بە بۆنەی جەژنی كریسمس و سەری ساڵی تازەوە، هێزە ئەمنییەكانی هەولێر كەوتوونەتە حاڵەتی ئامادەباشییەوە، بەڕێوەبەری پۆلیسی هەولێریش دەڵێ، پلانێكی ئەمنیی تۆكمەیان داڕشتووە و هاوئاهەنگیی تەواو لە نێوان هێزە تەناهییەكاندا كراوە.

لیوا عەبدولخالق تەڵعەت، بەڕێوەبەری پۆلیسی هەولێر، بە مێدیاكانی ڕاگەیاند، لە 24ی ئەم مانگەوە، بە هاوكاریی ئاسایش، پۆلیسی هاتوچۆ، بەرگریی شارستانی و تێكڕای هێزە ئەمنییەكانی دیكە، پلانێكی ئەمنیی تۆكمەیان بۆ بۆنەكانی سەری ساڵ و جەژنی كریسمس داڕشتووە.

“پلانە ئەمنییەكە، كە هەولێر و دەوروبەری خراونەتە بەرنامەوە، تا 2ی 1ی 2019 درێژە دەكێشێت”. عەبدولخالق تەڵعەت وای گوت. ئاماژەیشی دا كه‌ “پۆلیس و ئاسایش، هەموو هەوڵێك بۆ پاراستنی سەروماڵی هاونیشتمانیان دەدەن و ڕێگا لە هەر حاڵەتێكی نەخوازراو و نایاسایی دەگرن”.

هێزە تەناهییەكانی هەولێر، هەموو پێكەوە لە ئامادەباشیدان و بە گوتەی ڕائید هۆگر عەزیز، گوتەبێژی پۆلیسی هەولێر، هاوئاهەنگییەكی تەواو لە نێوان هێزە ئەمنییەكاندا كراوە.

لە سەرجەم شوێنە گشتییەكان و ئەو جێگایانەیش كە ئاهەنگیان تێدا ساز دەدرێت، هێزە تەناهییەكان بە وردی چاودێریی دۆخی ئەمنی دەكەن.
ڕائید هۆگر داوا ده‌كات كه‌ هەر كاتێك هاونیشتمانیان حاڵەتێكی نایاسایی و نائاساییان بینی، دەتوانن پەیوەندی بە هێڵە گەرمەكانی پۆلیسەوە بكەن بە ژمارەكانی: 066134، 066135، 066137، 066104، 066124، 066144، یان 07504460104، 07506781199، كە ژمارە 07506781199 بەردەوام بە ڤایبەریش لەسەر هێڵە و وەڵامی پەیوەندیی ئینتەرنێتیی هاونیشتمانیان دەداتەوە.

ڕاگەیاندنی پۆلیسی هەولێر – ئومێد بابان