سەردار حوسێن
لە ڕووداوێكی دەگمەندا، كە دەبوو ببێتە مایەی شانازییەكی گەورە و گشتی، گەنجێكی خاوەن ویژدان لە سنووری پارێزگای دهۆك پارچە شوێنەوارێكی زێڕینی دۆزییەوە و بەوپەڕی هەستی نیشتیمانپەروەرییەوە ڕادەستی لایەنە پەیوەندیدارەكانی كرد. ئەم هەنگاوە مەدەنی و ئەخلاقییە، لە جیاتی ئەوەی ببێتە نموونەیەكی باڵا و جێگەی ستایش، لە تۆڕە كۆمەڵایەتییەكاندا ڕووبەڕووی شەپۆلێكی چاوەڕواننەكراو لە ڕەخنە و سووكایەتی بووەوە.
بەداخەوە زۆرینەی ئەوانەی لە سۆشیالمیدیا كۆمێنتیان نووسی بوو، گەنجەكەیان بە «گەمژە» و «نەزان» وەسف دەكرد، چونكە «سامانێكی گرانبەهای لەدەست خۆی داوە و ڕادەستی لایەنە پەیوەندیدارەكانی كردووە.
ئەم كاردانەوە نەرێنییە تەنیا گاڵتەجاڕییەكی سادە نییە، بەڵكو زەنگێكی ئاگاداركەرەوەی ترسناكە كە ئاماژە بە قەیرانێكی قووڵی هزری و كۆمەڵایەتی دەكات، مەترسییەكەیشی زیاتر لەوەدایە تاكی ئێمە گەیشتۆتە ئەو ئاستەی ئەو شتانەی هی خۆیشی نەبێت، ئامادەیە داگیری بكات و بیكات بە هی خۆی، پرسیاری سەرەكیش ئەوەیە: بۆچی كۆمەڵگەیەك دەگاتە ئەو ئاستەی ناپاكیی لە مێژووی خۆی بە زیرەكیی بزانێت و ئەمەكداری بەرامبەر بە نیشتیمان بە گەمژەیی دابنێت؟ بەپێی زۆرینەی كۆمێنتەكان و لە هزری زۆرینەدا، كە بەداخەوە ئەوەندەی من سەرنجمدا، نووسەری كۆمێنتەكان (مامۆستای زانكۆ، پیاوی عەلمانی و ئیسلامی و خاوەن كەسایەتی و تەنانەت نووسەر و رۆشنبیر و…هتد) تیابوو، ئەو پارچە شوێنەوارە ئەگەر ئەو گەنجە بۆ خۆی نەیبات، ئەوا لە مۆزەخانەدا نامێنێتەوە، بەڵكو كەسێك یان بەرپرسێك دەستی بەسەردا دەگرێت. ئەم بیركردنەوەیە، كە لەوانەیە لە هەندێك حاڵەتدا ڕاستیش بووبێت، وا دەكات تاك هەست بكات ئەگەر ئەو «تاڵانی» نەكات، یەكێكی تر پێی هەڵدەستێت، بۆیە باشترە خۆی قازانج بكات. بە واتایەكی تر، تاك موڵكی گشتی وەك موڵكی خۆی نابینێت.
دەبێ لەگەڵ ئەو سەرنج و ڕەخنەیەشدا دان بەوەدا بنێین، كە كاتێك نان و ژیان دەبنە ئەولەویەت، قسەكردن لەسەر پاراستنی شوێنەوار وەك بابەتێكی لاوەكی دێتە بەرچاو، ئەمەش وا دەكات بەرژەوەندیی تاكەكەسی زاڵ بێت بەسەر بەرژەوەندیی گشتیدا، ئەگەرچی شوێنەوار تەنیا پارچە بەردێك یان كانزایەكی بەهادار نییە، بەڵكو گێڕەرەوەی چیرۆكی هەزاران ساڵەی ژیانی باوباپیرانمانە لەسەر ئەم خاكە، نەبوونی ئەم تێگەیشتنە قووڵە وا دەكات خەڵك جیاوازی لەنێوان گەنجینەیەكی نیشتیمانی و دەستكەوتێكی خۆڕایی نەكەن.
بۆ من هەڵوێستی ئەو گەنجە جوامێرە، ئومێدێكی بچووكە لەناو نائومێدییەكی گەورەدا، بەڵام كۆمێنتەكان ئاوێنەیەكی ڕاستەقینەی ئەو واقیعە تاڵەن، كە ئێمە تیایدا دەژین، چونكە پێش ئەوەی ئەو گەنجە بە «گەمژە» دابنێین، دەبێ بپرسین پێچەوانەی ئەم هەڵوێستەی گەنجەكە چی پێ دەڵێن و ئەگەر خوانەخواستە پارچە شوێنەوارەكەی بۆ خۆی ببردایە، چیمان ناو لێدەنا..!؟ دەمەوێ ئەوەیش بڵێم، چارەسەری ئەم بیركردنەوە نێگەتیڤە تەنیا بە سەرزەنشتكردنی نووسەری كۆمێنتەكان ناكرێت، بەڵكو پێویستی بە چاكسازییەكی ڕیشەیی لە سیستەمی پەروەردە و بلاوكراوەی میدیایی و گوتاری گشتیدا هەیە، بۆ ئەوەی جارێكی تر «ئەمەكداری» نەبێتە «گەمژەیی» و «نیشتیمانپەروەریی» نەبێتە جێی پێكەنین.
