سەردار حوسێن
بۆڵتن نیوز، ئەو سایتە فارسی زمانەی لەماوەی12 ساڵی تەمەنیدا زۆرترین بڵاوكراوەكانی ئاراستەكراون و هیچ بەهاو ئیتێكێكی میدیای ئەلیكترۆنی لەخۆ نەگرتووە، ئەگەر بۆ زۆرینەی خەڵك (بە دانیشتووانی ئێرانیشەوە) نامۆ بێت، بەڵام بەو مانایە نایەت كەس نەزانێ چۆن و لەكوێ و بە چ ئامانجێك ئاراستە دەكرێت..!بۆڵتن نیوز لەكاتێكدا دەبینێت سەرۆك مەسعود بارزانی و پارتی و كەسە نزیكەكانی بارزانی بەرەو لووتكە هەنگاو دەنێن، ناتوانێت لە بەهای ئەو بەرزفڕینەی بارزانی كەمبكاتەوەو بەناچارییەوە پڕ دەداتە میدیای پارتی دیموكراتی كوردستان، لەبەر ئەوەیش كە ناتوانێت هیچ خەوشێك لە میدیای پارتیش بدۆزێتەوە، ئیدی هەندێك وشە ریز دەكات و بەیتوبالۆرەیەكی بێ سەروبەر دەهۆنێتەوە، بەستەزمانانە و دوور لە هەموو عورف و ئیتیكێكی نووسین، شتێك بڵاودەكاتەوە كە نە خۆیان و نە ئێمەیش نازانین ناوی بنێین (وتار، نووسین، بەدواداچوون، راپۆرت) یان شتێكی دیكە، بەڵام لەبەر ئەوەی ئێمە دەزانین بە چ مەبەستێك هەوڵدەدرێت ئەم جۆرە ژەهرەیش بخرێتە نێو كاسەی هەندێك كەسی نەزان و دژبە پرۆسەی رێكخستنەوەی نێو ماڵی كورد، بە پێویستی دەزانین قسەیەكی لەسەر بكەین. بە پێی وشە ریزكراوەكانی بۆڵتن نیوز (بارزانییەكان بۆ مافی كورد و شاری كەركووك هەوڵیان نەداوەو تەنها چاویان لە نەوتی كەركووكە) جارێ هەر لەسەرەتادا ئەوە بۆڵتن نیوز نییە بڕیار لەسەر هەوڵ و خەبات و قوربانیدان و خوێنبەخشینی بارزانییەكان بدات كە لەپێناوی كوردستانیبوونی كەركووك بەخشیوویانە، بەڵكو گەلی كوردستان و ئەوانەیش كە هەشت ساڵ خوێناویترین شەڕیان لەدژی هاوزمان و دەسەڵاتدارانی بۆڵتن نیوز هەڵگیرساند و قڕكردنی كوردیشیان بە ئامانج گرتبوو، شایەدی ئەو راستییەن، كە بارزانییەكان و خوودی بنەماڵەی بەڕێزی بارزانی چۆن خەباتیان لە پێناوی كەركووك كردووە و زۆرترین قوربانیشیان داوە تا سەلماندوویانە ناسنامەی كەركووك كوردستانییە و جگە لە كورد خەڵكی دیكەشی تیادەژین. لە پەرەگرافێكی دیكە و بە قسەی بۆڵتن نیوز بارزانی دەیەوێ شەڕ لەنێوان شیعە و سوننە، كورد و عەرەب هەڵبگیرسێنێت و بۆ ئەم مەبەستەیش میدیای پارتی ئەو هەواڵانە بڵاو دەكاتەوە كە باس لە داگیركاری كەركووك دەكەن و ناكۆكی نێوان لایەنە عیراقییە شیعی و سوننیەكان گەورە نیشان دەدەن و.. هتد. لە راستیدا ئەم قسانەی بۆڵتن نیوز ئەگەر لە بێئاگایی بووایە شیاوی وەڵامدانەوە نەبوون، بەڵام چونكە بە مەبەست نووسراون، دەبێ پێیان بگوترێت: ئایا پەیوەندی نێوان لایەنە شیعی و سوننیەكانی عیراق هێندە بەهێزە، تا هەوڵی تێكدانی بدرێت؟! ئەگەر سەركردە و حزب و لایەنە سیاسییە عیراقییەكانی شیعە و سوننە هێندە تەبان، بۆچی هەموویان داوا لە سەرۆك مەسعود بارزانی دەكەن دەستپێشخەرییەك لە سەرجەم عیراق رابگەیەنێت و لایەنە ناكۆكەكان لە هەولێر كۆبكاتەوە؟! ئەگەر