خەبات – ساسان دەروێش
پاش چواردە ساڵ لە بەرگری و خۆڕاگری کورد لەسەر زێدی خۆی، لە دوای ڕووخانی بەشار ئەسەد و گفتوگۆکردنی لایەنە کوردییەکان بۆ چوونیان بۆ دیمەشق وەک یەک شاندی کوردی، دواجار لە شاری قامیشلۆی ڕۆژئاوای کوردستان بە بەشداریی تەواوی پارت و لایەنە سیاسییەکان و ڕێنمایی و پشتیوانی هەمیشەیی سەرۆک بارزانی، کۆنفرانسی یەکڕیزی و یەکهەڵوێستی گەلی کورد لە ڕۆژئاوای کوردستان بە مارشی نەتەوەیی ئەی ڕەقیب و هەڵکردنی ئاڵای کوردستان بە ئاماده‌بوونی نوێنەری سەرۆک بارزانی دەستیپێکرد.
کۆنفڕانسەکە بۆ یەکخستنی بۆچوونە جیاوازەکان و ڕووبەڕووبونەوەی پێشهات و ئاڵنگارییەکان بوو.
سەرەنجام کۆنفرانسەکە لە یەک ڕۆژدا لە کەشوهەوایەکی دیموکراسی و خەندە لەسەر لێوانی ئامادەبووان کۆتاییهات و یەکبوونی گەلی کورد وەک دیاری پێشکەش بە دایکی شەهیدان کرا، تەواوی گەلی کوردی بەهەموو چین و توێژەکانەوە دڵخۆش کرد. له‌م باره‌یه‌وه زێوار مستەفا چالاکوان و نووسەر خەڵکی ڕۆژئاوای کوردستان قسەی کرد بۆ خەبات كرد.
سەرەتا زێوار مستەفا باسی لە دەرئەنجام و کۆتاییهاتنی کۆنفرانسەکە بۆ خەبات کرد و گوتی: یەکگرتوویی کورد لە ڕۆژئاوای کوردستان بەرجەستەکردنی ئیرادەی گەلێکی دێرینە کە چەندین سەدە لە پێناو ناسنامە و مافە سیاسی و کۆمەڵایەتی و ئابووری و کولتوورییەکانیان خەباتیان کردووە. دیدگای نەتەوەیەک کە خەبات دەکات بۆ ئازادی و کەرامەت و یەکسانی و یەکگرتوویی لەسەر بنەمای ڕاستی و دادپەروەری و ئاشتی و ئاسایش و سەقامگیری لە هەموو بوارەکاندا، ژیانێکی شایستە بۆ هەمووان، سەرئەنجام لەهۆڵی شارەوانی قامیشلۆ، کۆنفرانسێکی مێژوویی لە ڕۆژئاوای کوردستان بەڕێوەچوو، کە تێیدا داوای دەوڵەتی دیموکراتی لامەرکەزی و دامەزراندنی یەکڕیزیی سیاسی لە نێوان ڕیزەکانی کورددا دەکرێت.
هەروەها زێوار مستەفا ڕاشیگەیاند: بەڵێ، لە 26ی نیسانی 2025، تەنیا کۆنفرانسێکی سیاسیی ئاسایی نەبوو، بەڵکوو ڕۆژێکی مێژوویی بوو، بڕگەیەکی گرنگ بوو لە مێژووی سیاسی گەلێکدا کە لە مێژە خەباتی دەکرد بۆ ئەوەی دەنگی خۆیان ببیسترێت و ئاڵایان بەرز بکرێتەوە و ئیرادەیان وەربگێردرێت بۆ یەکێتی ڕاستەقینە لەسەر زێدی باووباپیرانیان لەبەشێکی کوردستان. لایەنە کوردستانییەکانی ڕۆژئاوای کوردستان بۆ ئاڵوگۆڕی لێدوان و وتار نەبوون، بەڵکوو بۆ بەدیهێنانی خەونێکی لەمێژینەیدا چاوەڕوانکراو بوو، هەروەک سەرۆک بارزانی سەرکردە و فەرماندە دووپاتی کردەوە: یەکگرتوویی کورد حەتمییه، ئەوەی لە کۆنفرانسی مانگی نیساندا ڕووی دا، تەنیا نزیکبوونەوەی هێزە سیاسییەکان نەبوو، بەڵکوو ڕاگەیاندنی فەرمیی ئیرادەی گەلێک بوو کە سەرەڕای چەوساندنەوە، بە نەشکاوی مایەوە و سەرەڕای کارەساتەکان بڵێسەی ئاگرەکەی نەکوژاوەتەوە، بۆ ئەوەی بە جیهان بڵێت ، ئێمە نەتەوەیەکی زیندووین، توانای ڕاپەڕین و بەردەوامبوون و یەکگرتنمان هەیە، ئەم گۆڕانکارییە مێژووییە بە بێ پشتگیری وڕێنمایی و دیدگای سەرکردە و مەرجەعی کوردان سەرۆک بارزانی تێنەدەپەڕا، کە هەرگیز لە بانگەوازی یەکڕیزیی کورد نەوەستاوە. بە ڕوونی وتی، و بە پێداگرییەوە دووبارەی کردەوە هێز لەیەکگرتدایە نەک پەرتەوازه‌ی ماڵی کورد لە ڕۆژئاوای کوردستان.
