عەقلییەتا شۆفێنییا بەغدا و برسیکرنا گەلێ کوردستانی تاوانەکە دژی مرۆڤایەتیێ

نادر خەمۆ سینی
ئارمانجا عەقلییەتا شۆفینیی و تائیفیەتا بەغدا، پتنێ بو شکاندنا هێز و ئیرادە و کەرامەتا خەلکێ کوردستانێ و هەلوەشاندنا قەوارێ هەرێمێ کوردستانێ یە!؟ لەوما دڤێ دەربارێدا سەرۆك بارزانی دگوتارەکا خۆ یا گرنک و مێژۆیی دا فەرمۆیی و گۆت .. «بڕیارماندا بمرین و نەهێلین کەرامەت و ئیرادەی ئێمە بشکێنن». هەمی هەوڵێن سەرکردایەتییا پارتی دیموکراتی کوردستان ژبوو خزمەت گوزاری و چاکسازی و پێش ئێخستان ئابووری و بەرهەم ئینان دبوارێن وزە و کشتوکاڵ و پیشەسازیی و ئاڤەدانکرنێ.. ئەڤ هەمی هەولە د هەموو بوار و سێکتەرێن ژیانێدا پێخەمەتی بەردەوامی و بهێزکرنا ئەزموونێ هەریێما کوردستانیە کو هەلبەت مفایێ دگەهینیتە عیراقا فیدڕاڵ ژی. لێ مخابن کەربوکین و نەڕازیبونا هندەك گروپ و ئالیێن شۆفینی یێن عیراقی دگەل چەند کەسێن بناف کورد و بێ ڕوومەت ل همبەر ڤان هەوڵ و کوششا و دژاتیکرنا خەلکێ هەرێما کوردستانێ هێشتا زێدەتر بویە! دیارە پشتەڤانیا ئەجندایێن دەرەکی و هەول و جەولاتێن مەکوکی دناڤبەرا وان ئالیێن شۆفینی دبەردەوامن بۆ هەلوەشاندنا قەوارێ هەرێما کوردستانێ بڕێکا پێشێلکرنا دەستوری و سەپاندنا ئابلۆقا ئابوری لسەر خەلکێ هەرێمێ و ڕاگرتنا موچێ فەرمانبەران و برسیکرنا هاولاتیێن کوردستانی ، بدیتنا من چ هۆکار و شونگر بۆ وێ چەندێ نینە ژبلی کو پتنێ بریارەکا سیاسیە و پێشوەخت دیراسەت کریە بۆ شکاندنا هێز و ئیرادە و سفکاتیکرنا خەلکێ کوردستانێ و هەلوەشاندنا قەوارێ هەرێمێ یە.

لێ پێدڤییە سەرکردایەتییا پارتی و لایەنێن کوردستانییێن نیشتیمان پەروەر دەستێ خو بدەنە دەسێ پارتی و ب ئەرک و بەرپرسیارییەتا خویا نیشتیمانی ڕابن، چنکو ب بڕینا مووچە و بودچە و مافێن دەستوورییێن خەلکێ کوردستانی و پیشێلکرنا دەسووری؛ دیارە پلانەکا مەترسیدار یا هەی ژبو شکاندنا ئیرادە و کەرامەتا خەلکێ کوردستانێ.هەلبەت شکاندنا بنەمایێند تەوافق و تەوازن و شەراکەت ژلایا دەسهەلاتا بەغدا بویە جهێ دلگرانی و نەرازیبونا هەمو پێکهاتێن کوردستانێ و زێدەگاڤیەکا ئەخلاقی و سیاسیە و تێپەڕاندنا هەمو سنورێن کەرامەتا کوردستانیانە و ڕەفتار و سیاسەتەکا شاش و نە تەندروستە، ڕەفتارا بڕسیکرن و سفکاتیکرن ب مللەتێ کورد دێ بیتە فاکتەرەکی یاریدەر و ڕێکخۆشکەر بۆ زێدەبوونا ئاستەنگ و ئاڵوزی و لەمەران د ناڤبەرا هەرێمێ و بەغدا. ئەز باوەرم سەرکردایەتیا سیاسی یا هەرێمێ لسەر خولقاندنا قەرانێن حکومەتا فیدرال بێدەنگ و بێ هەلویست نامینیت و دێ بجددی کارکەت ژبو بەسڤەئینانا ماف و شایستەیێن خەلکێ کوردستانێ، ژبەر کو پەیرەوکرنا سیاسەتا شۆفینی لسەر برسیکرنا خەلکێ بێگونەهێ هەرێمێ زولمەکا مەزنە و دچیتە دچارچۆڤێ پیڤەرێ جینۆسایدێ هاوشێوێ ( مرنا هێدی هێدییە ) و نەکێمترە ژئایدیۆلۆژیا سیاسی و ستراتیژیا چەکێ کۆمکۆژ یا هێزێن داگیرکەرێن کوردستانێ نەخاسمە سیاسەت و دوژمنکاریا ڕژێما دکتاتوری یا بەعسیێن ژنافچۆین و ئەنجامدانا ( ٨) قوناغێن ئۆپەراسیۆنێن ئەنفالان و جینۆسایدکرنا گەلێ باشوری کوردستانێ.

ئێدی ژئەڤرۆ و وێڤە محالە دوژمن و داگیر کەر بکارن وێ سیاسەتا دوژمنکاری لسەر گەلێ کوردستانێ بسەپینن. ژبەر ڤێ یەکێ زۆر گرنگە بۆ قوناغا ئەڤرۆ یا مێژۆیی و هەستیار ئەولەویاتێن سیاسەتا دەرڤە یا گشت هێزێن سیاسیێن کوردستانی و سەرکردایەتیا سیاسی یا هەرێما باشوری کوردستانێ بتایبەتی پرا پەیوەندیێن دەرڤە دگەل جیهانێ موکمتر لێ بکەن بۆ هندێ ببن خودان لۆبیەکی کارا و بهێز لسەر ئاستێ نێفدەوەلەتی و بدەسڤە ئینانا ڕیاگشتییا نێڤدەولەتی بو پشتگیرییا دوزا هەرێما کوردستانێ و سەرخستنا دۆزا ڕەوایا گەلێ کوردستانێ، ڤێجا پشتەڤانیا خودێ وبئیرادا گەل و هیممەتا هێزا پێشمەرگێ کوردستانێ و دیبلۆماسیەتا حەکیما نەیا ڕابەر و سەرۆك ( مەسعود بارزانی ) یا سەرکەفتی پشتڕاستین دێ ڤێ قوناغا سەخت و دژوار بسەرفەرازی دەرباز کەین.