ئەردەڵان هەڵەبجەیی
دوای هەڵبژاردنی پەرلەمانی عێراق، هەوڵەكان چڕكرانەوە بۆ دروستكردنی حكوومەتی نوێ و هەر لایەنێكیش لە هەوڵی وەدەستخستنی بەرژەوەندی حزبی و تەنانەت كەسیش بوو، پارتی وەك حزبی یەكەمی هەڵبژاردن پێش چوونە بەغدا داوای پێكەوە كاركردنی كرد و بۆ ئەو مەبەستە پاكێجێكی گشتگیری ئامادەكرد و لە بری پۆست تەئكیدی لە دەستەبەركردنی مافە نەتەوەییەكان كردەوە، لێ هەندێك لایەن بە نهێنی لە پێش هەولێر ڕێگای بەغدادیان گرتەبەر و پێیان وابوو بەو كارە دوو ئامانج دەپێكن كە بریتی بوو لە خۆبێبەری كردن لە ڕیفراندۆم لە پێناو وەرگرتنی پۆست و لاواز كردنی پێگەی كورد، ئەوەش لە پێناو شكاندنی پێگەی هەولێر وەك ناوەندی سیاسی گەلی كورد، ئەو هێز و سیاسییانە ڕەنگە توانیبێتیان پۆستێك بە سەركزی وەربگرن، بەڵام لە پرسی لاواز نیشاندانی هەولێرو شكاندنی، بە ئەندازەك خۆیان بچووك كردەوە كە لە مێژوودا شكان و لاوازی وا وێنەی نەبووە.
گەرچی سەرەتا وێنەی ئەو لاوازی و شكاندنەیان زۆر ڕوون نەبوو، بەڵام دوای سەردانی سەرۆك بارزانی بۆ بەغدا وێنەكە بە تەواوی ڕوون بوەوە و تێگەیشتن ئامادەبوونی بارزانی لە بەغدا جگە لە نیشاندانی گەورەیی و كاریگەریی خۆی وەك ڕابەر و مەرجەعی گەلی كورد، ئەو فۆرمە حیزب و سیاسییە هەڵپەكەرانەشی هێند بچووك كردەوە كە ڕۆژێك بە بیریاندا نەدەهات بەو چەشنە تا ئاستی ونبوون بچووك ببنەوە.
سەرۆك بارزانی وەك سەرۆكی حزبێك هێند بە ئاستێكی بەرز پێشوازی لێكرا جگە لە نیگەرانی كاڵفامانی ناوخۆی هەرێم، بووە هۆی هاوار لێبەرز بوونەوەی هەندێك لە دژبەران و هەندێكی دیكەش ناچاربوون لە بڕیاری دادگایی كردنی سەرۆك بارزانییەوە بڕیاری پێشوازی كردن لە بارزانی بدەن و بگەنە ئەو باوەڕەی دژایەتی كردنی ئەو سەركردە جگە لە دۆڕانێكی پێشوەخت هیچ دەرئەنجامێكی نابێت.
دواجار چوونی هەر سیاسییەك بۆ بەغدا بەناوی گەلی كوردەوە، نە قەدەغەكراوەو نە ڕێلێگیراو، لێ ئەو نوێنەرایەتی كردنە بۆ كەسایەتیەكی گەورەو كاریگەری وەك سەرۆك بارزانییە كە لەگەڵ پێیەكانی خستە بەغدا، بەغدا بلەرزێت، چوون بێت بۆ داخوازی نەتەوەیەك. نەك بۆ سیاسییەكی ڕقكردووی شەیدای پۆست، كە جگە خۆی ببێتە خاڵی لاوازی گەلێك كە سەدان ساڵە بۆ ئازادی تێدەكۆشێت نەك وەرگرتنی پۆست و ماددە.
