر حسێن و عەلی سەڵمان تۆمار كران، بەم ئەنجامە یانەی هەولێر هاتە پلەی دەیەم بەكۆكردنەوەی 13 خاڵ، و یانەی ئاكرێش بەكۆكردنەوەی 5 خاڵ هەر لەدواوەی خولەكە مایەوە.
لەیارییەكی دیكەدا هەر ئەم پێنجەشەممەیە لەیاریگای یانەی زێرەڤانی ، یانەی زێرەڤانی پێشوازی لەیانەی نەورۆز كرد، یارییەكە لەبەرژەوەندی تیپی میوان بەكۆتایی هات، دوای ئەوەی یانەی نەورۆز توانی بەئەنجامی 3-1 گۆڵ لەیانەی زێرەڤانی بباتەوە و 3 خاڵی گرینگی دوور لەیاریگای هاندەرانی خۆی لەسەر دەستی زێرەڤانی دەستەبەر بكات.
لەرۆژی دوایی واتە ئەم هەینی یە لەنێویاریگای یانەی پێشمەرگەی هەولێر لەپیرمام ، هەردوو یانەی پێشمەرگەی هەولێر و پێشمەرگەی سلێمانی لەكەشێكی ساردا ڕووبەرووی یەكتربوونەوە، یارییەكە لەبەرژەوەندی تیپی خاون یاریگا بەكۆتایی هات دوای ئەوەی پێشمەرگەی هەولێر توانی بەئەنجامی 2-1 گۆڵ لەپێشمەرگەی سلێمانی بباتەوە.
لەدەستپێكی گێمی یەكەم یانەی پێشمەرگەی هەولێر لەرێگەی یاریزان محەمەد سامی گۆڵی یەكەمی بۆ تیپەكەی خۆی تۆمار كرد، دوای ئەم گۆڵەیش یاریزانانی پێشمەرگەی سلێمانی بۆ هاوسەنگ كردنی ئەنجامی یارییەكە چەندین هێرشی مەترسیان هێنایە سەر تیپی خاوەن یاریگا، بۆ گۆڵ تۆمار كردن، ئەوەبوو پێش كۆتایی گێمی یەكەمی یارییەكە یاریزانی پێشمەرگەی سلێمانی جوتیار جەزا توانی گۆڵی یەكەم و یەكسانبوون لەتیپی بەرانبەر تۆمار بكات، گێمی یەكەم بەم ئەنجامەو بەیەكسانبوونی هەردوولا بەتاكە گۆلێك بەكۆتایی هات.
گێمی دووەم دەستیپێكرد و هەردوو ڕاهێنەران بۆ باشتركردنی ئاستی تیپەكەیان و گۆرینی ئەنجامی یارییەكە چەندین گۆرانكارییان لەرێزی پێكهاتەكە ئەنجام دا، بەڵام هەردوو یانە نیازی گۆڵ تۆماركردنیان هەبوو، بەتایبەتی تیپی خاوەن یاریگا كەهەموو هەوڵێكی خۆی خستبووە گەڕ بۆ ئەوەی سەركەوتن لەیارییەكە بەدەست بهێنێت، هەر لەدرێژەی یارییەكەدا یاریزانی پێشمەرگەی هەولێر عومەر سەدام گۆڵی دووەم وسەركەوتنی بۆ تیپەكەی خۆی تۆمار كرد ، تاكۆتایی یارییەكە ئەنجامەكە هەر وەك خۆی مایەوە بەپێشكەوتنی یانەی پێشمەرگەی هەولێر بەسەر پێشمەرگەی سلێمانی بەئەنجامی دوو گۆڵ بەرانبەر بەگۆڵێك، بەمشێوەیە پێشمەرگەی هەولێر دوای سەركەوتنی لەیارییەكەدا توانی 3 خاڵی گرینگ لەسەر دەستی یانەی پێشمەرگەی هەولێر بەدەست بهێنێت و هاتە پێشەنگی رێزبەندی یانەكان.
لەیارییەكی دیكەدا هەردوو یانەی دهۆك و هەندرێن لەیاریگا یانەی دهۆك بەیەكگەیشتن، یارییەكە بەیەكسانبوونی هەردوولا بەگۆڵێك بەكۆتایی هات، گۆڵی یەكەم لەخولەكی 7دا لەلایەن یاریزانی هەندرێن راشد ماجید تۆمار كرا، گۆڵی یەكسانبوونیش لەلایەن یاریزانی دهۆك عەبدولباسیت جاسم تۆمار كرا، ئەگەر چی یاریزانانی دهۆك لەگێمی دووەمدا چەندین هەڵی زیرینیان لەدەستدا، بەتایبەتی لەدوو هێرشی مەترسیداردا ستوون بووە رێگر كەیانەی دهۆك پێش بكەوێت، بەم ئەنجامە هەردوو یانە بەخاڵێكی یارییەكە رازی بوون و یانەی دهۆكیش بەكۆكردنەوەی 21 خاڵ پێشەنگی بۆ یانەی پێشمەرگەی هەولێر چۆڵكرد وهاتە پڵەی دووەمی رێزبەندی خولەكە.
ئەنجامی یارییەكانی دیكە بەمشێوەیە بوو.
برایەتی 0 * زاخۆ 1
شێروانە 3 * ئارارات 0
دەربەندیخان 1 * گازی باكوور 1
بەمشێوەیە ئەم هەفتەیە گەڕی یازدەمینی خولی نایابی كوردستان سەركەوتووانە بەكۆتایی هات و رێزبەندی خولەكەیش لەپلەی یەكەم تاپلەی پێنجەم بەمشێوەیە دەبێت:
1- پێشمەرگەی هەولێر 22 خاڵ
2- دهۆك 21 خاڵ
3- نەورۆز 19 خاڵ
4- پێشمەرگەی سلێمانی 17 خاڵ
5- شێروانە 17 خاڵ.
