دژەتیرۆری کوردستان رایگەیاند، ئەمشەو هێزەکانی هاوپەیمانان توانیویانە چوار درۆنی بۆمبڕێژکراو لە ئاسمانی هەولێر تێکبشکێنن، بەبێ ئەوەی هیچ زیانێکی گیانیی لێ بکەوێتەوە.
بەگوێرەی راگەیەندراوێکی فەرمیی دژەتیرۆری کوردستان، کاتژمێر 22:41ـی ئەمشەو هەینی، 6ـی ئاداری 2026، هێزەکانی هاوپەیمانی نێودەوڵەتی بەرپەرچی هێرشێکی درۆنییان داوەتەوە و چوار درۆنی بۆمبڕێژکراویان لە ئاسمانی شاری هەولێر تێکشکاندووە و خستوویاننەتە خوارەوە.
دژەتیرۆر ئاماژەی بەوەش کردووە، کە پاشماوە و پارچەی یەکێک لە درۆنە تێکشکێنراوەکان لە گۆڕەپانێکی چۆڵی نزیک هۆتێلێک کەوتووەتە خوارەوە، بەڵام خۆشبەختانە رووداوەکە هیچ زیانێکی گیانیی لێنەکەوتووەتەوە.
