با پێکەوە پەرە بە خەباتی ڕزگاریی نیشتیمان بدەین

عارف ڕوشدی
گەلی کوردستان تەنها لەسایەی پەرچەمی کوردایەتیدا، وەک گەلێکی زیندوو دەمێنێتەوە، چۆنکە؛ داگیرکەران بە هەموو توانایەکیانەوە لە هەوڵی بەردەوامدان بە هزری جیاواز ( نەتەوەیی ڕووکەش، نێونەتەوەیی فریودەر و ئیسلامی سیاسیی لادەر) کوتایی بە هەستی نەتەوایەتی و نیشتیمانیمان بێنن؛ لە خۆشباوەڕی و ناخپاکی خۆمانەوە هاوارمان کرد ( کورد، عەرەب و تورک) براین، چەپڵەی درۆزنانەیان بۆ لێ دەداین و لە ناخی خۆیاندا، وتیان فریودەران سەرەولێژ بوون، هاوارمان کرد ( بژی برایەتیی گەلان، خەبات دەکەین لە پێناو بنبڕکردنی جیاکاری )، قاقای پێکەنینیان دەهات و وتیان؛ چەند گەمژەن بە گەمژەیی خۆیان شاد و مەستن، بە ڕیشی پان و عەبا خۆیان دەنوێنن وەک فریادڕەس، بەڵام لە خشتەبەر و ، لە مینبەری مزگەوتە پاک و بێگەردەکانمانەوە هزری لادەری و کوشت و کوشتار و دینداری ڕووکەش دەرخواردمان دەدەن، دەستیان بە ڕیشیاندا هێنا و کوڕنۆشیان بۆ وەلی ئەمرەکانیان برد.

ئایا گەلە ستەمدیدەکەمان، گەلی سەرفرازی ( خودا ناس، ڕاستگو و بێ حیلە و خوازیاری عەدالەت و یەکسانی) تاکەی هەندێک لە کوردزمانەکان، لە کەواسووری بەر لەشکەری داگیرکەران لە سەمای ملکەچیدا دەمێننەوە؟ ئایا کاتی ئەوە نەهاتووە (درۆ، پوختان و ریاکاری) (هەموو ئەو ڕەوتانە) بەیەکجاری شەرمەزار بکرێن و پێکەوە لە فەلەکی باڵای کوردایەتیدا کە تەنها ڕێبازی پیرۆز و سەرڕاستە، پەرە بە خەباتی ڕزگاری و ئازادیی گەل و نیشتیمان بدەین؟.