خه‌بات: بەدەل رەفۆ – نەمسا –
فستیڤاڵی ساڵانەی جیهانی بۆ فیلمەكانی چیا لە نەمسا 2018 بەكۆتا هات، ئاهەنگی دوا شەوی فیستیڤاڵەكە بە دابەشكردنی خەڵاتی كامیرای ئەلبی زێڕین بەسەر فیلمە سەركەوتووەكان، كە نرخی خەڵاتەكە دەگاتە 22 هەزار یۆرۆ، ئینجا فیلمەكانیش نمایشكران.
فیستیڤاڵەكە بە بەشداری 32 وڵات لەشاری گراتس لە 13 تاكو 17ی تشرینی دووەم بەردەوام بوو، تێیدا 216 فیلم نمایشكرا، دواتر 104 فیلم هەڵبژێردران بۆ ركابەری لەسەر وەدەستهێنانی خەڵاتی كامیرای زێڕین.فیستیڤاڵەكە بۆ ئەمساڵ شێوازێكی تایبەتی هەبوو كە خولی 30 بوو، دوای ئەوەی ساڵی 1986 بۆ یەكەمجار بە شێوەیەكی سنوردار سازكرا، لە ئێستادا چەندین كۆمپانیای جیهان لەوانە بانكی شتایامارك شباركاسێ سپۆنسەری سەرەكییە، هەروەها بەبۆنەی ساڵیادی بەسەركەوتنی رۆبرت شاور بەسەر چیای ئێڤەرێست كە بەرزاییەكەی 8848 مەترەو لە ئێستادا سەرۆكی لیژنەی دادوەری فیستیڤاڵەكەیە.
دەرهێنەری ئەڵمانی پیتەر فاینرت خاوەن فیلمی شازادەكانی راجستن كە پێشتر بۆ چەند جارێك بە بینینی شادبووم، لە دیمانەیەكدا پێی گوتم كە ئەو ماوەیەكە وازی لە كاری دەرهێنانی هێناوە ئێستاش خۆی تەرخان كردووە بۆ پێشكەش كردنی سیمینارو وانەوتنەوە لەسەر فیلمەكانی چیا و گەشتەكان، چونكە ئەو ژیانی خۆی هەمووی بۆ گەشت لەپێناو سینەما داناوە، بۆیە ئەمجارەش وەك لیژنەی دادوەری لە ماوەی5 رۆژ و12 كاتژمێر كاركردن توانی فیلمە براوەكان دەستنیشان بكەن.هەر بەبۆنەی تێپەڕینی40 ساڵ بەسەر گەیشتنی یەكەم شاخەوان بەسەر لوتكە ئیفرست و لە ئاهەنگی كردنەوەی فیستیڤاڵەكە، بالوێزی نیپاڵ ئامادەی ئاهەنگەكە بوو، تێیدا باسی هاوئاهەنگی هەردوو وڵات كرد لەسەر ئەم رووداوە گرنگە.
ئەوەی جێی بایەخ بوو، ئامادەبوونی تیمێكی شاخەوانی 7 كەسی و پزیشكێك بوو، كە ساڵی1978 پێكەوەبوون كاتێك گەیشتنە سەر لوتكەی چیای ئیفرست، كە هەماهەنگ بوو لەگەڵ نمایشكردنی فیلمێكی30 خولەكی لەسەر ئەم رووداوە، ئامادەبووان خۆشحاڵ بوون كە دوای ئەو هەموو ساڵە ئەو تیمە چوونەوە هەمان شوێن و لەوێش نەخۆشخانەیەكیان ئاواكرد.
فیلمەكانی فستیڤاڵ هەمەجۆر بوون لە نێوان دۆزینەوەو بابەتی چیای ئاڵب و وەرزشی شاخەوانی و سرووشت و ژینگە، زۆر لایەن پشتگیری ئەو فیستیڤاڵەیان كرد بەمەبەستی پەرەپێدان و بەردەوام بوون و دەركەوتنی ناوی شارەكە، لەوانە حكوومەتی ئەو هەرێمەو كەناڵەكانی راگەیاندن.
لەو فیلمانەی سەرنجی ئامادەبووانی راكێشا، فیلمی سیحری عومان لەسەر شوێنەواری سیندباد بە زمانی ئەڵمانی، كە 52 خولەك بوو، لە دەرهێنانی روسی كۆخ، رۆلاند كوكیل، فیلمەكە باس لە گەشتێكی سیحراوی بەرەو باكوری سوڵتانی عومان و كەناراوەكانی دەریا دەكات، هەروەها بینینی هونەری بیناسازی نوێ لەو وڵاتە كە جێی سەرنجە، لەگەڵ بوونی خانووی كۆن كە سەردەمانی خۆی یەكێك بووە لە سەرنجراكێشترین كوچەو كۆڵانی وڵاتانی رۆژهەڵات، وڵاتی عومان یەكێكە لەو وڵاتانەی كە ناسنامەی مێژوویی خۆی پاراستووە.
وەرگێڕانی لە عەرەبیەوە: سەنگەر حوسێن