كەركووكیش بە رێنوێنی و بەشداری سەركردە و پاڵپشتیكارانی بۆڵتن نیوز داگیر نەكراوە، كوا دەسەڵاتی كورد لەو شارەی زۆرینەی دانیشتووانەكەی كوردە و كوا ئەو هێزانەیش كە رێخۆشكەری داگیركارییەكە بوون لەوشارە دەتوانن بەبێ ناسنامە و رێپێدانی حەشدی شەعبی سەردانێكی ناوشار بكەن؟!. بۆڵتن نیوز لە بەشێكی دیكەدا دەڵێت: لەیەكتر نزیكبوونەوەی كورد و عەرەب، شیعە و سوننە لە ئێستادا بۆ پارتی و بارزانی بۆتە گرێی دەروونی. ئەوەیان قسەیەكی زۆر كۆمیدی و تا ئەوپەڕیش درۆیەكی نەفامانەیە، چونكە راستییەكەی ئەوەیە كورد و عەرەب لەیەكتر نزیكبن یان دوور، بارزانی بریاردەرە و هەر پەیوەندییەكیش لەنێوان كورد و عەرەب بەبێ رەزامەندی و پشتگیری بارزانی مایەپووچ دەمێنێتەوە، ئەوەیان راستییەكە نەك تەنها سەركردە و نەتەوە و پێكهاتە عیراقییەكان، بەڵكو هەموو جیهان بە رۆژئاوایشەوە لەوە تێگەیشتوون، كە بارزانی مەرجەعی كوردەو ئەو ئاشتەواییەی دوای رووداوەكانی 16ی ئۆكتۆبەری2017 و لە ئێستادا هاتۆتە ئارا، لە ئەنجامی ئەو تێگەیشتنەیە كە گەلی عیراق دوای ریفراندۆم بۆیان درووستبووە و سەركردە و حزب و لایەنە شیعی و سوننییە عیراقییەكانیش گەیشتنە ئەو باوەڕەی بارزانی نوێنەرایەتی زۆرینەی رەهای گەلی كورد دەكات، ئاخر رێژەی 92.7ـی دەنگدەرانی ریفراندۆم سەنگی مەحەكی هێز و توانا و لێهاتوویی سەرۆك مەسعود بارزانی ـیەو پێویست بە سەلماندنی دیكە ناكات. ئەگەریش بۆڵتۆن نیوز پێیوابێت بارزانی هۆكاری ناكۆكی نێوان لایەنە شیعی و سوننیە عیراقییەكانە، ئەوەیان پێویست بە وەڵامدانەوە ناكات و جگە لە قسەیەكی بێ بنەما شتێكی دیكە نییە. لە بەشێكی دیكەی قسەكانیدا بۆڵتۆن نیوز دەڵێت: (ئەو میدیایانەی سەربە پارتی و بارزانین هەوڵی هەڵگیرساندنی شەڕ لە نێو پێكهاتەكانی كەركووك دەدەن). لێرەدا دەبێ هەڵوەستەیەك بكەین، هەڵوەستە لەسەر میدیای پارتی نا، بەڵكو هەڵوەستەكردن لەسەر ئامانجی ئەم قسەیە، چونكە ئەوەیان تەنها قسەیەكی رووت نییە، بەڵكو هاندانی هەندێك كەس و لایەنە دژ بە پرۆسەی كوردستانێكی بەهێزە، كوردستانێكی بەهێزیش هەم ئامانجی پارتی و هەمیش جێگەی ئومێدی رۆژئاواییەكانە، بۆیەش بۆڵتن نیوز دەیەوێت لەم رێگەیەو بەم ئاراستەیە جارێكی دیكەیش دەست و پێوەندەكانی خۆیان هانبداتەوە و بیانوویان بۆ بدۆزێتەوە تا دژ بە پارتی و بەو پاساوە بكەونە درووستكردنەوەی دووبەرەكی و ئاژاوەو كاولكارییەكی دیكەی هاوشێوەی 16ی ئۆكتۆبەر، هەرچەندە بۆڵتن نیوز بەئاگایە لەوەی جارێكی دیكە دەرفەتی وەها بۆ ئەو گرووپ و تاقمانە هەڵناكەوێتەوە، بەڵام درووستكردنی ناكۆكی و دووبەرەكی لەنێو میدیای كوردی و بەتایبەتیش میدیای فەرمی حزب و لایەنە سیاسییەكان بەگشتی، چەندیش بچووك و خۆیان گوتەنی “بێ ئەرزش” بێت، بەڵام بۆ سایتێك كە دەزگایەكی هەواڵگری و سەربازی بەڕێوەی ببات هەر گرنگە و بە چالاكی هەژمار دەكرێ. !.
