فاتیح عەبدولسەلام
هەواڵی دەستگیركردنی رۆژنامەنووسان لە جیهانی عەرەبی، یان تیرۆركردنیان، یان دوورخستنەوەیان بەردەوامە، پێدەچێت رۆژنامەنووس لاوازترین ئەڵقە بێت، كە لەمیانییەوە كێشەكان یەكلایی دەكرێنەوە، حكوومەتەكان كە لە یەكتری تووڕە دەبن، تۆڵە لە رۆژنامەنووسەكان دەكەنەوە، كە هەندێجار بە جۆرێك بەربەست لەسەر رێگەیان دێتە پێش چاویان، هەروەها پارت، بەرپرسان، میلشیا و هەموو ناوەندەكانی هێز لە كۆمەڵگەكانی عەرەبیش، هەمان شت دەكەن. ئەوانە هەموویان دەزانن، رۆژنامەنووس كەسی لە پشتەوە نییە، كەس داكۆكیی لێ ناكات و كەسیش داوای خوێنی ناكات.
لەبەر لاوازترین هۆ، رۆژنامەنووس دەستگیر دەكرێت، لە قەیرانەكانیشدا هەموو بەدوای رۆژنامەنووسان دەگەڕێن بۆ گوێگرتن لە هەواڵ و راپۆرتەكان، كە رۆژنامەنووسان لەخۆبردوویی لە پێشكەكردنیاندا دەكەن، كاتێك یەكێك گوللەیەكی بەر دەكەوێت، یان یاریزانێكی گۆڕەپانی سیاسی یان جەنگی، رۆژنامەنووسێكی بزۆز لە كۆڵی خۆی بكاتەوە، كە پابەندی هێڵی بەرپرسەكە یان ناوەندی هێز نابێت، دەبینین هەواڵی فەوتانی رۆژنامەنووسەكە، كەس لە جەماوەر بەدوایدا ناگەڕێت. یەكێتییەكانی رۆژنامەنووسانی عەرەبی و سەندیكاكانیان، زۆرجار دەخرێتە نێو دیمەنی سیاسییەوە، هەندێكیان بێ تاوانن، چونكە رەوشی وڵاتەكانیان لە لایەن دەسەڵاتدارانی تەناهی كۆنترۆڵكراوە، كە ئەوەی لەسەر كاغەزی رۆژنامەكان دەنووسرێت، لەگەڵ ئەوەی لەسەر كاغەزی ئاودەستەكان دەنووسرێت، وەكو یەك تەماشا دەكات، بەڵام هەندێ وڵات سەندیكای رۆژنامەنووسان، بەبێ هیچ پاساوێك، لەگەڵ كەشوهەوای سیاسیی گشتیی، بەشێوەیەكی پاشكۆیی پیشەیی تێكەڵاو دەكات، كە هیچ بوار بۆ داكۆكیكردن لە مافی رۆژنامەنووسان ناهێلێتەوە.
راگەیاندنی ئەلیكترۆنی بووەتە سەرچاوەی نیگەرانیی بۆ بەشێكی زۆری دەسەڵاتەكان، یەكێتیی رۆژنامەنووسانیش هێشتا ناتوانێت ئەو لایەنە تازەیەی راگەیاندن، بەشێوەیەكی شیاو رێكبخات، كە كەلێنەكان پڕ بكاتەوە، بەهاكانی رۆژنامەنووسی و ئاكارەكانی پیشەیی بپارێزێت. لە ئاكامی ئەو نیگەرانەیشدا، كە هەندێجار بە زیادەڕەوی، یان كەمتەرخەمی سەندیكاكانی تێدایە، كە رۆژ لە دوای رۆژ لە زیادبوون دایە، وای لێهاتووە رۆژنامەنووسانی راستەقینە لەنێو ئەو دەسەڵاتانە ون بووینە، كە میهریان نییە، لەگەڵ ئەو سەندیكایانەی دەرگاكانیان بە واڵایی جێهێشتووە بۆ ئەوەی سیاسەتكار و قازانج ویستان، بێ جیاكردنەوە و تاوتوێكردن دزەی تێدا بكەن، ئەوەش لەوانەیە دیمەنێكی ناڕوونی لێبكەوێتەوە كە نەتوانێت نزیكترین ناساندن بۆ راستی بكات، بەوەی رۆژنامەگەریی دەسەڵاتی چوارەمە. سەندیكاكانی رۆژنامەنووسی لەسەریانە، كۆنگرەی قووڵ ئەنجامبدەن و تێیدا گفتوگۆ لەسەر پەیوەندی لەگەڵ دەسەڵاتەكاندا بكەن، نەوەكو سیاسەت بە تەنیا، بەڵكو لایەنی ئایینی، هۆزایەتی و ئەوانی دیكەش، هەروەها كاركردن لەسەر بەشداریپێكردنی كەسایەتییە جۆراوجۆرەكان لەو دەسەڵاتانە لە گفتوگۆكاندا، بۆ دەرچوون بە چەند چارەسەرییەك، نەوەكو تەنیا لەسەر كاغەزەكان بمینێتەوە. ئایا بەڕاستی هێشتا رۆژنامەگەریی دەسەڵاتی چوارەمە؟
و: رەمزی میرەكانی
سەرچاوە www.azzaman.com
