هەلبژاردنا ئۆرگانێن حزبی، ژێبوونا ئەندامان بهێزتر دکەت

شەمال ئاکرەیی
هەر سازییەک و ژ وانا پارتیێن سیاسی، ژ بۆ پەیڕەوکرن و چەسپاندنا پرەنسیپێن دیموکراسیێ، گەرەکە باوەڕی ب بەردەستکرن و ڤەکرنا دەلیڤەیان هەبیت بۆ کادرێن خۆ، داکو ب رێکا وانڕا نویکرنا خوینا ئۆرگانێن خو ب کادرێن گەنج و یێن ب هیڤی و خودان ئاسۆیێن گەش بکەت؛ لەوڕا ژی و ل گۆری پیڤەر و مەرجێن یاسایی و دەستوری پەنایێ ژ بۆ پرۆسەیا هەلبژاردنان دبەت.
هەلبژاردنێن ئۆرگانێن ناڤخۆیی یێن پارتی دیموکراتی کوردستان، کو ل گوری بڕیارا کۆنگرەیێ ١٤ێ، کو ل رۆژێن ٣ێ چریا دویێ یا ٢٠٢٢ێ ل دهۆکێ برێڤەچوو، ل رۆژا سێ شەمبی ٢٥ێ خزیرانا ٢٠٢٤ێ ل سەر ئاستێ ١٧ تایێن ڤێ پارتییا تێکۆشەر دەستپێکرن. ئەڤ نیشان و گرۆڤەکێ سەلمێنەرە کو پارتی حزبەکا هەڤچەرخە و ل گەل کاودانێن رۆژەڤێ ب ئینانە پێشا کەسێن خودان بەرنامەیێن زەنگین بۆ ب رێڤەبرنا ئۆرگانێن خو، هەردەم و ل گوری پێدڤیبوون و دەمی خو نوی دکەتەڤە.
ئێک ژ خالێن هەری باڵکێش ئەوە، کو ئەڤ هەلبژاردنە ژ خوارێ بەر ب سڵالڤە دچن یانکو ژ بنکەیان بۆ رێکخراوان و پاشان بۆ ئاستێ ناوچەیان بڕێڤەدچن و پاشڕا ژی هەموو پێکڤە ستافێ تایێن (لقێن) حزبێ د هەلبژێرن، پشتی هنگی ستافێ هەر تایەکی ل سنورێ نڤیسینگەها رێکخستنا پارێزگەهێ بەرپرسێن پشکێن ناڤا نڤیسینگەها رێکخستنێ، دێ هەلبژێرن. ئەڤ چەندە مینا سەراد و بێژنکێ یە و کادرێن ژ هەژی و خودان بەرنامە و کاریزما، دێ ب سەر کەڤن و دێ بیتە هاندانەک ژی بۆ کادرێن دی، داکو بۆ خولێن بهێت ببنە خودان بەرنامە و ژ لایێ رەوشەنبیری خو پتر پێبگەهینن.
ئێک ژ خالێن گرنگ یێن ڤان هەلبژاردنان، پشکدارییا ئافرەتێ یە، کو ب کۆتا پشکدار نابیت بەلکو دڤێت پشکدارییا وێ دێ ب رێژە بیت.
ل ڤێرە دەنگدەر (ئەندامێ حزبی)، پشکداریێ د دەستنیشانکرن و پاڵپشتیکرن و دانانا بەرپرسێن خو دکەت. هەروەسا ژی ئەو کادرێن دکارن ببنە جهێ باوەڕییا دەنگدەری، دێ ب رژدی بزاڤێ کەت ب جوانترین و باشترین شێوە خزمەتا ئۆرگانا خو یا حزبی بکەت؛ داکو ببیتە جهێ رەزامەندییا حزب و دەنگدەرێن خو و بگەهتە هیڤیێن خو یێن مایی ژی.
پرۆسەیا هەلبژاردنێ، گرنگییەکا ئێکجار زۆر هەیە ژ بۆ بهێزکرنا دیموکراسیێ و بلندکرنا ئاستێ ئەدایا کاری ئۆرگانی یێ حزبێ. دەما ئەندامێن ل سەر ئاستێ بنکە و رێکخراو و لژنەیان خو دبینن پشکدار د پرۆسەیەکا گرنگ یا ڤی جۆری، ب رەنگەکێ ئۆتۆماتیک ژێبوون و ئینتیما و هەڤبەندییا وی ل گەل ئۆرگانا وی یا حزبی دێ بهێزتر لێ هێت و د بازنەیەکا مەزنتر دا، دێ گرێدانا وی ب حزبا ویڤە موکومتر بیت چونکی وی ژی رۆل و دەنگ هەبوویە د هەلبژاردن و دەستنیشانکرنا وان کادرێن، کو کارێ ئۆرگانا وی یا حزبی برێڤە دبەن.