زێوار مستەفا دەشڵێت: “ئێمە وەک هەر نەتەوەیەکی دیکەی ناوچەکە نەتەوەیەکین، و لە عەرەب، فارس، تورک، یان هەر نەتەوەیەکی دیکە کەمتر نین، کورد تووشی نادادپەروەریەکی گەورە بووە، ڕۆژێک دێت کە نەتەوەی کوردیش یەکگرتوو دەبێت. قسەکانی سەرکردە و سەرۆک بارزانی، دیدێکی ستراتیژییە بۆ دەیەکانی داهاتوو، سیاسەتی گشتی وەک ئامرازێک بۆ ڕزگاری بەرجەستە دەکات، نەک تەنیا بەڕێوەبردن. لە ژێر دەسەڵاتە ستەمکارەکاندا، سیاسەتەکەی بوو بە قوتابخانەی خۆڕاگری و دانوستان و کردەی کردەیی لە ڕۆژئاوای کوردستان . سەرۆک بارزانی داوای یەکڕیزیی فەرمی نەکرد، بەڵکوو داوای پرۆژەیەکی سیاسیی هەمەلایەنەی کرد، لەسەر بنەمای ئیرادەی جەماوەری و پرەنسیپی ناسیۆنالیستی، لەگەڵ کرانەوەی عەقڵانی بەڕووی هەرێم و جیهاندا.
هەروەها زێوار مستەفا گوتیشی: ڕەنگە ئەوەی ئەمڕۆ لە ڕۆژئاوا بەدەستهاتووە، یەکەم بەرهەمی بەرجەستەی ئەم پڕۆژەیە بێت. لایەنە کوردییەکان دواجار لەوە تێگەیشتوون کە دابەشبوون تەنیا خزمەت بە دوژمنانی دۆزەکە دەکات، هێزی کورد لە یەکڕیزییەکەی دایە و ساتەوەختی مێژوویی چاوەڕوانی دوودڵەکان ناکات. سیاسەتی گشتی، وەک سەرۆک بارزانی دایمەزراندووە، پڕۆژەی کەرامەت و شووناسە، نەک سازشکردن لەگەڵ نادادپەروەری. دووبارە پێناسەکردنەوەی پەیوەندیی نێوان گەل و دەوڵەت، نێوان حکوومەت و خزمەتگوزاری و لە نێوان کورد و دەوروبەرەکەی. بۆیە نابێ ئەوەی لە قامیشلۆ ڕوویدا وەک ڕووداوێکی لۆکاڵی بخوێنرێتەوە، بەڵکوو وەک سەرەتای گۆڕانکاری لە هۆشیاریی نەتەوەیی کورد بەرەو پڕۆژەیەکی یەکگرتووی بەردەوام بخوێنرێتەوە. ئیرادەی گەلێکە کە ماوەیەکی زۆر چاوەڕێی کردووە، بەرگەی سەبرێکی زۆری گرتووە و سەرەڕای زریانەکان لەسەر بنەماکانی خۆی چەقبەستوو ماوەتەوە. هەروەها وەڵامێکە بۆ دیدگای سەرکردەیەک کە پێی وایە کورد ناتوانێت بە دیلی پارچەپارچەبوون و چەوساندنەوە بمێنێتەوە. یەکەم هەنگاوەکان بەرەو یەکڕیزیی کورد لە ڕۆژئاوای کوردستان دەستی پێکردووە و ئەمڕۆش خەونەکە بووەتە واقیع، ئیرادە بووەتە میساق، دیدگای سیاسیش نەخشەڕێگایە. لەکۆتاییدا دەڵێین وەک سەرۆک و ڕێبەر سەرۆک بارزانی فەرموویەتی: بێ ئومێد مەبن، چونکە سبەینێ هی ئێمەیە و ڕاستی تێکناچێت. یەکگرتوویی کورد لێرەوە دەستی پێکرد.
