سهرهتا وتار نێچیرڤان بارزانى.. په‌ناگه‌هێ رزگاركرنا ملله‌ته‌كى
غاندیێ كۆله‌وار
ئۆپه‌راسیۆنێن رزگاركرنا كچ و ژنێن ئێزدىیا نه بله‌ز و ساناهى بوون، به‌لكو نێچیرڤان بارزانى شیانێن ناڤخۆ ل هه‌ڤجه‌ماندن، پێگه‌هێ خۆ كو ل وى ده‌مى سه‌رۆكوه‌زیرێن هه‌رێما كوردستانێ بوو و تا سه‌رۆكایه‌تییا هه‌رێما كوردستانێ ژى كره په‌ناگه‌هه‌ك بۆ د هاوارچوونا گرتیێن كه‌فتینه ده‌ست تیرۆرستێن جلك ره‌ش؛ و نوكه ئه‌و په‌ناگه‌هـ كریه ئارمگه‌هـ و كچ و ژن ل خۆ ڤه‌جه‌ماندینه.
ل سه‌ر ئاستێ ناڤخۆ هه‌موو پشته‌ڤانییه‌ك بۆ كه‌سوكارێن وان ئێزدیێن كه‌فتینه ده‌ست داعشێ به‌رده‌ستكرن و ل سه‌ر ئاستێ نێڤده‌وله‌تى ژى هه‌موو دبلۆماسییه‌تا خۆ خسته د خزمه‌تا رزگاركرنا كچ و ژنان دا، بۆ وێ یه‌كێ ئه‌و سته‌م و زۆریا ل ملله‌ته‌كى 74 فرمان لێ رابووین ب راوه‌ستینیت، خسته‌كارى، شیانێن سه‌رۆك نیچیرڤان بارزانى رۆناهییه‌كا مه‌زن دا دێمێ تژى خه‌م و ژان یێ ئێزدییان و چاڤێ جیهانی بۆ سه‌ر دۆزا وان یا پڕى سته‌م و زۆرى راكێشا و ب رێكێن جودا ژى شیان پشته‌ڤانییا نێڤده‌وله‌تى بۆ دوباره ڤه‌ژاندنا وان بۆ ژیانێ ب ده‌ستڤه‌بینن و ده‌هان رێكخستنان په‌یوه‌ندیێن باش ل گه‌ل نڤیسینگه‌ها سه‌رۆك نێچیرڤان بارزانى گرێدان بۆ وێ یه‌كێ وان كچان ژ وان نه‌هامه‌تى و نه‌خۆشی و ده‌رده‌سه‌رى و سته‌م و زۆرییا ل وان هاتییه‌كرن رزگار بكه‌ن و ژ قۆناغه‌كا ره‌شبینى و ژیانا سه‌خت به‌ر ب گه‌شبینى و ژیانا رۆژانه یا ناڤا خێزانێ و جڤاك و كلتۆرێ ئێزدییان و كوردى ڤه‌گه‌ڕینن.
نێچیرڤان بارزانى كاره‌كێ ب باورى ل گه‌ل هه‌ڤپه‌یمانییا نێڤدوه‌له‌تى یا دژى داعشێ كر، كو ل وى ده‌مى ده‌وله‌تێن جودا ل سه‌رانسه‌رى جیهانێ پشته‌ڤانییا لۆجستى و ئاسمانى بۆ هێزێن پێشمه‌رگه‌ى هنارت و ئه‌ڤ هه‌ڤكارییه بوو ئه‌گه‌ر زێده‌تر ئۆپه‌راسیۆن بهێنه كرن و كچ و ژنێن ئێزدى بهێن رزگاركرن، ل ده‌مه‌كى رزگاركرنا سڤیلان ژى به‌رده‌وام بوو ل ده‌ڤه‌رێن دوورپێچكرى، لێ فۆكسا نڤێسینگه‌هێ هه‌موو ل سه‌ر رزگاركرنا ره‌ڤاندییان بوو.
