مەهدی حەسەن موراد
هەر ئاین و مللەتەكی ب رەنگەكی رۆژیگرتن هەیە و لدیف باوەڕیا هەر ئاینەكی رۆژیگرتن خێرەكا مەزنە و فەڕزەكا ئولی یە پێ د هێنە سپاردن و فەرە مروڤ رۆژیێ بگرت دا ب بڕسێ و بەلنگازیێ ب حەسێت و ئاگەه ژ خەلكێ هەژار و بەلنگاز هەبت وەكی د باوەریا هەر ئاین و مللەتەكی دا هاتی، لێ وەكی دیار هەمی رۆژیێن ئێزدیان یێن خێر و فەرز د جیگرن ل دەم وەختێ خو ل سالێ ئەڤ رۆژ ئێزی ژی د كەڤنا دئینی یا ئێكێ ژ مەها كانوونا ئێكێ ب هژمارا رۆژهلاتی هەر سال دبنە رۆژیێن مە ئێزدیان.
لێ ژ بەر پیرۆزی و گرنگیا رۆژیا كو د باوەریا ئێزدیاندا رۆژیگرتن فەڕزەكا ژ فەڕزێن تەریقەتێ كو رێبازا ئێزدیاتیێە و مرۆڤێ ئێزدی د ژیانا خودا پەیرەو دكەت و ب ڤێ رێبازێ وەك ئێزدیەك د ئێتە ناسین، دێ بینی ئێزدی بەری رۆژیێن ئێزی ب چل رۆژی وەسا دێ خەلكێ مە رادبنە رۆژیا وتایبەت ل هێڤارا رۆژا چارشەمبوویێ ب رۆژی دبن كو هەر كەسەك ژمارەكا رۆژیا د گرن زێدەباری رۆژیێن ئێزی ب رۆژی دبن هەتا رۆژیێن ئێزی دهێن و دبتە جەژن ئەڤ رەنگە رۆژی گرتن دناڤا ئۆلا مە ئێزدیان دا هەیە، ئەڤ رۆژی بو خاس و باب چاكێن ئێزدیا ئەڤێن بۆ خودێ تەعالا خۆ شكاندین و ب شەڤ و رۆژ پەروەستەی خودێ تەعالا بین د هێنە گڕتن، ئەڤ كەسێن رۆژیگر ژی هندەك ژوان هیڤی و مرازا د خازن یێن هەین نەساخن هێڤیا ژ خودێ د خازن بو دایی و بابا، بێ زاروكی، بۆ رزقی، بۆ تەناهیێ و سلامەتیێ و دوركەتن ژ قەدا و بەلایە، هیڤی و ئومێدێن خو ب رێكا ڤان رۆژیا ژ خودێ تەعالا د خازن ب گەهن مرازێن خو، هەر چەندە د باوریا مە ئێزدیان دا رۆژیگرتن بۆ خودێ یە، ئەڤ چەند ژی وێ یەكێ دیاردكەت كو خودێ مەزن و پاك و دلۆڤان مرۆڤ ژ هەمی خولیاقەتێ خو بتر ڤیایە و حەز ژێكریە لەورا ئەڤ كەرەمە دگەل كریە، دڤێت مرۆڤ ژی هەر دەم هزرا كارێن باش بكەت مینا دوعا و رۆژیگرتنێ و خێر خوازیێ ژبەر ڤێ چەندێ ئێزدی بتری هەر ئاین و مللەتەكی هەی ل جیهانی رۆژیا د گرن بەلێ وەك فەرز 3 رۆژیێن ئێزی نە بو خودێ مەزن و دلۆڤان د هێنە گرتن،بەلێ وەك خێر گەلەك رۆژی دناڤا ئێزدیاتیێ دا هەینە، هەر بو زانین 92 رۆژی كەسانێن ئولی وچلەگر و دیندار و جڤاتا روحانی و هەر ئێزدیەكی بڤێت ب رۆژی دبن بلی رۆژیێن ئێزی و ئەڤ رۆژیێن بەری رۆژیێن ئێزی ئەڤێن دبێژین خیرەن كو پتریا ئێزدیان ب رۆژی دبن دڤیا ب زانین سالێ نێزیكی 100 سەد رۆژی ئێزدی ب رۆژی دبن ئەو ژی بڤی رەنگی لخارێ ئێزدی رۆژیان دگرن.
