سوورە مەرگەیی
كورد تیخی دوژمن دەخاتە سەر گەردنی خۆی و گلەیی ئەوەش دەكات دوژمن دەستی گران بكات، زۆر جاران و لە زۆر بابەت و نووسیندا باسم لەوە كردووە گەمژەترین كەس ئەوانەن كە گلەیی لە دوژمن دەكەن، ئاخر گلەیی لە دوژمن ناكرێ و بە گلەییش دەستبەرداری دوژمنكاری نابێ، دوژمن دوژمنە و دەبێ بە بەرگری كردن وەڵام بدرێتەوە، نەك بە گلەیی و پاڕانەوە.
ئێستا و بە تایبەتیش لە دوای خیانەتی 16ی ئۆكتۆبەر و فرۆشتنی كەركووك، باس باسی راكان جبوری و تەعریبی كەركوكە، ئاخر بۆچی گلەیی لە راكان جبوری عەرەب و عەرەبخواز بكەین، كاتێ كەركوك تەعریب دەكات، ئەو وەك عەرەبێك عەرەبایەتی خۆی دەكا و بۆ خزمەتی عرووبەش بە دوای هەل و دەرفەتی رەخساودا دەگەڕێ، گرووپێكی كوردیش هەل و دەرفەتەكەیان بۆ رەخساند.
ئەی هەر بەناو كوردی كەركوك فرۆش نەبوو‘ لە 16ی ئۆكتۆبەر لە پشتەوە خەنجەری دا لە لە برای كوردی و دەستی حەشدی شەعبی و سوپای عێراقیان گرت و هێنانیەوە ناو كەركوك؟!، ئەی هەر كەركوك فرۆشەكان نەبوون موزایەدەی پاراستنی كەركوكیان دەكرد لە وێرانكاری؟!، ئەی هەر كەركوك فرۆشەكان نەبوون هەلهەلەی ئارامیان بۆ كەركوكی دوای 16ی ئۆكتۆبەر دەكێشا؟! ئەی هەر كەركوك فرۆشەكان نەبوون دەیانگوت: “كەركوك شارێكی عێراقییە و گەڕاوەتەوە باوەشی نیشتیمان؟!”.
ئەرێ لە نێوان موزایەدەی ئارامی و پاراستنی كەركوك لە وێرانكاری ئەوكات و هاتوهاواری تەعریبی ئێستای، كەركوك كامیان راستە؟!. ئەگەر ئەوكات كەركوك بەڕاستی ئارام و لە وێرانكاری پارێزرابێ و گەڕابێتەوە باوەشی نیشتیمانیش؟!، ئەو هەراوزەنایەی تەعریبی ئێستا بۆچی و لە پێناو چیدا؟!. ئەگەر ئێستا مەترسی تەعریب لەسەر كەركوك هەبێ؟! موزایەدەی ئەوكاتی ئارامی و دوورخستنەوەی لە وێرانكاری و لاواندنەوەی لە باوەشی نیشتیماندا بۆ چ مەبەستێك بووە؟!
من لەوە دڵنیام تەعریبی ئێستا راستە، چونكە كەركوك پێشینەیەكی تەعریبی هەیە و عەرەب لە هەر بەرگێكدا بووبێ و هەڵگری هەر فكرە و ئایدیایەك بووبێ! چاوی لەسەر كەركوك و بووە و تەعریبی ئەو شارە و هەموو كوردستان و لەناوبردنی كوردیشی بە روایان زانیوە، كەواتە موزایەدەی ئارامی و دوور خستنەوەی كەركوك لە وێرانكاری و گەڕانەوەی بۆ باوەشی نیشتیمان، شەرعیەت و رەوایی دان بووە بە تەعریبی ئێستا و رابردووی كەركوك و رێگا خۆش كردنیشە بۆ ئەوەی لەمەودواش هەرچی لەدەستیان بێت بەرامبەر بە كەركوك و كەركوكیەكان و كوردستان و هەموو كوردیش بیكەن.