چاڤدێرى ژ روویێ ساخله‌مى، په‌روه‌رده، پشته‌ڤانییا ده‌روونى ژى كاره‌كێ دى یێ سه‌ر عه‌رد و مه‌یدانى یێ سه‌رۆك نێچیرڤان بارزانى بوو كو سه‌نته‌ره‌كی تایبه‌ت یێ گرێدایى رزگاربوویان بۆ چاره‌كرنێ ڤه‌كر و ناڤه‌ندا وى سه‌نته‌رى كره پارێزگه‌ها دهۆكێ، ژبه‌ركو ئاواره‌یێن شنگالێ ل ده‌ما داگیركرنا شنگالێ قه‌ستا سنۆرێ ڤێ پارێزگه‌هێ كربوون، له‌و سه‌نته‌ر ژى هه‌ر ل هه‌مان پارێزگه‌هـ هاته دانان و ساخله‌مییا دهۆكێ چاڤدێرییا وى سه‌نته‌رى كر و هه‌ر كچ و ژنه‌كا هاتبا رزگاركرن ل وى سه‌نته‌رى ژ ئالیێ بسپۆرێن هه‌ره باش ڤه د هاته پێشوازیكرن و یا پێدڤى د وارێ ده‌روونى دا بۆ دهاته‌كرن.
پشتى رزگاركرنێ، شیانێن مه‌زن د وارێ مافێن قوربانییان دا و پێشكێشكرنا پشته‌ڤانییا قانوونى و ده‌روونى و ئاڤاكرنا باوه‌ریێ د ناڤا كۆمه‌لگه‌هێ دا مه‌زاخت و رۆله‌كێ دى یێ نێچیرڤان بارزانى ئه‌و بوو یا د شیان دا ده‌ستێ وى ل سه‌ر سینگێ وى بوو و تا نوكه ژى ئه‌و ده‌ست رانه‌بوویه و ب به‌رده‌وامى بۆ رزگاركرن و هاریكاریكرنا رزگاربوویان ده‌ستێ وى ل سه‌ر سینگێ وى یه و كریه په‌ناگه‌هـ بۆ گرتییان و ئارمگه‌هـ ژى بۆ رزگاربوویان.
رێكا كو خه‌لكێ پارێزگه‌ها دهۆكێ بۆ برایێن خۆ یێن ئێزدى ڤه‌كرى ژ ئالیێ نێچیرڤان بارزانى ڤه بوو جهێ سوپاسیێ و ئه‌و سوپاسیێن جه‌نابێ وى بۆ خه‌لكێ دهۆكێ كرین هه‌ر وه‌ك نوونه‌رێ هه‌موو ئێزدییان و دلێ خه‌لكێ دهۆكێ یێ فره‌هـ به‌رفره‌هتر لێ كر، ئێدى ژ پێكڤه كه‌ر و قه‌دكرنا نانى ل سه‌ر ئێك ئاخ، ده‌رگه‌هێن مزگه‌فتان ژى بۆ برایێن خۆ یێن ئێزدى ڤه‌كرن.
سه‌ركردایه‌تیكرن د قه‌یرانه‌كا سه‌خت یا وه‌ك هاتنا داعشێ و جینۆسایدكرنا ملله‌ته‌كى و سه‌بیكرن و كوشتن و كۆمكوژیێن جودا جودا نه تشته‌كێ ئاسانه، لێ دل فره‌هى و دبلۆماسییه‌ت و دووربینییا نێچیرڤان بارزانى بوو ئارامگه‌هه‌ك و ئێدى ئێزدییان خۆ د وێ ئارمگه‌هێ دا دیت و ب مال و مه‌زه‌لێن خۆ زانین، هه‌ر ژ قۆناغا رزگاركرنێ و تا گه‌هشتن ب خێزان و كه‌سوكارێن خۆ ب هویرى چاڤدێرییا پرۆسێسا رزگاركنێ دهێته‌كرن و ب هه‌ر بهایه‌كى و هه‌ر ئاوایه‌كى بیت، نه ده‌ستێ نێچیرڤان بارزانى ل سه‌ر سینگێ وى رابوویه و ب یه‌قینین تا ئێك رزگاربووى ژى مابیت ده‌ست و په‌ناگه‌هـ و ئارامگه‌ها وى مالا رزگاربوویانه.