1- ل چلێ زڤستانێ ئێزدی وەك چلەگر و جڤاتا روحانی و كەسانێن ئاینی وهەر كەسەەی بڤێت 40 چل رۆژی ب رۆژی دبن دبێژنێ روژیێن چلێ زڤستانێ.
2- ل چلێ هاڤینێ ئێزدی وەك چلەگر و جڤاتا روحانی و كەسانێن ئاینی وهەر كەسەكی بڤێت 40 چل رۆژی ب رۆژی دبن دبێژنێ رۆژیێن چلێ هاڤینێ.
3- هەر وەسا 3 سێ رۆژیێن دیتر هەینە ئێك بو خودانێ و ئێك بو شێخێ خو و ئێكێ بو پیرێ خو هەر ئێزدیەكی هەی فەرە ڤان هەر سئ روژیا ب گرت.
4- رۆژیێن خدر و ئەلیاس بتریا ئێزدیان ڤان هەر 3 سێ روژیێن نەبی خدر و ئەلیاس ب رۆژی دبن و رۆژا چارێ د كەنە جەژن.
5- رۆژیێن شیشمس كو د باوەریا ئێزدیان دا مەفەرا، ئێزدیێن ل وەلاتێ خالتیا و یێن نها ل شنگالێ و وەلاتێ شێخ و هەر جهەكی هەیێن د گەل رێژەكا زور ژ ئێزدیان 3 رۆژیان بو شیشمس ب روژی دبن، ل ئینیا بەری رۆژیێن ئێزی.
6- روژیێن باتیزمێ چەندین مریدێن پیر ئالی و چیلكانن 3 رۆژیا ب رۆژی دبن پشتی رۆژیێن ئێزی و رێ و رەسمێن تایبەت هەنە ب ڤان روژیا.
7- رێژەكا زور ژ ئێزدیان هەر كەس ژمارەكا رۆژا ب روژی دبن بەری رۆژیێن ئێزی وەك خێر بۆ خودێ تەعالا.
8- هەر بۆ زانیێن دناڤا جڤاكێ ئێزدیان دا هەینە هندەك شكەستی و ئولدار و كەسانیێن ئاینی سەرتا سەری سالێ هەمی رۆژێن چارشەبویا ب رۆژی دبن د گەل چلێ هاڤینێ و چلێ زڤستانێ.
دیسا تشتێ هەری باش د ئێزدیاتیێ دا جوداهی ژ ئاین و ئولێن هەین ئەركێ ئولی هندەك ژێ ڤاڤارتینە وەك رۆژی گرتن فەرە هەر مروڤەكی ئێزدی سێ رۆژیێن ئێزی بو خودێ تەعالا ب رۆژی بن ئەڤە فەرزەكا ژ فەرزێن تەریقەتێ، بەلێ چلێ هاڤینێ وچلێ زڤستانێ فەرزە ل سەر چلەگرە و جڤاتا روحانی و شكەستیێن مالا شێخادی و رۆژین دیتر هەمی خێرن، و هەر بوزانین هەمی رۆژیگڕتن ب ئێك سیستەم د هێنە گرتن یێن خێر و یێن فەرز پشتی نیڤا شەڤێ؟ پاشیڤێ دخۆن و دگەل تاری گەوركێ دبتە دەڤگڕتن، دەڤگڕتن ژی ئەوە: نابت مرۆڤ هیچ تشتەكی بخۆت و ڤەخۆت و دڤێت خۆ ژ هەموو پەیڤێن خراب و گوننەهە و بەدكاری یا دوور بكەت، هێڤاری بەری رۆژئاڤا رۆژیگر دەست و چاڤێن خۆ دشۆن و خۆ پاك و تەمییز دكەن و بەر ب رۆژئاڤا ڤە پەروەستەی خودێ دبن و دوعایا هێڤاری دكەن، پشتی رۆژئاڤا دبتە فتار، رۆژیگر ب دەستووری خودێ فتاردبن.
