خه‌بات: هاوار مورتكەیی
ئەگەرچی كیساریا میلادزە تەنها تەمەنی 8 ساڵە و هێشتا لە سەرەتای كاروانەكەیەتی، كەچی تواناو لێهاتویی لە ئێستاوە دەركەوتووە و چاوەڕوانییەكی گەشی لێدەكرێت، ئەو ئێستا لەخوار تەمەنی 8 ساڵان پاڵەوانی وڵاتەكەیه جۆرجیا و چوارەمی ئەورووپا و هەشتەمی جیهانە لە یاری شەترەنج، لەوەش گرنگتر خەونی ئەو بەدەستهێنانی نازناوی گراندماستەره GM لەتەمەنی 14 ساڵیدا، كیسارا زانیاری زیاتر لەبارەی دیمانەیەكدا لەگەڵ لاپەڕەی وەرزشی رۆژنامەی خەبات دەخاتەروو.
كیساریا كە لە ساڵی 2010 لە شاری باتۆمی لە جۆرجیا لەدایك بووە دەڵێت: كاتێك تەمەنم 5 ساڵان بوو باوكم فێرە شەترەنجی كردم و دەستم بەیاری كرد، ئەگەرچی مەلەوانی وەك ئارەزوویەكم بوو، بەڵام شەترەنج جێی بایەخی یەكەمم بوو، كاتێك تەمەنیشم بوو بە شەش ساڵ بەفەرمی بەشداری پاڵەوانێتییەكانم كرد و لەبیرمە لەیەكەم بەشداریكردنیشم لە پاڵەوانێتییەك بوو لەشاری باتۆمی و لە كۆی 9 خاڵ تەنها یەك خاڵم بەدەستهێنا.
كیساریا Kesaria Mgeladze كە ئێستا لە پۆلی سێیەم لەقوتابخانەیەكی باتۆمی دەخوێنی گوتی: ئێستا پاڵەوانی جۆرجیام لە خوار تەمەنی 8 ساڵان وە چوارەمی پاڵەوانیتی شەترەنجی ئەورووپا م و ئەمساڵیش بەشداریم لە پاڵەوانێتی شەترەنجی جیهان كرد كە لە سانتیاگۆ دی كۆمبوستێلا لە ئیسپانیا بەڕێوەچوو توانیم پلەی هەشتەم بەدەست بهێنم، هەروەها لە چەندین پاڵەوانیتی جۆراوجۆری شەترەنج كە لە جۆرجیا ئەنجام دراوە توانیومە پلەی یەكەم بەدەست بهینم، ئەمانەش بۆمن سەرەتایەكەو خەونی گەورەترم هەیە و كاری بۆ دەكەم و هەوڵی بۆ دەدەم ئەویش بتوانم لە تەمەنی 14 ساڵیدا نازناوی گراندماستەر GM بەدەست بهێنم.
لە كۆتاییدا كیساریای جۆرجی كە هەڵگری ریتینگی ژمارە 1294ی یەكێتی نێودەوڵەتی شەترەنجە FIDE یە دەڵێت: بەراشكاوی دەیڵێم شەترەنج بەتەنها ئارەزوویەك نییە، بەڵكو بۆتە بەشێكی گەورە لە ژیانم، پێشم وایە مەزنترین ئەو شتەی لە مێژووی مرۆڤایەتیدا داهێندراوە یاری شەترەنجە، هەروەها گوتی: سەركەوتنم تا ئێستاكە شتێك نییە جگە لەدەسكەوت، هەموو ئەوانەی بەدەستم هێناون بەهاوكاری راهێنەر و باوكم هەموو ئەوانەی پشتگیریان كردووم، بۆیە لێرەوە دەمەوێ سوپاسیان بكەم، جێی بیرهینانەوەشە كە چیرۆكی سەركەوتنەكانم بۆ گرنگی ئەوانەوە دەگەڕێتەوە.
